ରାଜଧାନୀରେ ମାତିଛନ୍ତି ବଞ୍ଜାରା ଗ୍ୟାଙ୍ଗ୍ । ଏକୁଟିଆ ମହିଳାଙ୍କୁ କରୁଛନ୍ତି ଟାର୍ଗେଟ । ଖଣ୍ଡଗିରି ମେଳାରେ ଖେଳାଉଛନ୍ତି ଲୁଟ୍‌ ଆତଙ୍କ । ଆଖି ପିଛୁଳାକେ ଗାଏବ କରୁଛନ୍ତି ମୋବାଇଲ ପର୍ସ ଓ ସୁନା ଅଳଙ୍କାର । ଲୁଟ୍‌ପାଟ୍‌ କରି ଲୋକଙ୍କ ନିଦ ହଜାଇବା ପରେ ସ୍ପେଶାଲ ଡ୍ରାଇଭ୍ ଆରମ୍ଭ କରିଛି କମିଶନରେଟ୍ ପୋଲିସ । ୧୧ ଜଣଙ୍କୁ ବାନ୍ଧି କୋର୍ଟ ଚାଲାଣ କରିଛି ଖଣ୍ଡଗିରି ଥାନା ପୋଲିସ ।

ଏବେ ଉତ୍ସବ ମୁଖର ପୂରା ଭୁବନେଶ୍ବର । ଖଣ୍ଡଗିରି ମେଳା ସାଙ୍ଗକୁ ଚାଲିଛି ଆଦିବାସୀ ମେଳା । ଏହା ସହ ବିବାହ ଋତୁ ଚାଲିଥିବାରୁ ଏବେ ସବୁ ବିବାହ ମଣ୍ଡପରେ ଦେଖିବାକୁ ମିଳୁଛି ପ୍ରବଳ ଗହଳି । ଆଉ ଏହି ଭିଡ଼ର ଫାଇଦା ନେଇଛନ୍ତି ବଞ୍ଜାରା ଗ୍ୟାଙ୍ଗ୍‌ । କିଛି ଦିନ ଧରି ରାଜଧାନୀର ଗଳିକନ୍ଦିରେ ଘୁରି ବୁଲୁଛନ୍ତି ମହାରାଷ୍ଟ୍ରରୁ ଆସିଥିବା ଏହି ମହିଳା ଲୁଟେରା ଗ୍ୟାଙ୍ଗ୍ I ରାଜଧାନୀରେ ଖଣ୍ଡଗିରି ମେଲା ଚାଲିଥିବା ବେଳେ ଗହଳିର ସୁଯୋଗ ନେଇ ଚଲାଇଛନ୍ତି ଲୁଟ୍ ପାଟ୍ । ଲୁଟ୍‌ ପାଟ୍‌ କରି ପୋଲିସକୁ କରୁଥିଲେ ନାକେଦମ୍‌ ।

ଭିଡ଼ ହେଉ କି ବରଯାତ୍ରୀ ପ୍ରୋସେସନ କିମ୍ବା କୌଣସି ଯାନିଯାତ୍ରା । ଭିଡ଼ର ଫାଇଦା ନେଇ କେବଳ ଏକୁଟିଆ ମହିଳାଙ୍କୁ କରନ୍ତି ଟାର୍ଗେଟ I ବିଭିନ୍ନ ବାହାନାରେ ଘେରନ୍ତି । ଆଉ ଲୁଟି ନିଅନ୍ତି ବ୍ୟାଗ, ପର୍ସ, ଟଙ୍କା, ସୁନା ଗହଣା ଓ ମୋବାଇଲ I କିଛି ଦିନ ତଳେ ଏହିପରି ଅଟୋରେ ଜଣେ ମହିଳାଙ୍କଠାରୁ ୯ ଲକ୍ଷ ଟଙ୍କାର ସୁନା ଗହଣା ଲୁଟି ନେଇଥିଲେ । ପରେ ପୁଣି ବରମୁଣ୍ଡା ବସ୍‌ ଷ୍ଟାଣ୍ଡ ପାଖରୁ ଆଉ ଜଣେ ମହିଳାଙ୍କ ବ୍ୟାଗରୁ ଟଙ୍କା ମୋବାଇଲ ନେଇ ଚମ୍ପଟ ମାରିଥିଲେ ଏହି ଗ୍ୟାଙ୍ଗ I

ଏକାଧରଣର ହୋଇଥିବା ଲୁଟର ଏକାଧିକ ଅଭିଯୋଗ ଆସିବା ପରେ ପୋଲିସ ଆରମ୍ଭ କରିଥିଲା ସ୍ପେଶାଲ ଡ୍ରାଇଭ୍ । ପୃଥକ ପୃଥକ କେସ୍‌ରେ ୧୧ ଜଣଙ୍କୁ ବାନ୍ଧି କୋର୍ଟ ଚାଲାଣ କରିଛି ଖଣ୍ଡଗିରି ଥାନା ପୋଲିସ । ସେମାନଙ୍କ ଠାରୁ ଟଙ୍କା, ମୋବାଇଲ ସହିତ ଚୋରି ମୋବାଇଲକୁ ରିକଭରି କରି ଅଭିଯୋଗକାରୀଙ୍କୁ ଫେରାଇଛି । ତେବେ ଏମାନଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ I