କଥାରେ ଅଛି ଉପସ୍ଥିତ ବୁଦ୍ଧି ଥିଲେ ଆପଣ ମୃତ୍ୟୁମୁଖରୁ ବି ବର୍ତ୍ତିପାରିବେ । ଏହି କଥାକୁ ଜଣେ ଯୁବକ ପ୍ରମାଣିତ କରିଛନ୍ତି । ଖାଦ୍ୟ ଅନ୍ଵେଷଣରେ ଆସିଥିବା ଏକ ଭାଲୁ କବଳରୁ ଯୁବକ ଜଣକ ଅଳ୍ପକେ ବର୍ତ୍ତିଯାଇଛନ୍ତି । ଯାହାର ସିସିଟିଭି ଫୁଟେଜ ଏବେ ସାମ୍ନାକୁ ଆସିଛି । ଯୁବକ ଜଣକ କିପରି ଦୋକାନରେ ଶୋଇଥିଲେ ଓ ଭାଲୁଟି ତାଙ୍କ ଉପରେ ଚଢିଥିଲେ ବି କିଛି କ୍ଷତି ପହଞ୍ଚାଇନଥିଲା, ସେ ସବୁ କ୍ୟାମେରାରେ କଏଦ ହୋଇଛି ।

ଏଭଳି ଘଟଣା ଦେଖିବକୁ ମିଳିଛି ନବରଙ୍ଗପୁର ଜିଲ୍ଲା ପଡ଼ୋଶୀ ଛତିଶଗଡରେ କାଂକେର ଜିଲ୍ଲାରେ । କାଂକେର ନରହରିପୁର ଗ୍ରାମରୁ ଏକ ଛାତି ଥରା ଦୃଶ୍ୟ CCTVରେ କଏଦ ହୋଇଛି । ଗୋଟିଏ ଜଙ୍ଗଲୀ ଭାଲୁ ଗ୍ରାମ ଭିତରେ ରାତିଅଧରେ ପଶିଥିଲା । ସେହି ସମୟରେ ଜଣେ ବ୍ୟକ୍ତି ଦୋକାନ ଘରେ ଶୋଇଥିଲେ । ଖାଦ୍ୟ ଅନ୍ଵେଷଣରେ ଭୋକିଲା ଭାଲୁଟି ଦୋକାନ ଭିତରେ ପଶି ଯାଇଥିଲା । ଦୋକାନ ଭିତରେ ଚାରି ମିନିଟ କାଳ ତାଣ୍ଡବ ରଚିଥିଲା ।

ଭିଡିଓରେ ଦେଖି ଲାଗୁଥିଲା ଭାଲୁଟି ଯେପରି ବହୁତ ଭୋକିଲା ଅଛି ଏବଂ ଅସ୍ତବ୍ୟସ୍ତ ହୋଇ ଖାଦ୍ୟ ଖୋଜୁଛି । ଏଥିଲାଗି ସେ ଦୋକାନର ଜିନିଷପତ୍ରକୁ ସବୁ ଫୋପାଡି ଦେଇଥିଲା । ଏସବୁ ଜାଣି ପାରି ମଧ୍ୟ ଯୁବକ ନିଜର ଉପସ୍ଥିତ ବୁଦ୍ଧି ଖଟାଇଥିଲେ । ସେ ଦୋକାନ ଘର ଚଟାଣରେ ଶୋଇଥିଲେ ସୁଦ୍ଧା ଆଦୌ ହଲଚଲ ହୋଇନଥିଲେ । ଯେପରି ନିର୍ଜୀବ ପରି କମ୍ବଳ ତଳେ ଶୋଇ ରହିଥିଲେ ।

ବିଳମ୍ବିତ ରାତିରେ ଦୋକାନ ଭିତରକୁ ଭାଲୁଟି ଆସିବାର ଜାଣିପାରି ଯୁବକ ଚୁପ୍ କି ଶୋଇ ଯାଇଥିଲେ । ଭାଲୁଟି ଯୁବକଙ୍କ ପାଖରେ ଥିବା ବିଭିନ୍ନ ଆସବାସ ପତ୍ରକୁ ଖେଳାଇବା ସହ ମନ ଇଚ୍ଛା ଭଙ୍ଗାରୁଜା କରିଥିଲା । ଏହି ସମୟରେ ଯୁବକ ଓ ଭାଲୁ ମଧ୍ୟରେ ଆଦୌ ବ୍ୟବଧାନ ଥିଲା । କାରଣ କମ୍ବଳ ଭିତରେ ଯୁବକଙ୍କ ଉପରେ ଚଢି ଭାଲୁ ଖାଦ୍ୟ ଖୋଜୁଥିଲା । ତଥାପି ଭୟଭୀତ ନ ହୋଇ ଯୁବକ ଜଣକ ଚୁପଚାପ ଶୋଇ ରହିଥିଲେ । ଚାରି ମିନିଟ କାଳ ଭାଲୁଟି ଯୁବକଙ୍କ ଉପରେ ରହିଥିଲେ ସୁଦ୍ଧା ଆକ୍ରମଣ କରିନଥିଲା । ଫଳରେ ଏକ ନିଶ୍ଚିତ ବିପଦରୁ ଯୁବକ ଜଣକ ବର୍ତ୍ତି ଯାଇଛନ୍ତି ଓ ତାଙ୍କ ଜୀବନ ରକ୍ଷା ପାଇଛି ।

ଏଥିସହ ପଢନ୍ତୁ: ଅଷ୍ଟମ ଶ୍ରେଣୀ ଛାତ୍ରୀଙ୍କୁ ନୂଆ ଜୀବନ ଦେଲା ମଲା କୁକୁର