ଅର୍ଗସ ବ୍ୟୁରୋ: ଆଉ କିଛି ଦିନ ପରେ ଧରାବତରଣ କରିବେ ମା ଦୁର୍ଗା l ପ୍ରତିବର୍ଷ ଭଳି ଏ ବର୍ଷ ବି ଖଡ଼ିଆଳରେ ଜମିବ ଦୁର୍ଗାପୂଜା l ଶାରଦୀୟ ଦୁର୍ଗାପୂଜା ପ୍ରସ୍ତୁତି ନେଇ ଚଳଚଞ୍ଚଳ ଐତିହାସିକ ଖଡ଼ିଆଳ l ସହରର ପଟ୍ଟନାୟକ ପଡା ଦୁର୍ଗାପୂଜା କମିଟି ଆକର୍ଷଣୀୟ ତୋରଣ ସାଜ ସଜ୍ଜା ନେଇ ବେଶ ପ୍ରସିଦ୍ଧ ଥିବା ବେଳେ ଚଳିତ ବର୍ଷ ମଧ୍ୟ ଲୋକଙ୍କ ମନ କିଣିଲା ଭଲି ତୋରଣ ତିଆରିରେ ଅଣ୍ଟା ଭିଡିଛି l ଦିନ ରାତି ଏକ କରି କାରିଗରମାନେ ତୋରଣ ଏବଂ ମାଙ୍କ ମୃଣ୍ମୟ ମୂର୍ତ୍ତି ତିଆରି କରିବାରେ ବ୍ୟସ୍ତ l

ଖଡ଼ିଆଳ ସହରର ସମଲେଶ୍ବରୀ ମନ୍ଦିର ନିକଟରେ 1952 ମସିହାରୁ ପୂଜା କରି ଆସୁଥିବା ରାଜାପଡା ଦୁର୍ଗାପୂଜା କମିଟି ମଧ୍ୟ ପ୍ରସ୍ତୁତିକୁ ଜୋରଦାର କରିଛନ୍ତି l ଏଠାରେ ବାହାର ଜିଲ୍ଲାର କାରିଗର ଆସି ମାଙ୍କ ମୂର୍ତ୍ତି ତିଆରି କରୁଥିବା ବେଳେ ଏଠାରେ ମାଙ୍କୁ ରୁପା ଅଳଙ୍କାର ପରିଧାନ କରାଯାଏ l ସେହିପରି ସିନାପାଲି, ବୋଡେ଼ନ ସହର ସମେତ ତୁକୁଳା, ଟିମନପୁର, ଗଣ୍ଡାବାହାଳି ଭଲି ଅନେକ ଗାଁର ଦୁର୍ଗାପୂଜା ପ୍ରସ୍ତୁତିକୁ ଜୋରଦାର କରିଛି ପୂଜା କମିଟି l ନବରାତ୍ର ପୂଜା ପାଇଁ ବିଭିନ୍ନ ମନ୍ଦିର, ଶକ୍ତି ପୀଠ, ଦେବୀ ମନ୍ଦିରରେ ମଧ୍ୟ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି l ଦଶ ଦିନ ଧରି ଖଡ଼ିଆଳ ଅଞ୍ଚଳରେ ଦୁର୍ଗାପୂଜାକୁ ଉପଭୋଗ କରିବା ପାଇଁ ଅପେକ୍ଷାରେ ଅଞ୍ଚଳବାସୀ l

ଅଧିକ ପଢ଼ନ୍ତୁ ଓଡିଶା ଖବର:

Argus News | argus news | -Argusnews Home: Odisha Latest News, Breaking News, Trending News, Live TV and more