ଖୁବଶୀଘ୍ର ଓଡ଼ିଶାର କୋଣଅନୁକୋଣରୁ ଜଗା ଦର୍ଶନ ପାଇଁ ବାହାରିବେ ଭକ୍ତ । କାରଣ ରାଜ୍ୟ ସରକାର ଶ୍ରୀଜଗନ୍ନାଥ ଦର୍ଶନ ଯୋଜନାକୁ କିଛି ଦିନ ମଧ୍ୟରେ ଆରମ୍ଭ କରିବାକୁ ଯାଉଛନ୍ତି । ଏହି ଯୋଜନା ଅଧୀନରେ ବରିଷ୍ଠ ନାଗରିକଙ୍କୁ ପୁରୀ ଡାକିବେ ସରକାର । ୬୦ରୁ ୭୫ ବର୍ଷ ବୟସ୍କ ଏବଂ ବିଧବା ମହିଳାଙ୍କୁ ଜଗନ୍ନାଥ ଦର୍ଶନ କରାଯିବ । ଏନେଇ ସମସ୍ତ ଜିଲ୍ଲାପାଳଙ୍କୁ ପର୍ଯ୍ୟଟନ ବିଭାଗ ଚିଠି ଲେଖିଛି । ପଞ୍ଚାୟତ ସ୍ତରରେ ହିତାଧିକାରୀ ଚୂଡାନ୍ତ କରିବା ପାଇଁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି ।

ଅନେକ ସମୟରେ ଘର ସଂସାର ଜଞ୍ଜାଳ ଯୋଗୁଁ ହେଉ ବା ଆର୍ଥିକ ସମସ୍ୟା, ଭକ୍ତମାନେ ଜଗା ଦର୍ଶନ ପାଇଁ ଯାଇପାରନ୍ତି ନାହିଁ । ହେଲେ ଓଡ଼ିଆ ମନ ଜଗା ପାଖରେ ଥାଏ । ଗରିବ ଭକ୍ତଙ୍କୁ ଶ୍ରୀଜଗନ୍ନାଥଙ୍କ ଦର୍ଶନ କରାଇବା ଲାଗି ଗତବର୍ଷ ବଜେଟ୍‌ରେ ରାଜ୍ୟ ସରକାର ଶ୍ରୀଜଗନ୍ନାଥ ଦର୍ଶନ ଯୋଜନା ସମ୍ପର୍କରେ ଘୋଷଣା କରିଥିଲେ । ଏହି ଯୋଜନା ମାଧ୍ୟମରେ ଗରିବ ଭକ୍ତମାନଙ୍କୁ ମାଗଣାରେ ସରକାର ଶ୍ରୀକ୍ଷେତ୍ର ଭ୍ରମଣ କରାଇବେ । ରାଜ୍ୟ ସରକାର ଏଥିଲାଗି ପର୍ଯ୍ୟଟନ ବିଭାଗକୁ ଦାୟିତ୍ବ ଦେଇଛନ୍ତି ।

ଏହି ଯୋଜାନଟି ୨୦୨୫ରୁ ଆରମ୍ଭ ହୋଇଥିବାବେଳେ ୨୦୨୮-୨୯ ଯାଏଁ ଚାଲିବ । ୪ ବର୍ଷରେ ୧.୨୦ ଲକ୍ଷ ରାଜ୍ୟବାସୀଙ୍କୁ ସରକାର ଜଗା ଦର୍ଶନ କରାଇବାକୁ ଲକ୍ଷ୍ୟ ରଖିଛନ୍ତି । ଏଥିଲାଗି ଜିଲ୍ଲା ଓ ବ୍ଲକ୍ ସ୍ତରରେ ଏକ ସ୍ବତନ୍ତ୍ର ଡେସ୍କ ସ୍ଥାପନ ହୋଇଛି । ଜିଲ୍ଲା ପ୍ରଶାସନ ପକ୍ଷରୁ ଗରିବ ଶ୍ରେଣୀର ଭକ୍ତଙ୍କ ସହିତ ୬୦ରୁ ୭୫ ବର୍ଷ ବୟସ୍କ ଏବଂ ବିଧବା ମହିଳାଙ୍କୁ ଏହି ତୀର୍ଥଯାତ୍ରା ଲାଗି ଚୟନ କରାଯିବ ।

ତୀର୍ଥଯାତ୍ରୀମାନେ ପୁରୀ ବାହାରିବା ପୂର୍ବରୁ ସେମାନଙ୍କ ସ୍ବାସ୍ଥ୍ୟାବସ୍ଥା ଯାଞ୍ଚ କରାଯିବ । ଏହାସହିତ ଯାତ୍ରା ଆରମ୍ଭ ହେବା ପୂର୍ବରୁ ସେମାନଙ୍କୁ ଯାତ୍ରା ସମୟରେ ଆବଶ୍ୟକ ପଡୁଥିବା କିଛି ସାମଗ୍ରୀ ଯେପରି ତଉଲିଆ, ଟୋପି, ହାପ୍ ଜ୍ୟାକେଟ୍‍ ପାଣି ବୋତଲ, ଟଏଲେଟ୍ ପାଉଚ୍ ଆଦି ଦିଆଯିବ । ଯାତ୍ରୀଙ୍କ ଚିହ୍ନଟ ଲାଗି ସେମାନଙ୍କୁ ପରିଚୟ ପତ୍ର ମଧ୍ୟ ପ୍ରଦାନ କରିବେ ସରକାର ।

ସେହିପରି ଯାତ୍ରା ସମୟରେ ସେମାନଙ୍କୁ ଜଳଖିଆ, ମଧ୍ୟାହ୍ନ ଭୋଜନ, ରାତ୍ରି ଭୋଜନ ଆଦି ପ୍ରଦାନ କରାଯିବ । ଯାତ୍ରୀ ମଝିରେ ଆବଶ୍ୟକ ପଡ଼ିଲେ ଅସ୍ଥାୟୀ କ୍ୟାମ୍ପର ବ୍ୟବସ୍ଥା କରିବେ ସରକାର । ସେଠାରେ ଚେୟାର ଟେବୁଲ, ବିଛଣା, ସାଉଣ୍ଡ ସିଷ୍ଟମ, ଲାଇଟ ସିଷ୍ଟମ ଏବଂ ପୁରୁଷ ଓ ମହିଳା ଯାତ୍ରୀଙ୍କ ଲାଗି ଅଲଗା ଅଲଗା ଆଶ୍ରୟ ସ୍ଥଳୀ କରାଯିବ । ପୁରୀ ଆସିବା ବେଳେ ତୀର୍ଥଯାତ୍ରୀଙ୍କ ବସରେ ଜଣେ ଲେଖାଏଁ ସହଯୋଗୀ କର୍ମଚାରୀ ଓ ସ୍ବେଚ୍ଛାସେବୀଙ୍କୁ ରଖାଯିବ । ପୁରୀରେ ମଧ୍ୟ ଏକ ସହାୟତା ଡେସ୍କ ସ୍ଥାପନ କରାଯିବ । ଶ୍ରଦ୍ଧାଳୁମାନେ ମାଗଣାରେ ଜଗା ଦର୍ଶନ କରିପାରିବା ସହ ଅବଢା ମଧ୍ୟ ଖାଇବେ । ଶ୍ରୀଜଗନ୍ନାଥ ଦର୍ଶନ ଯୋଜନା ପାଇଁ ସରକାର ମୋଟ ୩୦ କୋଟି ଟଙ୍କା ଖର୍ଚ୍ଚ କରୁଛନ୍ତି ।

ଏଥିସହ ପଢନ୍ତୁ: ସନ୍ଧ୍ୟା ସମୟରେ ଏହି ୩ଟି ଧଳା ଜିନିଷ କେବେବି ଦାନ କରନ୍ତୁ ନାହିଁ ହୋଇଯିବେ କାଙ୍ଗାଳ