କଟକ: ବାରବାଟୀ ଫୁଡ୍ କୋର୍ଟକୁ ନେଇ କଟକ ରାଜନୀତିରେ ଝଡ଼ । ଯେଉଁ ପ୍ରକଳ୍ପ ପାଇଁ ଦିନେ ବିଧାନସଭାରେ ସ୍ୱର ଉଠାଉଥିଲେ । ଆଜି ସେହି ଫୁଡ୍ କୋର୍ଟକୁ ବିରୋଧ କରୁଛନ୍ତି କଟକ ବାରବାଟୀ ବିଧାୟିକା ସୋଫିଆ ଫିର୍ଦ୍ଦୋସ ।

ମେୟରଙ୍କୁ ଦୁର୍ନୀତିଖୋର କହିବା ସହ ଏସଓପି ଚିରି ଫିଙ୍ଗି ଦେଇଛନ୍ତି ବିଧାୟିକା । ଅନ୍ୟପଟେ ବିଧାୟିକାଙ୍କୁ କଡ଼ା ଜବାବ ଦେଇଛନ୍ତି ମେୟର ସୁବାସ ସିଂ । ଏସବୁ ଭିତରେ ଫୁଡ୍ କୋର୍ଟ ଆବଣ୍ଟନକୁ ନେଇ ସ୍ପଷ୍ଟୀକରଣ ରଖିଛନ୍ତି CMC କମିଶନର ।

ଏଥିସହ ପଢ଼ନ୍ତୁ: ଓଡ଼ିଶା ଭୋଟର ତାଲିକାରେ ବଡ଼ ଧରଣର ସଂଶୋଧନ; କଟିଲା ୯.୮ ଲକ୍ଷ ମତଦାତାଙ୍କ ନାଁ

ଉଦଘାଟନ ହୋଇନାହିଁ, ହେଲେ ବିବାଦରେ ଛନ୍ଦି ହୋଇଗଲାଣି ବହୁ ପ୍ରତୀକ୍ଷିତ ବାରବାଟୀ ଫୁଡ୍ କୋର୍ଟ । କଟକ ମହାନଗର ନିଗମ ମେୟର ସୁବାସ ସିଂଙ୍କୁ ବ୍ୟକ୍ତିଗତ ଆକ୍ଷେପ କରିବା ସହ ଦୋକାନ ଘର ଆବଣ୍ଟନ ପ୍ରକ୍ରିୟାରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗ ଆଣିଛନ୍ତି ବିଧାୟିକା ସୋଫିଆ ଫିର୍ଦ୍ଦୋସ ।

ନିଜ ପସନ୍ଦର ଲୋକଙ୍କୁ ଦୋକାନ ଦେବା ପାଇଁ ମେୟର ଏଭଳି ନିୟମ କରିଥିବା ସୋଫିଆ କହିଛନ୍ତି । ସେପଟେ ମେୟର ମଧ୍ୟ ପାଲଟା ଜବାବ ଦେଇ କହିଛନ୍ତି ଯେ, ବିଧାୟିକାଙ୍କ ସଭ୍ୟ ପଦ ବିପଦରେ ଥିବାରୁ ସେ ବାଉଳି ଚାଉଳି ହେଉଛନ୍ତି ।


ପାଖାପାଖି ୮ କୋଟି ଟଙ୍କା ବ୍ୟୟରେ ନିର୍ମାଣ ହୋଇଛି ଆଧୁନିକ ବାରବାଟୀ ଫୁଡ୍ କୋର୍ଟ । ମୋଟ ୮୮ଟି ଦୋକାନ ଘରୁ ୪୫ଟିର ଆବଣ୍ଟନ ସରିଛି । ବିଶେଷ କରି ବାରବାଟୀ ଷ୍ଟାଡିୟମ ପାଖରେ ପୂର୍ବରୁ ବ୍ୟବସାୟ କରୁଥିବା ଲୋକଙ୍କୁ ଏଠାରେ ପ୍ରାଧାନ୍ୟ ଦିଆଯାଉଥିବା କୁହାଯାଇଛି ।

ଏଥିସହ ପଢ଼ନ୍ତୁ: କାଲିଠୁ ୩ ଦିନ ସ୍କୁଲ୍ ସହ ଅଙ୍ଗନୱାଡ଼ି ଓ କଲେଜ ଛୁଟି ଘୋଷଣା; ଅନଲାଇନ୍‌ରେ ହେବ କ୍ଲାସ୍

ମେୟର-ବିଧାୟିକାଙ୍କ ମଧ୍ୟରେ ବିବାଦ ବଢ଼ିବା ପରେ ସାମ୍ନାକୁ ଆସିଛନ୍ତି CMC କମିଶନର କିରଣଦୀପ କୌର । କମିଶନରଙ୍କ କହିବା କଥା, ସମସ୍ତ ପ୍ରକ୍ରିୟା ସ୍ୱଚ୍ଛତାର ସହ ହେଉଛି ଏବଂ ଯିଏ ଲିଜ୍ ନେବ ସେ କାହାକୁ ସବ୍-ଲିଜ୍ ଦେଇପାରିବ ନାହିଁ ।

ମେୟର ଓ ବିଧାୟିକାଙ୍କ ମଧ୍ୟରେ ଚାଲିଥିବା ଏହି ଆରୋପ ପ୍ରତ୍ୟାରୋପ ଭିତରେ ବାରବାଟୀ ଫୁଡ୍ କୋର୍ଟର ଭବିଷ୍ୟତକୁ ନେଇ ଏବେ ସାଧାରଣରେ ସନ୍ଦେହ ବଢ଼ିବାରେ ଲାଗିଛି । କଟକବାସୀଙ୍କ ଖାଇବା ଶୈଳୀକୁ ନୂଆ ରୂପ ଦେବାକୁ ଲକ୍ଷ୍ୟ ରଖିଥିବା ଏହି ପ୍ରକଳ୍ପ ଏବେ ରାଜନୈତିକ ଲଢ଼େଇର ମଇଦାନ ପାଲଟିଛି ।