ବଲାଙ୍ଗୀରରେ ମୃଦୁ ଭୂମିକମ୍ପ ଅନୁଭୂତ। ଭୋର୍ ୪ଟା ୪୦ରେ ମୃଦୁ ଭୂମିକମ୍ପ ଅନୁଭୂତ ହୋଇଛି । ଫଳରେ ସ୍ଥାନୀୟ ଲୋକମାନେ ଭୟଭୀତ ହୋଇ ପଡ଼ିଛନ୍ତି। କାହାର କୌଣସି କ୍ଷୟକ୍ଷତି ହୋଇନଥିବା ସୂଚନା ମିଳିଛି ।

ଖବର ଅନୁଯାୟୀ, ଶନିବାର ଦିନ ଭୋରୁ ଭୋରୁ ବଲାଙ୍ଗୀରରେ ମୃଦୁ ଭୂକମ୍ପରେ ଝଟ୍‌କା ଅନୁଭୂତ ହୋଇଥିଲା । ଯାହାଫଳରେ କିଛି ଲୋକ ଘରକୁ ବାହାରି ଆସିଥିବାର ଜଣାପଡିଛି । ହେଲେ ବର୍ତ୍ତମାନ ଯାଏଁ କୌଣସି କ୍ଷୟକ୍ଷତିର ସୂଚନା ନାହିଁ । ତଥାପି ଲୋକଙ୍କ ମନରେ ଭୟର ବାତାବାରଣ ସୃଷ୍ଟ ହୋଇଛି । ଏହାପୂର୍ବରୁ କିଛି ଦିନ ପୂର୍ବରୁ କଳାହାଣ୍ଡି ଜିଲ୍ଲାରେ ମୃଦୁ ଭୂକମ୍ପର ଝଟ୍‌କା ଅନୁଭୂତ ହୋଇଥିଲା । ଯେଉଁଥିରେ ବି କୌଣସି କ୍ଷୟକ୍ଷତିର ସୂଚନା ନଥିଲା ।

କାହିଁକି ଅନୁଭୂତ ହୋଇଥାଏ ଭୂମିକମ୍ପ ?
ପୃଥିବୀ ପୃଷ୍ଠରେ ରହିଥିବା ସାତଟି ଟେକଟୋନିକେ୍ ପ୍ଲେଟ୍ (Tectonic Plates of Earth) ସବୁବେଳେ ଗତିଶୀଳ ଅବସ୍ଥାରେ ରହିଥାଏ । ଯେଉଁଠିରେ ଏହି ପ୍ଲେଟ ପରସ୍ପର ସହ ଧକ୍କା ହୋଇଥାନ୍ତି, ସେତେବେଳେ ଏହାକୁ ଜୋନ ଫଲ୍ଟ (Zone Fault) କୁହାଯାଏ ।

ବାରମ୍ବାର ଧକ୍କା ହେବା କାରଣରୁ ପ୍ଲେଟ ନିଜର କୋଣ ପରିବର୍ତ୍ତନ କରିଥାଏ । ଯେତେବେଳେ ଏଥିରେ ଅଧିକ ଚାପ ସୃଷ୍ଟି ହୁଏ ସେତେବେଳେ ଏହି ପ୍ଲେଟ ଭାଙ୍ଗିବା ଆରମ୍ଭ କରେ । ଏହାର ନିମ୍ନରେ ଥିବା ଶକ୍ତି ବାହାରକୁ ଆସିବାକୁ ରାସ୍ତା ଖୋଜିଥାଏ । ଯାହା ପରେ ଭୂମିକମ୍ପ ରୂପରେ ବାହାରକୁ ଆସିଥାଏ ।

ଏଥିସହ ପଢ଼ନ୍ତୁ: ୨୪ ଘଣ୍ଟାରେ ଦୁଇଥର ଥରିଲାଣି କଳାହାଣ୍ଡି; କାହିଁକି ଆସୁଛି ବାରମ୍ବାର ଭୂମିକମ୍ପ ? 

କିଛି ଦିନ ପୂର୍ବରୁ ଥରିଥିଲା କଳାହାଣ୍ଡି । ଏପ୍ରିଲ୍ ୨୯ ବୁଧବାର ସନ୍ଧ୍ୟା ୭ଟା ୪୨ ମିନିଟ୍ ୨୧ ସେକେଣ୍ଡରେ କଳାହାଣ୍ଡି ଜିଲ୍ଲାର ବିଭିନ୍ନ ସ୍ଥାନରେ ମୃଦୁ ଭୂମିକମ୍ପ ଅନୁଭୂତ ହୋଇଥିଲା । ରିକ୍ଟର ସ୍କେଲ୍‌ରେ ତୀବ୍ରତା ୪.୧ ରେକର୍ଡ କରାଯାଇଥିଲା ।

ପୁଣି ଏପ୍ରିଲ୍ ୩୦ ଗୁରୁବାର ଅନୁଭୂତ ହୋଇଛି ଭୂମିକମ୍ପ । ସନ୍ଧ୍ୟା ୭ଟା ୨୦ ମିନିଟ୍ ୨୩ ସେକେଣ୍ଡରେ ମୃଦୁ ଭୂମକମ୍ପ ଆସିଛି । ରିକ୍ଟର ସ୍କେଲ୍‌ରେ ତୀବ୍ରତା ରହିଛି ୨.୭ । ଲଗାତାର ଦୁଇ ଦିନ ଧରି ସନ୍ଧ୍ୟା ୭ଟା ସମୟରେ ଭୂମିକମ୍ପ ଆସିବା ସମସ୍ତଙ୍କୁ ଚକିତ କରିଛି ।

ଭୂମି କମ୍ପର ​କେନ୍ଦ୍ରସ୍ଥଳ ଭୂପୃଷ୍ଠରୁ ପ୍ରାୟ ୧୦ କିଲୋମିଟର ଗଭୀରତାରେ ରହିଥିବା ଜଣାପଡ଼ିଛି । ଏହାର ଅକ୍ଷାଂଶ (Lat) ୧୯.୬୩୫ ଏବଂ ଦ୍ରାଘିମା (Long) ୮୨.୭୦୫ ବୋଲି NCS ରିପୋର୍ଟରେ ଦର୍ଶାଯାଇଛି ।

​ଏହି କମ୍ପନ ଯୋଗୁଁ କୌଣସି ସ୍ଥାନରେ କିଛି କ୍ଷୟକ୍ଷତି ହୋଇଥିବାର ଏପର୍ଯ୍ୟନ୍ତ ସୂଚନା ମିଳିନାହିଁ। ମାତ୍ର କିଛି ସମୟ ପାଇଁ ସ୍ଥାନୀୟ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଥିଲା ।
ବୁଧବାର ଭୂମିକମ୍ପ ଯୋଗୁଁ ଲୋକେ ଆତଙ୍କିତ ହୋଇ ଘରୁ ବାହାରକୁ ଚାଲି ଆସିଥିଲେ । ଭୂମିକମ୍ପର କେନ୍ଦ୍ର ବିନ୍ଦୁ କଳାହାଣ୍ଡି ଜିଲ୍ଲାରେ ରହିଥିବା ବେଳେ ଭୂପୃଷ୍ଠରୁ ଏହାର ଗଭୀରତା ପ୍ରାୟ ୨୪ କିଲୋମିଟର ଥିଲା ।​