Baitarani Flood / ବୈତରଣୀ ପାୱାର ପ୍ରୋଜେକ୍ଟର ବେପାରୁଅ କାର୍ଯ୍ୟ, ମନଇଚ୍ଛା ଗେଟ୍ ଖୋଲିବାରୁ ତଳିଆ ଅଞ୍ଚଳରେ ବାରମ୍ବାର ବନ୍ୟା

ବୈତରଣୀରେ ଲଗାତାର ବନ୍ୟା ପଛରେ ବର୍ଷାକୁ କାରଣ ଦର୍ଶା ଯାଉଥିବା ବେଳେ ସାମ୍ନାକୁ ଆସିଛି ଏକ ସାଂଘାତିକ ତ୍ରୁଟି । କେନ୍ଦୁଝରରେ ଥିବା ଏକ ଘରୋଇ ବିଦ୍ୟୁତ କମ୍ପାନୀର ଅବହେଳା ଆଉ ମନମୁଖୀ ବ୍ୟାରେଜ ଗେଟ୍ ଖୋଲିବା ନେଇ ତଳ ମୁଣ୍ଡରେ ଅଧିକ ବନ୍ୟା ହୋଇଛି । ଯାହାକୁ ଗୁରୁତର ଭାବେ ନେଇ ଜଳ ସମ୍ପଦ ବିଭାଗ ସଂପୃକ୍ତ ସଂସ୍ଥାକୁ ସୋ-କଜ୍ ନୋଟିସ୍ ଜାରି କରିଛି । ଆଉ ଉତ୍ତର ସନ୍ତୋଷ ଜନକ ନହେଲେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି SRC । ଏପଟେ ଏମିତି ଅବହେଳାକୁ ନେଇ ରାଜନୀତି ବି ତେଜିଛି ।

ଯାଜପୁରରେ ୩ ଥର, ଭଦ୍ରକରେ ଦୁଇ ଥର । ବୈତରଣୀରେ ବନ୍ୟା ଭାଙ୍ଗି ଦେଇଛି ଦୁଇ ଜିଲ୍ଲାବାସୀଙ୍କ ମେରୁଦଣ୍ଡ । ଆଉ ୟା ଭିତରେ ସାମ୍ନାକୁ ଆସିଛି ଏକ ଘରୋଇ ବିଦ୍ୟୁତ୍ କମ୍ପାନୀର ଚରମ ଅବହେଳା । ଆନନ୍ଦପୁର ବ୍ୟାରେଜରେ 'ବୈତରଣୀ ପାୱାର ପ୍ରୋଜେକ୍ଟସ ପ୍ରାଇଭେଟ ଲିମିଟେଡ୍‌ ମନ ଇଚ୍ଛା ବ୍ୟାରେଜ ଗେଟ୍‌ ଖୋଲିବା ଏବଂ ବନ୍ଦ କରିବା ବନ୍ୟାର ଏକ ପ୍ରମୁଖ କାରଣ ବୋଲି କୁହାଯାଉଛି । ଯାହାକୁ ଅତ୍ୟନ୍ତ ଗମ୍ଭୀରତାର ସହ ନେଇଛି ଜଳସଂପଦ ବିଭାଗ । ଆନନ୍ଦପୁର ବ୍ୟାରେଜ ପ୍ରକଳ୍ପର ମୁଖ୍ୟ ନିର୍ମାଣ ଇଞ୍ଜିନିୟରଙ୍କୁ ଏ ସମ୍ପର୍କରେ ଚିଠି ଲେଖି ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦିଆଯାଇଛି । ଦାୟିତ୍ୱହୀନ ଭାବେ ଗେଟ୍ ପରିଚାଳନା କରିବା ଯୋଗୁଁ କମ୍ପାନୀ ବିରୋଧରେ କାହିଁକି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ, ସେ ନେଇ ସ୍ପଷ୍ଟୀକରଣ ମଗାଯାଇଛି । ସନ୍ତୋଷଜନକ ଉତ୍ତର ନମିଳିଲେ ଦୃଢ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି ଏସଆରସି ।

ବୈତରଣୀରେ କେନ୍ଦୁଝର ସିଂହନାଳୀଠାରେ ରହିଛି ବୈତରଣୀ ପାୱାର ପ୍ରୋଜେକ୍ଟ । ଏଠି ରହିଛି ୧୩ଟି ଗେଟ୍ । ଗତ ଜୁଲାଇ ୨୭ରେ ପ୍ରବଳ ବର୍ଷା ପାଇଁ କେନ୍ଦୁଝର ଜିଲ୍ଲାକୁ ପାଣିପାଗ ବିଭାଗ ରେଡ୍ ଆଲର୍ଟ ଜାରି କରିଥିଲା । କିନ୍ତୁ ପାୱାର ପ୍ରୋଜେକ୍ଟ ଏବଂ ବ୍ୟାରେଜ ପକ୍ଷରୁ ଜଳ ନିଷ୍କାସନ କରାଯାଇ ନ ଥିଲା । ଫଳରେ ୨୮ ତାରିଖ ଲଗାଣ ବର୍ଷା ଯୋଗୁଁ ସମସ୍ତ ଗେଟ୍ ଖୋଲି ଦିଆଯାଇଥିଲା । ଫଳରେ ହଠାତ୍ ନଦୀର ଜଳସ୍ତର ବିପଦ ସଂକେତଠାରୁ ବହୁ ଉର୍ଦ୍ଧ୍ବରେ ଅର୍ଥାତ୍ ୪୦ ମିଟର ଉପରେ ପ୍ରବାହିତ ହୋଇଥିଲା । ଏହା ଦ୍ବାରା ଆନନ୍ଦପୁର ରିଙ୍ଗ ରୋଡରେ ଘାଇ ହୋଇ ଆନନ୍ଦପୁର ଉପଖଣ୍ଡ ହାଟଡିହି, ଘଷିପୁରା, ଆନନ୍ଦପୁର ବ୍ଲକର କିଛି ପଞ୍ଚାୟତରେ ବନ୍ୟାଜଳ ପ୍ରଶିଥିଲା । ଏହି ପ୍ରସଙ୍ଗ ନେଇ ରାଜନୀତି ବି ତେଜିଛି ।

ଯଦିଓ ବୈତରଣୀରେ ବାରମ୍ବାର ବନ୍ୟା ପଛରେ ଅଧିକ ପରିମାଣର ବର୍ଷା, ତୁହାକୁ ତୁହା ଲଘୁଚାପକୁ ବି ଦାୟୀ କରାଯାଉଛି । କିନ୍ତୁ ଘରୋଇ ସଂସ୍ଥାର ଚରମ ଅବହେଳା ବି ଅନେକ ମାତ୍ରାରେ ଦାୟୀ । ତେବେ ସୋ-କଜ୍‌ ନେଇ ସଂପୃକ୍ତ ସଂସ୍ଥା ଉତ୍ତର ରଖିବା ପରେ କ'ଣ କାର୍ଯ୍ୟାନୁଷ୍ଠାନ ନିଆଯାଉଛି ତା' ଉପରେ ନଜର ରହିଛି ।