Businessman Kidnapping / ବଲାଙ୍ଗିରରେ ବ୍ୟବସାୟୀଙ୍କୁ ଅପହରଣ; ଭୁବନେଶ୍ଵରରୁ ମହିଳା ପୋଲିସ SIଙ୍କ ସହ ସାମ୍ବାଦିକ ଗିରଫ

ବଲାଙ୍ଗିର: ବ୍ୟବସାୟୀ ନରେନ୍ଦ୍ର ସାହୁଙ୍କୁ ଅପହରଣ ମାମଲା । ବଢ଼ିଲା ଗିରଫଦାରୀ । ଭୁବନେଶ୍ଵରରୁ ବଲାଙ୍ଗିର ପୋଲିସ ଆଉ ୨ ଜଣଙ୍କୁ ଗିରଫ କରିଛି । ମହିଳା ପୋଲିସ ଏସ୍ଆଇ ସ୍ନେହା ମଞ୍ଜରୀ ସାହୁଙ୍କ ସହ ସାମ୍ବାଦିକ ସଞ୍ଜୟ ଜେନାଙ୍କୁ ଗିରଫ କରିଛି ବଲାଙ୍ଗିର ପୋଲିସ ।

ମିଳିଥିବା ସୂଚନା ଅନୁସାରେ, ମୁଖ୍ୟ ଅଭିଯୁକ୍ତ କ୍ଷିତୀଶର ଭଉଣୀ ହେଉଛନ୍ତି ସବ୍ ଇନ୍ସପେକ୍ଟର ସ୍ନେହା ମଞ୍ଜରୀ ସାହୁ । ବଲାଙ୍ଗିରରୁ ବ୍ୟବସାୟୀ ନରେନ୍ଦ୍ର ସାହୁଙ୍କୁ ଅପହରଣ ପରେ ତାଙ୍କୁ ଭୁବନେଶ୍ଵର ଅଣା ଯାଇଥିଲା । ଏଥିରେ SI ଜଣଙ୍କ ସହ ଓ ସାମ୍ବାଦିକଙ୍କ ପ୍ରମୁଖ ଭୂମିକା ରହିଥିବା ପୋଲିସ ହାତରେ ପ୍ରମାଣ ଲାଗିଛି ।

ଏଥିସହ ପଢ଼ନ୍ତୁ: ଶୋଇଥିବା ବେଳେ କାନ୍ଥ ଭୁଶୁଡ଼ି ଆଈ, ନାତି ମୃତ; ନାତୁଣୀ ଗୁରୁତର 

ଉଭୟଙ୍କୁ ଗିରଫ ପରେ ପୋଲିସ ବଲାଙ୍ଗିର ନେଇ ଯାଇଛି । ସେପଟେ ଗିରଫ ହୋଇଥିବା ମାଷ୍ଟରମାଇଣ୍ଡ କ୍ଷିତୀଶ ସାହୁ ରହୁଥିବା ଘରୋଇ ହୋଟେଲରେ ରେଡ୍ କରି ସିସିଟିଭି ହାର୍ଡଡିସ୍କ ଜବତ କରିଛି ପୋଲିସ । କ୍ଷିତୀଶ ଉକ୍ତ ହୋଟେଲରେ ନିୟମିତ ରହୁଥିଲା ।

ଆଜି ପୋଲିସ କ୍ଷିତୀଶକୁ କୋର୍ଟ ଚାଲାଣ କରିବ । କ୍ଷିତୀଶର ସହଯୋଗୀ ସଞ୍ଜିତ ବେହେରାକୁ ମଧ୍ୟ କୋର୍ଟ ଚାଲାଣ କରାଯିବ । ଅପହରଣ ଘଟଣାର ଗୁରୁତ୍ଵକୁ ଦେଖି ରବିବାର ସନ୍ଧ୍ୟାରେ ବଲାଙ୍ଗିର ଏସ୍‌ପି ଅଫିସରେ ପହଞ୍ଚି ତଦନ୍ତର ସମୀକ୍ଷା କରିଥିଲେ ଉତ୍ତରାଞ୍ଚଳ ଆଇଜି ହିମାଂଶୁ ଲାଲ ।

ଅଭିଯୋଗକାରୀ ଓ ଅଭିଯୁକ୍ତଙ୍କୁ ପଚରାଉଚରା କରି ଘଟଣାର ବିଭିନ୍ନ ଦିଗ ଉପରେ ତଥ୍ୟ ସଂଗ୍ରହ କରିଥିଲେ ଆଇଜି । ଯାହା ପରେ ଆଇଜି କହିଛନ୍ତି, "ଅପହରଣ ଘଟଣା ପଛରେ ଟଙ୍କା କାରବାର ରହିଛି । ତେବେ ହନୁମାନ ପଇସାକୁ ନେଇ ଅପହରଣ ହୋଇଥିଲା କି ନାହିଁ ସେନେଇ ତଦନ୍ତ ଜାରି ରହିଛି ।"

ଏଥିସହ ପଢ଼ନ୍ତୁ: ମଦ ନିଶାରେ ଭୁଲିଗଲେ ମାନବିକତା; ପ୍ରଥମେ କଲେ ଆକ୍ରମଣ, ପରେ ପାଲିଟିଗଲେ... 

ଘଟଣାରେ ସମ୍ପୃକ୍ତ କାହାରିକୁ ଛଡ଼ାଯିବ ନାହିଁ ଏବଂ ସମସ୍ତ ଅଭିଯୁକ୍ତଙ୍କୁ ଗିରଫ କରାଯିବ ବୋଲି ଆଇଜି ହିମାଂଶୁ ଲାଲ କହିଛନ୍ତି । ଏସବୁ ଭିତରେ ଉଦ୍ଧାର ବ୍ୟବସାୟୀ ନରେନ୍ଦ୍ରଙ୍କୁ ପୋଲିସ ପରିବାରବର୍ଗଙ୍କୁ ହସ୍ତାନ୍ତର କରିଛି । ସେ ନିଜ ପ୍ରତିକ୍ରିୟାରେ ମୁଖ୍ୟ ଅଭିଯୁକ୍ତ କ୍ଷିତୀଶକୁ ଚିହ୍ନି ନଥିବା କହିଛନ୍ତି ।

ପୋଲିସ ଅନୁସାରେ, କ୍ଷିତୀଶର ସହଯୋଗୀ ସଞ୍ଜିତ, ନରେନ୍ଦ୍ରଙ୍କୁ ଘରୁ ଡାକି ଆଣିବା ପରେ ଅପହରଣ କରି ନେଇଥିଲେ । ଅଭିଯୁକ୍ତ ସଞ୍ଜିତର ଘର ବଲାଙ୍ଗିରର ସହରର ତୁଳସୀ ନଗରରେ । ଅପହରଣ ପରେ ୫୦ ଲକ୍ଷ ଟଙ୍କା ଦାବି କରିଥିଲା ମାଷ୍ଟରମାଇଣ୍ଡ କ୍ଷିତୀଶ ସାହୁ ।

୧୪ ତାରିଖ ଅପରାହ୍ଣରେ ବ୍ୟବସାୟୀ ନରେନ୍ଦ୍ରଙ୍କୁ ଜାତୀୟ ରାଜପଥ ୫୭ ବଲାଙ୍ଗିର-ସୋନପୁର ରାସ୍ତାରୁ ଅପହରଣ କରାଯାଇଥିଲା । ନରେନ୍ଦ୍ରଙ୍କୁ ଖଣ୍ଡଗିରି ଥାନା ପୋଲିସ ୧୫ ତାରିଖରେ ଉଦ୍ଧାର କରିବା ପରେ ବଲାଙ୍ଗିର ନିଆଯାଇଥିଲା ।