ଭୁବନେଶ୍ବର ୦୭/୦୬: ବାଲିଅନ୍ତା ଭିଡ଼ ଭିତରେ GRP କନେଷ୍ଟବଳ ସୌମ୍ୟ ରଞ୍ଜନ ସ୍ୱାଇଁ ହତ୍ୟା ମାମଲାକୁ ନେଇ ନୂଆ ମୋଡ଼। ଏନଏଚଆରସିରେ ଦାଖଲ ଅଭିଯୋଗ ଆଧାରରେ ବରିଷ୍ଠ ଆଇପିଏସ ଅଧିକାରୀଙ୍କ ବିରୋଧରେ ଆସିଥିବା ଅଭିଯୋଗର ତଦନ୍ତ ପାଇଁ ସିଆଇଡି-କ୍ରାଇମବ୍ରାଞ୍ଚ ପକ୍ଷରୁ ଚିଠି ଜାରି ହୋଇଛି । ଏନଏଚଆରସିରେ ଦାଖଲ ହୋଇଥିବା ଅଭିଯୋଗରେ ମୃତ କନଷ୍ଟେବଳ ସୌମ୍ୟଙ୍କୁ ବରିଷ୍ଠ ଆଇପିଏସ ଅଧିକାରୀ ଘରୋଇ କାମରେ ଅବୈଧ ଭାବେ ନିୟୋଜିତ କରିଥିବା ଅଭିଯୋଗ ଉଠିଛି। ଏହି ଅଭିଯୋଗର ସତ୍ୟତା ଯାଞ୍ଚ ପାଇଁ ରେଲୱେ ଓ କୋଷ୍ଟାଲ ସିକ୍ୟୁରିଟି ଏଡିଜିଙ୍କୁ ତଦନ୍ତ କରି ରିପୋର୍ଟ ଦେବାକୁ କୁହାଯାଇଛି ।

ଏପଟେ ସୌମ୍ୟ ରଞ୍ଜନ ସ୍ୱାଇଁ ମୃତ୍ୟୁ ଘଟଣାରେ ଏନଏଚଆରସି ଓ କ୍ରାଇମବ୍ରାଞ୍ଚ ତଦନ୍ତ ଜାରି ରହିଛି । ଘଟଣାକୁ ନେଇ ଅନେକ ପ୍ରଶ୍ନ ଉଠୁଥିବା ବେଳେ ଏହି ନୂଆ ଅଭିଯୋଗ ମାମଲାକୁ ଆହୁରି ଗୁରୁତ୍ୱ ବଢ଼ାଇଛି । ମୃତ ସୌମ୍ୟଙ୍କ ମାଆ ପୂର୍ବରୁ ADG ଦୟାଲ ଗଙ୍ଗୱାରଙ୍କ ବିରୋଧରେ ସାଙ୍ଘାତିକ ଅଭିଯୋଗ ଆଣିଥିଲେ । ସୌମ୍ୟ ADGଙ୍କ ଘରକୁ ପ୍ରତିଦିନ ଯାଉଥିଲେ । ADGଙ୍କ ସେବା କରୁଥିଲେ, ମାଲିସ କରୁଥିଲେ । ତାଙ୍କ ଜିମରେ କାମ କରାଉଥିଲେ । ଯେଉଁଥିପାଇଁ ସୌମ୍ୟଙ୍କ ହାତରେ ଆଘାତ ଲାଗିଥିଲା । ସୌମ୍ୟ ମାନସିକ ସ୍ତରରେ ନିର୍ଯାତନା ପାଉଥିବା ନେଇ ଅଭିଯୋଗ ହୋଇଥିଲା

ପଢନ୍ତୁ ଏହି ଖବର: ଅର୍ଗସ ହାତରେ ସୌମ୍ୟ-ଓମ୍ ବିବାଦର ସାଂଘାତିକ ପ୍ରମାଣ; କୁଆଡ଼େ ଗଲା ସୌମ୍ୟଙ୍କ ମୋବାଇଲ୍ ?

ପୁର୍ବରୁ ସୌମ୍ୟ ହତ୍ୟା ମାମଲାର ୫ ଦିନିଆ ମାରାଥନ ତଦନ୍ତ ସରିଛି। । ADGଙ୍କ ସମେତ ୩୦ରୁ ଅଧିକ ଜଣଙ୍କୁ ପଚରାଉଚରା କରିଛି ଏନଏଚଆରସି, ଅର୍ଗସ୍ ନ୍ୟୁଜ୍ ହାତରେ ସୌମ୍ୟ-ଓମ୍ ବିବାଦର ଏକ୍ସକ୍ଲୁସିଭ୍ ହ୍ଵାଟ୍ସଆପ୍ ଚାଟ୍ ଲାଗିଥିଲା। ସୌମ୍ୟଙ୍କ ପରିବାରର ପ୍ରଶ୍ନ, :କୁଆଡ଼େ ଗଲା ପୁଅର ମୋବାଇଲ୍, କ୍ରାଇମବ୍ରାଞ୍ଚ କାହିଁକି ଲଗାଉନି ଭିଡ଼ ହିଂସା ଦଫା ।"
କାହିଁକି ସୌମ୍ୟଙ୍କୁ ନିଜ ଘରକୁ ଡାକୁଥିଲେ ADG ? କାହିଁକି ସୌମ୍ୟଙ୍କୁ ମାଲିସ୍ କରିବାକୁ କହୁଥିଲେ ? ସତ୍ୟବିହାର ଜିମ୍ ସହ ADG ଦୟାଲ ଗଙ୍ଗୱାରଙ୍କ ସମ୍ପୃକ୍ତି କଣ ? ଏମିତି ତମାମ୍ ପ୍ରଶ୍ନକୁ ନେଇ ଏନଏଚଆରସି ଟିମ ADGଙ୍କୁ ଜେରା କରିଥିଲା। ସୌମ୍ୟ ହତ୍ୟା ଘଟଣାରେ ପ୍ରତ୍ୟକ୍ଷ ଓ ପରୋକ୍ଷ ଭାବରେ ଜଡିତ ଥିବା ୩୦ରୁ ଅଧିକ ଲୋକଙ୍କୁ ଜେରା କରିସାରିଛି ଟିମ ।

ପଞ୍ଚମ ଦିନରେ ସୌମ୍ୟଙ୍କ ସାଙ୍ଗ ଓମ୍, ଦୁଇଜଣ ଯୁବତୀ, ୧୦୮ ଆମ୍ବୁଲାନ୍ସ ଡ୍ରାଇଭର, ଟ୍ରକ ଡ୍ରାଇଭର, GRPର ସମସ୍ତ ଅଧିକାରୀ, ସୌମ୍ୟଙ୍କ ବାନ୍ଧବୀ, ନିଲମ୍ବିତ ପୋଲିସ କର୍ମଚାରୀ, ପୋଷ୍ଟମର୍ଟମ କରିଥିବା ଡାକ୍ତରଙ୍କୁ ଡାକି ଜେରା କରିଥିଲା ଏନଏଚଆରସି ଟିମ୍ ।

ସେପଟେ ସୋସିଆଲ୍ ମିଡିଆରେ ଭାଇରାଲ୍ ହେଉଥିବା ସୌମ୍ୟଙ୍କ ବାନ୍ଧିବୀଙ୍କ ଅଡିଓରେ ସାମ୍ନାକୁ ଆସିଛି ଚାଞ୍ଚଲ୍ୟକର ତଥ୍ୟ । ସୌମ୍ୟ ଓ ଓମ୍ ବିବାଦକୁ ନେଇ ବାନ୍ଧବୀ ମୁହଁ ଖୋଲିଛନ୍ତି । ଅର୍ଗସ୍ ନ୍ୟୁଜ୍ ହାତରେ ଲାଗିଛି ସୌମ୍ୟ ଓ ଓମ୍‌ଙ୍କ ଚାଟ ।

ଗତ ନଭେମ୍ବର ମାସରୁ ଓମ୍ ଓ ସୌମ୍ୟଙ୍କ ମଧ୍ୟରେ ବିବାଦକୁ ନେଇ ହ୍ଵାଟ୍ସଆପ ଚାଟରେ ଉଲ୍ଲେଖ ରହିଛି । ଯାହା ଏବେ ସୋସିଆଲ ମିଡିଆରେ ଭାଇରଲ ହେବାରେ ଲାଗିଛି । ସତ୍ୟବିହାର ଜିମ୍କୁ ନେଇ ଉଭୟଙ୍କ ଭିତରେ ବିବାଦ ସୃଷ୍ଟି ହୋଇଥିଲା । ଯେଉଁଥିପାଇଁ ଅଡ଼ଶପୁର ଜିମ୍‌କୁ ଓମ୍‌କୁ ନ ଆସିବା ପାଇଁ ନିଜ ବାନ୍ଧବୀଙ୍କ ଜରିଆରେ କହିଥିଲେ ସୌମ୍ୟ ।

ଏହି ଅଡିଓ ଭାଇରାଲ୍ ହେବା ପରେ ଓମ୍‌ର ଭୂମିକାକୁ ନେଇ ଉଠିଛି ଅନେକ ପ୍ରଶ୍ନ । ଓମ୍‌ର କଲ ସିଡିଆର୍ ଯାଞ୍ଚ କରିବାକୁ ପରିବାର ଲୋକେ ଦାବି କରିଥିଲେ।

ମେ ୭ରେ ଓମ୍ କାହା କାହା ସହ କଥା ହୋଇଛନ୍ତି ?
ଏକାଧିକ ଥର କାହା ସହ କଥା ହୋଇଥିଲେ ?
ଅଧିକ ସମୟ ଓମ୍ କାହା ସହ କଥା ହୋଇଛନ୍ତି ?

ଏସବୁ ଖୋଳତାଡ଼ କଲେ ସତ ସାମ୍ନାକୁ ଆସିବ ବୋଲି ଚର୍ଚ୍ଚା ହେଉଛି । ସେପଟେ କ୍ରାଇମବ୍ରାଞ୍ଚର ତଦନ୍ତକୁ ନେଇ ପ୍ରଶ୍ନ ମଧ୍ୟ ଉଠିଛି । ଖାଲି ଗିରଫଦାରୀରେ କାହିଁକି ସୀମିତ ରହିଯାଇଛି କ୍ରାଇମବ୍ରାଞ୍ଚ । ଭିଡ଼ ହିଂସା ଦଫା କାହିଁକି ଲଗାଉ ନାହିଁ କ୍ରାଇମବ୍ରାଞ୍ଚ ସେନେଇ ସୌମ୍ୟଙ୍କ ମା ବାପା ଅଭିଯୋଗ କରିଛନ୍ତି । ଏବେ ସବୁଠୁ ବଡ଼ ପ୍ରଶ୍ନ କୁଆଡ଼େ ଗଲା ସୌମ୍ୟଙ୍କ ମୋବାଇଲ ? କ୍ରାଇମବ୍ରାଞ୍ଚ କରିବ କି ସୌମ୍ୟଙ୍କ ମୋବାଇଲର କଲ୍ ସିଡିଆର ଯାଞ୍ଚ ?