ଅର୍ଗସ ବ୍ୟୁରୋ: ଦ୍ବିତୀୟ ଶ୍ରୀକ୍ଷେତ୍ର ବାରିପଦାରେ ଆଜି ପ୍ରଥମ ଦିବସ ରଥଟଣା । ଦେବୀ ସୁଭଦ୍ରାଙ୍କ ରଥ ଟାଣିଲେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା । ସାଥିରେ ଥିଲେ ହଜାର ହଜାର ମହିଳା। ୧୯୭୫ ମସିହାରୁ ଆନ୍ତର୍ଜାତିକ ମହିଳା ଦିଵସ ପାଳନର ଶୁଭାରମ୍ଭ ହୋଇଥିଲା । ଆଉ ଏହାକୁ ଲକ୍ଷ୍ୟ କରି ବାରିପଦାରେ ମା' ସୁଭଦ୍ରାଙ୍କ ଦର୍ପଦଳନ ରଥକୁ ମହିଳାମାନେ ଟାଣିବା ପରମ୍ପରାର ପଡିଥିଲା ମୁଳଦୁଆ । ମହିଳାମାନେ ରଥ ଟାଣିବା ଦ୍ବାରା ସାରା ବିଶ୍ବକୁ ଯାଇଥିଲା ମହିଳା ସଶକ୍ତିକରଣର ବାର୍ତ୍ତା । ସେବେଠାରୁ ନିରବଚ୍ଛିନ୍ନ ଭାବରେ ଏହି ପରମ୍ପରା ପ୍ରଚଳିତ ହୋଇ ଆସୁଛି । ସାରା ବିଶ୍ବରେ ଏହା ଏକ ନିଆରା ପରମ୍ପରା । ନାରୀ ସମ୍ମାନକୁ ନେଇ ସାରା ବିଶ୍ବରେ ଚର୍ଚ୍ଚା। ମହିଳାଙ୍କ ଦ୍ବାରା ଦର୍ପଦଳନ ରଥଟଣାକୁ ୫୦ବର୍ଷ ପୁର୍ତ୍ତି ହୋଇଛି ।

ପୁରୀ ରଥଯାତ୍ରା ଦିନ ଏଠାରେ କେବଳ ପହଣ୍ଡିରେ ଚତୁର୍ଦ୍ଧା ମୁରତୀ ରଥାରୂଢ ହେବାର ପରମ୍ପରା ରହିଛି । ତା ପର ଦିନ ୨ଦିନ ଧରି ରଥଟଣା କାର୍ଯ୍ୟ ସମ୍ପନ୍ନ ହୋଇଥାଏ । ପ୍ର ଥମ ଦିନରେ ବଡଭାଇ ବଳଭଦ୍ରଙ୍କ ତାଳଧ୍ଵଜ ରଥ କୁ ମାଉସୀ ମା ମନ୍ଦିର ସମ୍ମୁଖ ପର୍ଯ୍ୟନ୍ତ ଟଣା ଯାଇଥିବା ବେଳେ ମା' ସୁଭଦ୍ରାଙ୍କ ଦର୍ପଦଳନ ରଥକୁ ମହିଳାମାନେ ଅଧା ରାସ୍ତା ଅର୍ଥାତ ବାରିପଦା ଟାଉନଥାନା ସମ୍ମୁଖ ପର୍ଯ୍ୟନ୍ତ ଟାଣିନେଇଥାନ୍ତି । ତହିଁ ପରଦିନ ପ୍ରଥମେ ସୁଭଦ୍ରାଙ୍କ ରଥ ମହିଳାଙ୍କ ଦ୍ବାରା ମାଉସୀ ବାଡ଼ି ପର୍ଯ୍ୟନ୍ତ ଟଣାଯିବା ପରେ ଜଗନ୍ନାଥଙ୍କ ନନ୍ଦିଘୋଷ ରଥ ସମ୍ପୂର୍ଣ୍ଣ ଟଣା ଯିବାର ବିଧି ରହିଆସିଛି।

ସକାଳେ ରଥରେ ପଣ୍ଡାପଢିଆରୀଙ୍କ ଦ୍ବାରା ତିନି ଦିଅଁଙ୍କ ନୀତିକାନ୍ତି ହୋଇଥିଲା । ଭକ୍ତମାନଙ୍କ ଦର୍ଶନ କରିଥିଲେ । ପାଗ ଅନୁକୂଳ ରହିଥିବାରୁ ଲମ୍ବା ଲାଇନରେ ଛିଡାହୋଇ ଭକ୍ତମାନେ ଶୃଙ୍ଖଳିତ ଭାବେ ଶ୍ରୀଜୀଉଙ୍କ ଦର୍ଶନ କରିବା ସହ ଭୋଗ ନୈବେଦ୍ୟ ଅର୍ପଣ କରି ଭାବବିହ୍ବଳ ହେଉଛନ୍ତି । ବାରିପଦାରେ ରଥୟାତ୍ରା ୧୩ ଦିନ ଧରି ଚାଲିବ।

ଅଧିକ ପଢ଼ନ୍ତୁ ଓଡ଼ିଶା ଖବର

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV