କଟକ: ଚାଉଳିଆଗଞ୍ଜ ଆଇଆଇସି ବିୟୁଟି ମହାନ୍ତି କାହିଁକି ହାରିଲେ ଜୀବନ ? ଜୁଲାଇ ୪ରେ କାହିଁକି ସେ ଥାନା କ୍ଵାର୍ଟରରେ ଆତ୍ମହତ୍ୟା କଲେ ? ବିୟୁଟିଙ୍କ ମୃତ୍ୟୁକୁ ୧୩ ଦିନ ବିତିଥିବା ବେଳେ ଖୋଳତାଡ଼ ଜାରି ରଖିଛି ପୋଲିସ । ଯାଞ୍ଚ ବେଳେ ପୋଲିସ ହାତରେ ଲାଗିଛି ଡିଜିଟାଲ୍ ପ୍ରମାଣ । ସେନଇ ପ୍ରତିକ୍ରିୟା ଦେଇଛନ୍ତି କଟକ ଡିସିପି ଖିଲାରୀ ଋଷିକେଶ ଜ୍ଞାନଦେଓ ।

କଟକ ଡିସିପି ଖିଲାରୀ ଋଷିକେଶ ଜ୍ଞାନଦେଓ କହିଛନ୍ତି, "ମହିଳା ଅଧିକାରୀଙ୍କ ମୃତ୍ୟୁ ମାମଲାର ତଦନ୍ତ ପାଇଁ ଗଠିତ ହୋଇଛି ୩ଟି ସ୍ୱତନ୍ତ୍ର ଟିମ୍ । ଶବ ବ୍ୟବଚ୍ଛେଦ ରିପୋର୍ଟ ଓ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ କାଗଜପତ୍ର ସଂଗ୍ରହ କରିଛି ପ୍ରଥମ ପୋଲିସ ଟିମ୍ । ଦ୍ଵିତୀୟ ଟିମ୍ ମୃତ୍ୟୁ ପୂର୍ବର ଶେଷ ଯୋଗାଯୋଗକୁ ନେଇ ତଦନ୍ତ କରୁଛି ।

ଏଥିସହ ପଢ଼ନ୍ତୁ: ପୂର୍ବତନ ପ୍ରେମିକଙ୍କ ବ୍ଳାକମେଲ୍‌ ପାଇଁ ନର୍ସ ହାରିଦେଲେ ଜୀବନ, ଥାନାରେ ୨ ଅଟକ 

କଲ୍ ରେକର୍ଡକୁ ନେଇ ପଚରାଉଚରା

ଜୁଲାଇ ୪ରେ ବିୟୁଟିଙ୍କ ମୃତ୍ୟୁ ପୂର୍ବରୁ ସେ କାହା ସହ କଥା ହୋଇଥିଲେ । କାହା ସହ ଚାଟ କିମ୍ବା ମେସେଜ୍ କରିଥିଲେ । ଏବେ ସେମାନଙ୍କୁ ପୋଲିସର ଦ୍ଵିତୀୟ ଟିମ୍ ପଚରାଉଚରା କରୁଛି । ସାଇଣ୍ଟିଫିକ୍ ଏବଂ ଡିଜିଟାଲ୍ ପ୍ରମାଣ ଉପରେ କାମ କରୁଛି ପୋଲିସର ତୃତୀୟ ସ୍ୱତନ୍ତ୍ର ଟିମ୍ ।

SFSLରୁ ପୋଲିସକୁ ମିଳିଛି ଆଂଶିକ ଡିଜିଟାଲ୍ ରିପୋର୍ଟ । ବିୟୁଟି ମହାନ୍ତିଙ୍କ ମୋବାଇଲ୍ ଫୋନ୍‌ରୁ ମିଳିଥିବା ଡାଟାର ଚାଲିଛି ଆନାଲିସିସ୍ । ଅଲଗା ଅଲଗା ଫର୍ମାଟ୍‌ରେ ରିପୋର୍ଟ ଆସୁଥିବାରୁ ଯାଞ୍ଚ ପ୍ରକ୍ରିୟା ଜାରି ରହିଛି । ଜଣେ ଅତିରିକ୍ତ ଡିସିପି ରାଙ୍କ ଅଧିକାରୀ ତଦନ୍ତର ତଦାରଖ କରୁଥିବା କହିଛନ୍ତି ଡିସିପି ।

କଟକ ଡିସିପି ମଧ୍ୟ ନିଜେ ମାମଲାର ପ୍ରଗତି ଉପରେ ନଜର ରଖିଛନ୍ତି । ତଦନ୍ତରେ ସହାୟତା ପାଇଁ ପରିବାର ଲୋକଙ୍କ ସହ କ୍ରମାଗତ ଯୋଗାଯୋଗରେ ଅଛି ପୋଲିସ । ବର୍ତ୍ତମାନ ପର୍ଯ୍ୟନ୍ତ ଏହି ଘଟଣାରେ କେବଳ ଅପମୃତ୍ୟୁ ମାମଲା ରୁଜୁ ହୋଇଛି । ଏବେ ସୁଦ୍ଧା ୟୁଡି କେସ୍ ବା ଅସ୍ୱାଭାବିକ ମୃତ୍ୟୁ ମାମଲା କରି ପୋଲିସ କାରଣ ଖୋଜୁଛି ।

ଏଥିସହ ପଢ଼ନ୍ତୁ: IIC ବିୟୁଟି ମହାନ୍ତିଙ୍କ ମୃତ୍ୟୁ: DGPଙ୍କ ଉତ୍ତର ବଢ଼ାଇଲା ସସପେନ୍ସ; କହିଲେ, ତଦନ୍ତ ପରେ ଜଣାପଡ଼ିବ ପ୍ରକୃତ ସତ 

କଟକ ଡିସିପି ଖିଲାରୀ ଋଷିକେଶ ଜ୍ଞାନଦେଓ କହିଛନ୍ତି, "ମାମଲା ରୁଜୁ ପାଇଁ କାହାରି ଲିଖିତ ଅଭିଯୋଗ ଆସିବା ନିହାତି ଜରୁରୀ ନୁହେଁ । ତଦନ୍ତ ସମୟରେ କିଛି ସନ୍ଦେହଜନକ ତଥ୍ୟ ମିଳିଲେ ତୁରନ୍ତ ନିୟମିତ ମାମଲା ହେବ ।" ଘଟଣା ଦିନର ଡିଜିଟାଲ ଓ ଥାନା ଭିତରେ ଯୋଗାଯୋଗରେ ଥିବା ଲୋକଙ୍କୁ ତଦନ୍ତ ପରିସରଭୁକ୍ତ କରିଛି ପୋଲିସ ।