ଅର୍ଗସ ବ୍ୟୁରୋ: ଅସହ୍ୟ ହେଲା ନିର୍ଯାତନା । ଦାଦନ ଖଟିବାକୁ ଯାଇ ପ୍ରାଣ ହରାଇଲେ ଆଉ ଜଣେ ଓଡ଼ିଆ । ବାପର ମୃତ୍ୟୁ ପରେ ଝିଅକୁ ବନ୍ଧକ ରଖି ଟଙ୍କା ମାଗୁଛି ଇଟା ଭାଟି ମାଲିକ । ୫୦ ହଜାର ଟଙ୍କା ଦେବା ପରେ ବି ଛାଡୁ ନଥିବା ଅଭିଯୋଗ । ଝିଅକୁ ଉଦ୍ଧାର ସହ ଦାଦନ ସର୍ଦ୍ଦାରକୁ ଗିରଫ ଓ ପରିବାରକୁ କ୍ଷତିପୂରଣ ଦାବିରେ ମୃତଦେହ ରଖି ଧାରଣା ଦେଇଛନ୍ତି ପରିବାର ଲୋକେ । ରାଜ୍ୟ ସରକାର ତୁରନ୍ତ ଦାବି ନ ମାନିଲେ ବେଲପଡ଼ା ବ୍ଲକ କାର୍ଯ୍ୟାଳୟ ଘେରାଉ କରିବାକୁ ଚେତାବନୀ ଦେଲା କୋଶଳ ମୁକ୍ତି ମୋର୍ଚ୍ଚା ।

ବଲାଙ୍ଗିର ବେଲପଡ଼ ବ୍ଲକ ସୁଲେକେଲାରୁ ଆସିଲା ଦାଦନ ଯନ୍ତ୍ରଣାର କରୁଣ କାହାଣୀ । ଅଭାବ ଦୂର କରିବାକୁ ପରିବାର ସହ ତେଲେଙ୍ଗାନାକୁ ଦାଦନ ଖଟି ଯାଇଥିଲେ କାହ୍ନୁ ମଲ୍ଲିକ । ଇଟା ଭାଟିରେ କାମ କରୁଥିବା ବେଳେ ମାଲିକ ନିର୍ଯାତନା ଦେଉଥିଲା । ଦେହ ଅସୁସ୍ଥ ହେବା ପରେ ମଧ୍ୟ ଭାଟିରେ କାମ କରିବାକୁ ବାଧ୍ୟ କରାଯାଉଥିଲା । ଗୁରୁତର ହେବା ପରେ ଭାଟି ମାଲିକ ତାଙ୍କୁ ଘରକୁ ପଠାଇ ଦେଇଥିଲା । ଆଉ ଘରେ ପହଞ୍ଚିବା ପରେ କାହ୍ନୁଙ୍କର ମୃତ୍ୟୁ ହୋଇଛି । ଏବେ ତାଙ୍କ ଝିଅକୁ ବନ୍ଧକ ରଖି ପରିବାର ଲୋକଙ୍କୁ ଟଙ୍କା ମାଗୁଛି ଇଟା ଭାଟି ମାଲିକ ।

ଏଠି ପ୍ରଶ୍ନ ଉଠୁଛି, ମାଳ ମାଳ ସରକାରୀ ଯୋଜନା ସତ୍ବେ କାହିଁକି ବାହାର ରାଜ୍ୟକୁ ଯାଉଛନ୍ତି ଓଡ଼ିଆ ? କେବେ ନିଜ ଅଞ୍ଚଳରେ କାମ ପାଇବ ଓଡ଼ିଆ ଶ୍ରମିକ ? 24 ବର୍ଷର ବିଜେଡି ସରକାରରେ ଏହା ବିଫଳତା ନୁହଁ କି ? ଆଉ କେତେ ଓଡ଼ିଆଙ୍କ ଯନ୍ତ୍ରଣାଦାୟକ ମୃତ୍ୟୁ ପରେ ଖୋଲିବ ରାଜ୍ୟ ସରକାରଙ୍କ ଆଖି ? ଏହା 24 ବର୍ଷର ବିଜେଡି ସରକାରର ପୁରୁଷାର୍ଥ ଉପରେ ଉଠାଇଛି ପ୍ରଶ୍ନ ।

ଅଧିକ ପଢ଼ନ୍ତୁ ଓଡିଶା ଖବର:

Argus News | argus news | -Argusnews Home: Odisha Latest News, Breaking News, Trending News, Live TV and more