ଅର୍ଗସ ବ୍ୟୁରୋ: ବୟସ ସିନା କମ ହେଲେ କାମ ତାଙ୍କର କମାଲ । ଛୋଟ ବୟସରୁ ବଡ଼ କାମ କରି ପ୍ରଶଂସା ସାଉଣ୍ଟିଛନ୍ତି କଳିଙ୍ଗ ନଗର ଡିଏଭି ପବ୍ଲିକ ସ୍କୁଲ୍କର ଏକାଦଶ ଶ୍ରେଣୀର ଛାତ୍ର ଆୟୁଷ୍ମାନ ସାହୁ । ଆୟୁଷ୍ମାନଙ୍କ ନୂଆ ଉଦ୍ଭାବନ ଯେତିକି ଶସ୍ତା ସେତିକି ପ୍ରଭାବୀ । ୧୫୦୦ ଟଙ୍କା ଖର୍ଚ୍ଚ କରି ସେ ତିଆରି କରିଛନ୍ତି ବୁଲା ଗାଈଗୋରୁ ଓ ଗୃହପାଳିତ ଜନ୍ତୁଙ୍କ ପାଇଁ ଅଭିନବ ଏକ ବେଲ୍ଟ । ପଶୁଙ୍କ ବେକରେ ଏହି ବେଲ୍ଟ ବାନ୍ଧି ଦିଆଗଲେ ତାହା ସେମାନଙ୍କ ପାଇଁ ସୁରକ୍ଷା କବଚ ପରି କାମ ଦେଉଛି।
ଅନ୍ଧାର ରାତିରେ ସେମାନଙ୍କ ବେକରେ ଥିବା ବେଲ୍ଟରେ ଜଳି ଉଠୁଛି ଏକ ଏଲଇଡି ଲାଇଟ । ଏହି ଲାଇଟ ଦେଖି ଗାଡି ଚାଳକ ସତର୍କ ହେଲେ ଟାଳି ହେବ ସଡକ ଦୁର୍ଘଟଣା ଓ ହ୍ରାସ ପାଇବ ଗାଈଗୋରୁ ଓ କୁକୁରଙ୍କ ମୃତ୍ୟୁ ସଂଖ୍ୟା । ତଥାପି ଯଦି ଦୁର୍ଘଟଣା ଘଟେ ତେବେ ବେଲ୍ଟରେ ଲାଗିଥିବା ଡିଭାଇସ ଦୁର୍ଘଟଣା ସ୍ଥଳୀର ସ୍ଥାନ ଓ ସୂଚନା ପୋଲିସ ,ଅଗ୍ନିଶମ ଓ ବିଭାଗୀୟ ହସ୍ପିଟାଲକୁ ତତ୍କାଳ ପଠାଇ ଦେବ । କେବଳ ଏତିକି ନୁହଁ ଯଦି ଏହି ବେଲ୍ଟ ଜୀବଜନ୍ତୁଙ୍କ ବେକରେ ଥିବ ତେବେ ଏଥିରୁ ତାର ପାଳକ ସବିଶେଷ ସ୍ୱାସ୍ଥ୍ୟ ସୂଚନା ପାଇବାରେ ସକ୍ଷମ ହୋଇପାରିବ ବୋଲି କହିଛନ୍ତି ଆୟୁଷ୍ମାନ । ଏଭଳି କାମରେ ପୁଅକୁ ସବୁ ପ୍ରକାର ସହଯୋଗ ଦିଆଯାଉଥିବା କହିଛନ୍ତି ତାଙ୍କର ପିତା ଡ଼କ୍ଟର ରଞ୍ଜନ କୁମାର ସାହୁ

ଆୟୁଷ୍ମାନଙ୍କ ଆଉ ଏକ ଉଦ୍ଭାବନ ହେଉଛି ପାୱାର ପ୍ୟାଡଲ ପ୍ରୋ । ପାରମ୍ପରିକ ସାଇକେଲର ଉପକରଣ ଏକାଠି କରି ସେ ସାଇକେଲକୁ ଦେଇଛନ୍ତି ଭିନ୍ନ ଏକ ରୂପ । ଏହା ପାୱାର ଏବଂ ପେଡାଲ ଉଭୟ ଶକ୍ତିରେ ଗଡୁଛି । ବ୍ୟାଟେରୀ ସହିତ ମୋଟର ସଂଯୁକ୍ତ ହୋଇଥିବାରୁ ଘଣ୍ଟା ପ୍ରତି ୩୦/୪୦ କିଲୋମିଟର ବେଗ ଧରୁଛି । ଇ ସାଇକେଲ ଠାରୁ ଏହା ଯଥେଷ୍ଟ ଶସ୍ତା ଓ ପ୍ରଭାବୀ । ଗୋଟିଏ ଇ ସାଇକେଲର ବଜାର ଦାମ ୨୫ ହଜାର ଟଙ୍କାରୁ କମ ନ ଥିବା ବେଳେ ଆୟୁଷ୍ମାନ ଏହି ପାୱାର ସାଇକେଲକୁ ୭୫୦୦ ଟଙ୍କା ଖର୍ଚ୍ଚ କରି ତିଆରି କରିଛନ୍ତି । ଦଶମ ଶ୍ରେଣୀ ପଢ଼ୁଥିବା ବେଳେ ତିଆରି ହୋଇଥିବା ଏହି ସାଇକେଲ ଆଜି ପର୍ଯ୍ୟନ୍ତ ଖରାପ ହୋଇ ନ ଥିବା ଆୟୁଷ୍ମାନ କହିଥିବା ବେଳେ ପୁଅର ଏଭଳି ନବ ସୃଜନରେ ଗୌରବ ଅନୁଭବ କରୁଥିବା କହିଛନ୍ତି ତାଙ୍କର ମା ଓ ସ୍ଥାନୀୟବାସିନ୍ଦା
ନିଜ ପାଇଁ ପାଠ ତ ସମସ୍ତେ ପଢ଼ନ୍ତି ହେଲେ ଆୟୁଷ୍ମାନଙ୍କ ପରି ଖୁବ କମ ବିଦ୍ୟାର୍ଥୀ ଅଛନ୍ତି ଯେଉଁମାନେ ଭଲ ପଢିବା ସହିତ ସମାଜ ପାଇଁ ଅବଦାନ ଦେଇ ପାଲଟନ୍ତି ପ୍ରେରଣା।

ଅଧିକ ପଢ଼ନ୍ତୁ ଓଡ଼ିଶା ଖବର

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV