ଅନ୍ଧକାର ଗଳିରୁ ଆଲୋକିତ ପଥ ପର୍ଯ୍ୟନ୍ତ । ଗୋପାଳପୁର ପୋର୍ଟ ସମୀବର୍ତ୍ତୀ ଆର୍ଯ୍ୟପଲ୍ଲୀ ପଞ୍ଚାୟତର ଓଡ଼ିଶା ଡିଜାଷ୍ଟର ରିକଭରି ପ୍ରୋଜେକ୍ଟ, ଅର୍ଥାତ୍ ODRP କଲୋନୀରେ ଏବେ ଦେଖିବାକୁ ମିଳୁଛି ସ୍ପଷ୍ଟ ପରିବର୍ତ୍ତନ । Adani Foundation ପକ୍ଷରୁ ଲଗାଯାଇଥିବା ସୋଲାର୍ ଷ୍ଟ୍ରିଟ୍ ଲାଇଟ୍ ଏହି ଅଞ୍ଚଳରେ ନୂଆ ଆଶାର ଆଲୋକ ଜଳାଇଛି ।

ସାଇକ୍ଲୋନ୍ ପୀଡ଼ିତ ପରିବାରମାନଙ୍କୁ ପୁନର୍ବାସ କରିବା ପାଇଁ ଗଠିତ ଏହି ODRP କଲୋନୀରେ ପ୍ରାୟ ୮୦୦ଟି ପରିବାର ଓ ୩ ହଜାରରୁ ଅଧିକ ଲୋକ ବସବାସ କରୁଛନ୍ତି । କଲୋନୀ ଭିତରେ ପ୍ରାୟ ୩ କିଲୋମିଟର ରାସ୍ତା ଏବଂ ମାଛ ଧରା ଘାଟ ପର୍ଯ୍ୟନ୍ତ ୨ କିଲୋମିଟର ରାସ୍ତାରେ ପ୍ରାୟ ୧୦୦ଟି ଆଧୁନିକ ସୋଲାର୍ ଷ୍ଟ୍ରିଟ୍ ଲାଇଟ୍ ଲଗା ଯାଇଛି ।

ଏହି ପ୍ରକଳ୍ପ Adani Gopalpur Port ର CSR କାର୍ଯ୍ୟକ୍ରମ ଅଧୀନରେ କରାଯାଇଛି । ଏହା ମାଧ୍ୟମରେ ଗ୍ରାମୀଣ ଅଞ୍ଚଳରେ ସୁରକ୍ଷା ଓ ପରିବେଶ ସମ୍ବଳିତ ଉନ୍ନତିକୁ ଗୁରୁତ୍ୱ ଦିଆଯାଇଛି ।

ପୂର୍ବରୁ ଅପର୍ଯ୍ୟାପ୍ତ ଆଲୋକ ବ୍ୟବସ୍ଥା ଯୋଗୁ ମାଛ ଧରାଳିମାନେ ଭୋର ସମୟରେ ଘାଟକୁ ଯିବାବେଳେ ଅସୁବିଧା ଭୋଗୁଥିଲେ । ସେହିପରି ମହିଳାମାନେ ସନ୍ଧ୍ୟା ପରେ ପାଣି ଆଣିବାକୁ ଯିବାକୁ ଭୟ କରୁଥିଲେ । ଅନ୍ଧକାର ଯୋଗୁ ଚୋରି ଓ ସାପ ଭୟ ମଧ୍ୟ ବଢ଼ିଥିଲା । ଆଉ ଏବେ ସୋଲାର୍ ଲାଇଟ୍ ଲାଗିବା ପରେ ପରିସ୍ଥିତିରେ ସୁଧାର ଆସିଛି । ବିଦ୍ୟୁତ ବିଚ୍ଛିନ୍ନ ହେଲେ ମଧ୍ୟ ଏହି ଲାଇଟ୍ ଚାଲୁ ରହୁଥିବାରୁ ଲୋକମାନେ ନିର୍ଭୟରେ ଯାତାୟାତ କରୁଛନ୍ତି ।

ସ୍ଥାନୀୟ ଛାତ୍ର ଶ୍ରୀରାମ କହିଛନ୍ତି, “ଏବେ ଆମେ ସନ୍ଧ୍ୟାବେଳେ ନିରାପଦ ଭାବେ ସାଇକେଲ୍ ଚଳାଇ ପାଠ ପଢିବାକୁ ଯାଇପାରୁଛୁ ଏବଂ ରାସ୍ତା ଆଲୋକରେ ଖେଳିପାରୁଛୁ ।”

ସ୍ଥାନୀୟ ବାସିନ୍ଦା ଲିଙ୍ଗରାଜ ବେହେରା କହିଛନ୍ତି, “ପୂର୍ବରୁ ଅନ୍ଧାରର ସୁଯୋଗ ନେଇ ଚୋରମାନେ ବାଇକ୍ ଓ ତେଲ ଚୋରି କରୁଥିଲା । କିନ୍ତୁ ଏବେ ରାସ୍ତା ଆଲୋକିତ ହେବାରୁ ଆମେ ନିରାପଦ ଅନୁଭବ କରୁଛୁ ।” ସେହିପରି ଜଣେ ମହିଳା କରମ୍ମା କହିଛନ୍ତି, “ଅନ୍ଧକାରରେ ପାଣି ଆଣିବା କଷ୍ଟକର ଥିଲା । ଏବେ ଆମେ ନିର୍ଭୟରେ ଯାଇପାରୁଛୁ। ଏହି ପ୍ରୟାସ ଆମ ଜୀବନକୁ ଆଲୋକିତ କରିଛି।”

ଆର୍ଯ୍ୟପଲ୍ଲୀର ODRP କଲୋନୀରେ ସୋଲାର୍ ଷ୍ଟ୍ରିଟ୍ ଲାଇଟ୍ ଏବେ କେବଳ ଆଲୋକ ନୁହେଁ ବରଂ ଉନ୍ନତି ଓ ବିକାଶର ଏକ ପ୍ରତୀକ ଭାବେ ପରିଚିତ ହେଉଛି ।