ଭୁବନେଶ୍ଵର: ୧୦ ଦିନ ଗୃହକୁ ଚଳାଇ ଦେଲେନି, ଏବେ ନିଲମ୍ବିତ ପରେ ବାଚସ୍ପତିଙ୍କ ନିର୍ଦ୍ଦେଶ ବି ମାନୁ ନାହାନ୍ତି କଂଗ୍ରେସ । ନିଲମ୍ବନ ପରେ କଂଗ୍ରେସର ୧୨ ବିଧାୟକ ବିଧାନସଭା ଗୃହରୁ ବାହାରି ନଥିବା ବେଳେ ଅସ୍ଵାଭାବିକ ସ୍ଥିତି ସୃଷ୍ଟି ହୋଇଛି । କଂଗ୍ରେସ ବିଧାୟକ ଗୃହ ଭିତରେ ଧାରଣା ଦେଇଥିବା ବେଳେ ସୁରକ୍ଷାକର୍ମୀଙ୍କ ସହ ମୁହାଁମୁହିଁ ହୋଇଥିବା ସୂଚନା ମିଳିଛି ।

ସୁରକ୍ଷାକର୍ମୀ ଲବି ଗେଟ୍ ବନ୍ଦ କରିବା ବେଳେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିବା କୁହାଯାଉଛି । କଂଗ୍ରେସର ୧୨ ବିଧାୟକଙ୍କୁ ଗୃହରୁ ୭ ଦିନ ଲାଗି ବାଚସ୍ପତି ନିଲମ୍ବିତ କରିଛନ୍ତି । ଗୃହରେ ବିଶୃଙ୍ଖଳିତ ଆଚରଣ ଲାଗି ବାଚସ୍ପତି, କଂଗ୍ରେସର ୧୨ ବିଧାୟକଙ୍କୁ ମଙ୍ଗଳବାର ଅପରାହ୍ଣରେ ନିଲମ୍ବିତ କରିଥିଲେ । ନିଲମ୍ବନ ପ୍ରତିବାଦରେ କଂଗ୍ରେସ ବିଧାୟକ ଗୃହରେ ଧାରଣା ଦେଇଛନ୍ତି ।

ବିଧାନସଭା ଭିତରେ କଂଗ୍ରେସ ବିଧାୟକ ଧାରଣା ଦେଇଥିବା ବେଳେ ଦଳର ଏକାଧିକ ବରିଷ୍ଠ ନେତା ବିଧାନସଭା ବାହାରେ ପହଞ୍ଚିଛନ୍ତି । ପିସିସି ସଭାପତି ଭକ୍ତ ଦାସଙ୍କ ସହ ବରିଷ୍ଠ ନେତା ନିରଞ୍ଜନ ପଟ୍ଟନାୟକ, ନରସିଂହ ମିଶ୍ର, ଶରତ ରାଉତ ପ୍ରମୁଖ ବିଧାନସଭା ଆଗରେ ପହଞ୍ଚିଛନ୍ତି । ବିଧାନସଭା ଭିତରକୁ ଯିବାକୁ ଅଡ଼ି ବସିଛନ୍ତି କଂଗ୍ରେସ ନେତା । ମୁହାଁମୁହି ସ୍ଥିତି ସୃଷ୍ଟି ହେବା ପରେ ପୋଲିସ କଂଗ୍ରେସ କର୍ମୀଙ୍କୁ ଉଠାଇ ନେଇଛି । ସୂଚନା ଯୋଗ୍ୟ, ବିଧାନସଭା ଅଧିବେଶନ ସମୟରେ ୧୬୩ ଧାରା ଜାରି କରାଯାଇ ଥାଏ ।

Argus News | argus news | Odisha Latest News, Breaking News, Trending News, Live TV