କଟକ: ରହସ୍ୟ ବଢ଼ାଇଲା କଟକ ଚାଉଳିଆଗଞ୍ଜ ଥାନା IIC ବିୟୁଟି ମହାନ୍ତିଙ୍କ ଆତ୍ମହତ୍ୟା । କାରଣ ଶୁକ୍ରବାର ରାତି ପ୍ରାୟ ସାଢ଼େ ଦଶଟା ପର୍ଯ୍ୟନ୍ତ ସ୍ବାଭାବିକ ଅବସ୍ଥାରେ ଡ୍ୟୁଟି କରିଥିଲେ । ଥାନା କ୍ଵାର୍ଟରକୁ ଯିବା ପରେ ସକାଳୁ ଆଉ ଆସିନଥିଲେ । ଶନିବାର ସକାଳୁ ମହିଳା ଇନିସପେକ୍ଟରଙ୍କ ଫୋନକୁ କଲ୍ ଆସିଥିଲା ।

କିନ୍ତୁ ସେ ନ ଉଠାଇବାରୁ ଅନ୍ୟ କର୍ମଚାରୀ ଉପର ମହଲାକୁ ଯାଇ ରେଷ୍ଟରୁମ୍ କଵାଟ ବାଡେଇଥିଲେ । ଭିତରୁ କୌଣସି ଉତ୍ତର ମିଳିନଥିଲା । ବାଧ୍ୟ ହୋଇ ଥାନା କର୍ମଚାରୀ ଉପରିସ୍ଥ ଅଧିକାରୀଙ୍କୁ ଜଣାଇବା ସହ, ରେଷ୍ଟରୁମ୍ କବାଟ ଭାଙ୍ଗି ଦେଇଥିଲେ । ଆଉ ରୁମ୍ ଭିତରେ ଫ୍ୟାନରେ ଝୁଲୁଥିଲା ତାଙ୍କ ମୃତଦେହ । ତୁରନ୍ତ ଉପରିସ୍ଥ ଅଧିକାରୀ ଥାନାରେ ପହଞ୍ଚି ମୃତଦେହ ବ୍ୟବଚ୍ଛେଦ ପାଇଁ କଟକ ବଡ଼ ମେଡିକାଲ ନେଇଥିଲେ ।

ଏଥିସହ ପଢ଼ନ୍ତୁ: ଚାଉଳିଆଗଞ୍ଜ ଥାନାରେ ଚାଞ୍ଚଲ୍ୟ…ମହିଳା IIC ବ୍ୟୁଟି ମହାନ୍ତିଙ୍କ ଝୁଲନ୍ତା ମୃତଦେହ ଉଦ୍ଧାର…ମୃତ୍ୟୁର କାରଣ ଅସ୍ପଷ୍ଟ 

ଜଣେ ମହିଳା ଇନିସପେକ୍ଟରଙ୍କ ରହସ୍ୟଜନ ମୃତ୍ୟୁ, ପୋଲିସ ମହଲରେ ଚାଞ୍ଚଲ୍ୟ ସୃଷ୍ଟି କରିଦେଇଥିଲା । ବାପ ଘର ଓ ଶାଶୂ ଘର ଲୋକଙ୍କୁ ଖବର ଦିଆଯିବା ସହ ପୋଲିସ କମିଶନର, ଅତିରିକ୍ତ କମିଶନର, ଅତିରିକ୍ତ ଡିସିପି, ସବୁ ଜୋନର ଏସିପି ମେଡିକାଲରେ ପହଞ୍ଚିଥିଲେ ।

ପୋଲିସ କମିଶନର ପରିବାର ଲୋକଙ୍କୁ ଭେଟିବା ପରେ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି । ସିପି ଏସ୍‌. ଦେବଦତ୍ତ ସିଂହ କହିଛନ୍ତି, "କୌଣସି ବ୍ୟକ୍ତିଗତ କାରଣରୁ ସେ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି ।" ତେବେ ସିପିଙ୍କ ମନ୍ତବ୍ୟକୁ ମାନିବାକୁ ନାରାଜ ପରିବାର ସଦସ୍ୟ ।

ମୃତ ବିୟୁଟିଙ୍କ ବେକ ଓ ଗୋଡ଼ରେ ଦାଗ ରହିଛି l କୌଣସି କେମିକାଲ୍ ଦିଆଯାଇଥିବାରୁ ଶରୀର କଳା ପଡ଼ି ଆସୁଛି ଅଭିଯୋଗ କରି ଘଟଣାର ପୁଙ୍ଖାନୁପୁଙ୍ଖ ତଦନ୍ତ ଦାବି କରିଛନ୍ତି ପରିବାର ଲୋକ । ସ୍ଵାମୀ ମଧ୍ୟ ସେମାନଙ୍କ ମଧ୍ୟରେ କୌଣସି ପ୍ରକାର ମନୋମାଳନ୍ୟ ନଥିବା କହିବା ପରେ ପୂରା ଘଟଣା ସନ୍ଦେହ ଘେରକୁ ଚାଲିଆସିଛି ।

ବିୟୁଟି ମହାନ୍ତିଙ୍କ ମୃତ୍ୟୁକୁ ନେଇ ରହସ୍ୟ ବଢୁଥିବାବେଳେ ତାଙ୍କର ଜଣେ ବାନ୍ଧବୀ ଅର୍ଗସ ନ୍ୟୁଜକୁ ବଡ଼ ସୂଚନା ଦେଇଛନ୍ତି । ପୋଲିସ ଅଧିକାରୀ ଜଣକ ସୁସ୍ଥ ମାନସିକତାରେ ଏଭଳି ଚରମ ନିଷ୍ପତ୍ତି ନେଇ ନଥାଇପାରନ୍ତି ବୋଲି ସେ ଦାବି କରିଛନ୍ତି । ବାରମ୍ବାର ସେ କହୁଥିଲେ ଲାଇଫ ବର୍ଡନ ହୋଇଗଲାଣି ।

ସେହିଭଳି ସୋସିଆଲ୍ ମିଡିଆରେ ମୋଟିଭେସନାଲ କୋଟ୍ ଗୁଡ଼ିକ ସେୟାର୍ କରୁଥିଲେ IIC ବିୟୁଟି ମହାନ୍ତି । ତାଙ୍କ ବାନ୍ଧବୀ କହିଛନ୍ତି, କେତେବେଳେ ଲଞ୍ଚ କରିଛନ୍ତି ନା ନାହିଁ ପଚାରିଲେ- ବ୍ରେକଫାଷ୍ଟ କରିବାକୁ ଭୁଲି ଯାଇଥିବା କହୁଥିଲେ ବିୟୁଟି ।

ଏଥିସହ ପଢ଼ନ୍ତୁ: ପ୍ରେମ ପାଇଁ ରଣକ୍ଷେତ୍ର ପାଲଟିଲା ରାଜଧାନୀ... ଭଙ୍ଗାରୁଜା ସହ ଆତଙ୍କରାଜ 

୨ରୁ ୩ ଥର ସେ ବ୍ରେକଫାଷ୍ଟ ଓ ଲଞ୍ଚ ଫେରାଇ ନେଇ ଘରେ ଫୋପାଡ଼ିଥିବା ସୂଚନା ଦେଇଥିଲେ । ତାଙ୍କ କାମର ଚାପକୁ ନେଇ ଘର ଲୋକ ମଧ୍ୟ ବ୍ୟସ୍ତ ହେଉଥିଲେ । ତେଣୁ ବନ୍ଧବୀ ଜଣକ ତାଙ୍କ ମୃତ୍ୟୁକୁ ସହଜରେ ଗ୍ରହଣ କରିପାର ନାହାନ୍ତି । ତାଙ୍କ ଉପରେ ଅନ୍ୟକିଛି ଚାପ ରହିଥିବା କଥା ସନ୍ଦେହ କରିଛନ୍ତି ବିୟୁଟିଙ୍କ ବାନ୍ଧବୀ ।

ପୂରା ଘଟଣାରେ କିଛି ଗୁଢ଼ ରହସ୍ୟ ଲୁଚି ରହିଥିବା ବିୟୁଟିଙ୍କ ସମ୍ପର୍କୀୟମାନେ ଅଭିଯୋଗ କରିବା ପରେ ଏହାର ପୁଙ୍ଖାନୁପୁଙ୍ଖ ତଦନ୍ତ ଜରୁରୀ ହୋଇପଡ଼ିଛି ।

ହେଲ୍ପଲାଇନ୍

ଯଦି ଆପଣଙ୍କୁ କିମ୍ବା ଆପଣଙ୍କ ଆଖପାଖରେ କେହି ପରିଚିତଙ୍କ ମନରେ ଆତ୍ମହତ୍ୟାର ଭାବନା ଆସୁଛି । ତାହେଲେ ଏହା ଗମ୍ଭୀର ଜରୁରୀକାଳୀନ ମେଡିକାଲ୍ ସ୍ଥିତି ଅଟେ । ଏଥିପାଇଁ ତୁରନ୍ତ ଭାରତ ସରକାରଙ୍କ ଜୀବନସାଥୀ ହେଲ୍ପଲାଇନ୍ 18002333330ରେ ସମ୍ପର୍କ କରନ୍ତୁ । ଟେଲିମାନସର ହେଲ୍ପଲାଇନ୍ 1800914416ରେ ମଧ୍ୟ ସମ୍ପର୍କ କରିପାରିବେ । ଏହି ହେଲ୍ପଲାଇନ୍‌ରେ ଆପଣଙ୍କ ପରିଚୟ ଗୋପନ ରଖାଯିବ ଏବଂ ବିଶେଷଜ୍ଞ ଆପଣଙ୍କୁ ସେହି ପରିସ୍ଥିତିରୁ ବାହାରିବାକୁ ଲାଗି ଆବଶ୍ୟକ ପରାମର୍ଶ ଦେବେ । ଜୀବନ ଥିଲେ, ସବୁ ଅଛି ।