ଅର୍ଗସ ବ୍ୟୁରୋ : ଆରମ୍ଭ ହୋଇଛି ୩୦ ତମ ମା' ଅନ୍ଧାରୀଙ୍କ ପାହାଡ ଯାତ୍ରା । ବନ ସୁରକ୍ଷା ସଚେତନତାର ନିଆରା ପରମ୍ପରା ଭାବେ ଏହି ଯାତ୍ରା ସମଗ୍ର ରାଜ୍ୟରେ ପରିଚିତ ରହିଥିବା ବେଳେ ନିରାଡାମ୍ବର ଭାବେ ପ୍ରତ୍ୟେକ ବର୍ଷ ଏହି ଯାତ୍ରା ଗୋପାଷ୍ଟମି ଓ ଅଁଳା ନବମୀରେ ଦୁଇ ଦିନ ଧରି ଏହି ଯାତ୍ରା ହୋଇଥାଏ । ଏହି ଯାତ୍ରାକୁ ୩୦ ବର୍ଷ ପୂର୍ବେ ୧୯୯୪ ମସିହାରେ ଲଇକେରା ବ୍ଲକ କୁଆଁରମାଲର ସମାଜ ସେବୀ ସୁବ୍ରତ ନାଏକ ଆରମ୍ଭ କରିଥିଲେ । ଯାହା ଝାରସୁଗୁଡ଼ା ଜିଲ୍ଲା ଲଇକେରା ବ୍ଲକରେ ଏହି ଯାତ୍ରା ସମଗ୍ର ପଶ୍ଚିମ ଓଡ଼ିଶା ରେ ପ୍ରସିଦ୍ଧି ଲାଭ କରିଛି ।

ପାହାଡ଼ର ପ୍ରାୟ ୨୦ କିମି ପରିଧିରେ ରହିଥିବା ୧୫ଟି ଗାଁର ବନ ସୁରକ୍ଷା ସମିତିକୁ ନେଇ ଗଠିତ ମା’ ଅନ୍ଧାରୀ ବନ ସୁରକ୍ଷା ମହାସଂଘର ନିଷ୍ଠା ଦ୍ୱାରା ସୃଷ୍ଟି ହୋଇପାରିଛି ଅନ୍ଧାରୀ ପ୍ରାକୃତିକ ଜଙ୍ଗଲ । ଏହି ଜଙ୍ଗଲରୁ ପ୍ରତିଫଳିତ ସୂର୍ଯ୍ୟାଲୋକର ହସରେ ପ୍ରତି ବର୍ଷ ଆଖପାଖ ଅଂଚଳବାସୀ ସାମିଲ ହେଉଛନ୍ତି । ବିଭିନ୍ନ ପ୍ରାନ୍ତରୁ ଲୋକମାନେ ଆସି ପାହାଡ଼ ସଂରକ୍ଷଣର ବାର୍ତ୍ତା ଦେଉଛନ୍ତି । ସ୍ଥାନୀୟ ଲୋକଙ୍କ ହସଖୁସିରେ ସାମିଲ ହେଉଛନ୍ତି ।

ଦୁଇ ଦିନ ପାଇଁ ପ୍ରତି ବର୍ଷ ଏହି ଯାତ୍ରା ଲୋକଙ୍କ ଜୀବନରେ ଆଣି ଦେଉଛି ହସଖୁସି, ଆନନ୍ଦ । ପାହାଡ଼ ତଥା ଜଙ୍ଗଲ ସଂରକ୍ଷଣ ଭଳି ଏକ ମହତ ଉଦ୍ଦେଶ୍ୟ ସଂପାଦନ ହେଉଥିବାରୁ ସେମାନେ ଉତ୍ସବ ମାଧ୍ୟମରେ ତାହା ପାଳନ କରୁଛନ୍ତି । ବୁଢ଼ାବୁଢ଼ି, ଯୁବକଯୁବତୀ, ପିଲାଛୁଆ ସବୁ ବର୍ଗର ଲୋକମାନେ ପାହାଡ଼ ଚଢ଼ୁଛନ୍ତି । ଏହାଦ୍ୱାରା ଆଧୁନିକତା ଓ ପ୍ରକୃତିର ଏକ ନିଆରା ସହାବସ୍ଥାନ ଦେଖିବାକୁ ମିଳୁଛି ।

ଲୋକଙ୍କ ଆସ୍ଥାକୁ ଆଧାର କରି ବିଗତ ୨୯ ବର୍ଷ ଧରି ଚାଲି ଆସୁଚି ଏହି ପରମ୍ପରା । ଜଙ୍ଗଲ ସଂରକ୍ଷଣ ହିଁ ମା’ ଅନ୍ଧାରୀ ଦେବୀଙ୍କ ପୂଜାର୍ଚନାକୁ ଫଳବତୀ କରିବ ବୋଲି ଲୋକଙ୍କ ମନରେ ବିଶ୍ୱାସ ଜନ୍ମିଥିଲା । ପ୍ରାକୃତିକ ଜଙ୍ଗଲର ସୁରକ୍ଷାରୁ ମିଳୁଥିବା ଆନନ୍ଦକୁ ପ୍ରତିବର୍ଷ ଅଞ୍ଚଳବାସୀ ଅନ୍ଧାରୀ ଯାତ୍ରା ମାଧ୍ୟମରେ ପାଳନ କରି ଆସୁଛନ୍ତି ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV