ଅର୍ଗସ ବ୍ୟୁରୋ:  ଆଜି ପବିତ୍ର ଅଁଳା ନବମୀ ପାଇଁ ଚଳଚଞ୍ଚଳ ସାକ୍ଷୀଗୋପାଳ ମନ୍ଦିର । ଭକ୍ତଙ୍କୁ ଓଡ଼ିଆଣୀ ବେଶରେ ଦର୍ଶନ ଦେଉଛନ୍ତି ମାଆ ରାଧାରାଣୀ । କାଣିଆ କଛା ମାରି ଲକ୍ଷାଧିକ ଶ୍ରଦ୍ଧାଳୁଙ୍କୁ ଦର୍ଶନ ଦେଉଛନ୍ତି ମା'। ବର୍ଷକୁ ଥରେ ରାଧାପାଦ ଦର୍ଶନ ପାଇଁ ଲାଗିଛି ଭକ୍ତଙ୍କ ଭିଡ଼ । ସେପଟେ ପ୍ରଭୁ ସାକ୍ଷୀଗୋପାଳଙ୍କ ନଟବର ବେଶ ଦେଖି କୃତାର୍ଥ ହେଉଛନ୍ତି ଭକ୍ତ ଓ ଶ୍ରଦ୍ଧାଳୁ । ତେବେ ୨୦୧୯ ପରଠୁ ରାଧାପାଦ ସ୍ପର୍ଶ ମନା ହୋଇଥିବାରୁ କେବଳ ଦର୍ଶନ ସହ ଅଁଳା ଗଛରେ ମାନସିକ ଡୋରି ବାନ୍ଧୁଛନ୍ତି ଶ୍ରଦ୍ଧାଳୁ । 

ଅଧିକ ପଢନ୍ତୁ: ମୋଗଲ ଆତଙ୍କ ବେଳେ ଦିନେ ଏଇଠି ପୂଜା ପାଉଥିଲେ ସାକ୍ଷୀଗୋପାଳ

ମାଆ ରାଧାରାଣୀଙ୍କ ପୂରାଣ ଅନୁସାରେ ଭକ୍ତ ପାଇଁ ସାକ୍ଷୀ ଦେବାକୁ ବୃନ୍ଦାବନରୁ ଆସି ଏହି ଠାରେ ରହିଯାଇଥିଲେ ପ୍ରଭୁ ଗୋପାଳ । କିନ୍ତୁ ରାଧାଙ୍କ ବିନା ଅଧା ଥିଲେ ପ୍ରଭୁ । ତେଣୁ ସାକ୍ଷୀଗୋପାଳ ମନ୍ଦିରର ବଡପଣ୍ଡା ବେଲେଶ୍ବର ମହାପାତ୍ରଙ୍କ କନ୍ୟା ରୂପେ ଜନ୍ମ ହୋଇଥିଲେ ମାଆ ଲକ୍ଷ୍ମୀ । ସେହିଦିନୁ ମାଆ ରାଧା ରୂପରେ ପୂଜା ପାଉଛନ୍ତି । ସବୁଠି ରାଧାକୃଷ୍ଣଙ୍କ ଯୁଗଳ ମୂର୍ତ୍ତି ଥିବାବେଳେ ଏଠାରେ ସାକ୍ଷୀଗୋପାଳଙ୍କ ପାର୍ଶ୍ବରେ ରହିଛନ୍ତି ଶ୍ରୀ ରାଧା ।  

ଓଡ଼ିଆ ଘରର କନ୍ୟା ହୋଇଥିବାରୁ ଓଡ଼ିଆଣୀ ବେଶରେ ବର୍ଷକୁ ଥରେ ଦର୍ଶନ ଦେଉଛନ୍ତି ମାଆ । ଏହି ଦୁର୍ଲଭ ଦର୍ଶନ ପାଇଁ ପୁରୀ ସାକ୍ଷୀଗୋପାଳ ମନ୍ଦିରରେ ଲାଗିଛି ଭକ୍ତଙ୍କ ପ୍ରବଳ ଗହଳି । ତେବେ ଭକ୍ତଙ୍କ ସୁରକ୍ଷା ଲାଗି ବ୍ୟାପକ ବ୍ୟବସ୍ଥା କରିଛି ପୁରୀ ପୋଲିସ । ୨୦ ପ୍ଲାଟୁନ ଫୋର୍ସ ମୃତୟନ ସହ ବ୍ୟାରିକେଟ୍ ବ୍ୟବସ୍ଥା ହୋଇଛି । ସିଂଘଦ୍ବାର ଦେଇ ମନ୍ଦିର ଭିତରକୁ ପ୍ରବେଶ କରୁଛନ୍ତି ଭକ୍ତ ।

ଧର୍ମ ଓ ସଂସ୍କୃତି ଖବର ଆହୁରି ପଢନ୍ତୁ