ଅର୍ଗସ ବ୍ୟୁରୋ : ଫେଲ ମାରିଛି ରାଜ୍ୟ ସରକାରଙ୍କ ‘ମୋ ଘର’ ଯୋଜନା । ଯୋଜନାକୁ ପ୍ରାୟ ୮ମାସ ବିତି ଯାଇଥିଲେ ବି ବାଲେଶ୍ଵର ଜିଲ୍ଲାରେ ଏକ ପ୍ରତିଶତ ଲୋକଙ୍କୁ ବି ଘର ମିଳିପାରିନି । ଏପରିକି ଘର ପାଇଁ ଆବେଦନ କରିଥିବା ମୋଟ ହିତାଧିକାରୀଙ୍କ ମଧ୍ୟରୁ ପ୍ରାୟ ୭୦ ପ୍ରତିଶତଙ୍କ ଆବେଦନ ଏବେବି ବ୍ୟାଙ୍କସ୍ତରରେ ପଡ଼ିରହିଛି । ମେ ମାସ ୨୯ ତାରିଖରେ ଯେଉଁ ‘ମୋ ଘର’ ଯୋଜନା କାର୍ଯ୍ୟକାରୀ କଲେ ତାହା ଏବେ ଫେଲ୍ ମାରିଛି । 

ସରକାରୀ ତଥ୍ୟ ମୁତାବକ ବାଲେଶ୍ଵର ଜିଲ୍ଲାରେ ସମୁଦାୟ ୧୪ ହଜାର ୪୩୧ ଜଣ ଆବେଦନ କରିଥିଲେ । ସେଥିମଧ୍ୟରୁ ୫୯ ଜଣଙ୍କୁ ଏହି ଯୋଜନାରେ ସାମିଲ କରାଯାଇଛି । ବାକି ୨ ବ୍ଲକରେ କେହି ହିତାଧିକାରୀଙ୍କୁ 'ମୋ ଘର' ଯୋଜନାରେ ସାମିଲ କରାଯାଇ ନାହିଁ । ସେପଟେ ୧୦ ଟି ବ୍ଲକରେ ୫ ରୁ ୬ ଜଣ ହିତାଧିକାରୀଙ୍କୁ ସାମିଲ କରାଯାଇଛି । ସୋରୋ ବ୍ଲକ ତେଣ୍ଟେଇ ଗ୍ରାମପଞ୍ଚାୟତର ସରସ୍ଵତୀ ସେଠୀ । ମୋ ଘର ଯୋଜନା ପାଇ ବ୍ୟାଙ୍କ୍ ଠାରୁ ଆରମ୍ଭ କରି ପଞ୍ଚାୟତ ସ୍ତର ଯାଏ ଯାଇଥିଲେ ମଧ୍ୟ ଆଜି ପର୍ଯ୍ୟନ୍ତ ଯୋଜନାରେ ସାମିଲ ହୋଇନାହାନ୍ତି । 

ଚଳିତବର୍ଷ ମେ’ ୨୯ତାରିଖରେ ପଂଚମ ପାଳି ସରକାରର ୪ର୍ଥ ବର୍ଷ ପୂର୍ତ୍ତି ଅବସରରେ ‘ମୋ ଘର’ ଯୋଜନାକୁ ରାଜ୍ୟ କ୍ୟାବିନେଟ୍ ଅନୁମୋଦନ କରିଥିଲେ । କିନ୍ତୁ ଏହି ଯୋଜନାରେ ଘର ପାଇବା ନିମନ୍ତେ ରାଜ୍ୟ ସରକାର ଧାର୍ଯ୍ୟ କରିଥିବା ନିୟମ ଓ ସର୍ତ୍ତାବଳୀ ଯୋଗୁ ସବସିଡି ଘର ପାଇବାରୁ ବଂଚିତ ହେଉଛନ୍ତି । କିଛିଦିନ ତଳେ ରାଜ୍ୟସ୍ତରୀୟ ଷ୍ଟେଟ୍‌ ଲେଭଲ ବ୍ୟାଙ୍କର୍ସ କମିଟି ବୈଠକ ହୋଇଥିଲା । ସେଥିରେ ବ୍ୟାଙ୍କଗୁଡିକ ଯେପରି ମୋ ଘର ଯୋଜନାରେ ଅଧିକ ଆବେଦନକୁ ଗ୍ରହଣ କରି ସେଗୁଡିକୁ ଋଣ ଦେବେ ସେନେଇ ନିର୍ଦ୍ଦେଶ ଦିଆଯାଇଥିଲା । ତଥାପି ଯୋଜନା ସଫଳ ହୋଇ ପାରିନାହିଁ।