Bhadrak Schools Closed / ଭଦ୍ରକରେ ବଡ଼ ନିଷ୍ପତ୍ତି: ବନ୍ୟା ପାଇଁ ୧୩୧ ବିଦ୍ୟାଳୟରେ ପାଠପଢ଼ା ବନ୍ଦ

ରାଜ୍ୟରେ ଚଳିତ ବର୍ଷ ଚତୁର୍ଥ ଥର ପାଇଁ ବନ୍ୟା ମାରିଛି ଚାବୁକ୍ । ବୁଡ଼ିଛି ଫସଲ, ଭାଙ୍ଗିଛି ଘର, ଆଉ ଆଣ୍ଠେଇ ପଡ଼ିଛି ଚାଷୀର ମେରୁଦଣ୍ଡ । ସମୁଦ୍ର ଭଳି ଦିଶୁଛି ଗାଁ ଗଣ୍ଡା, ରାସ୍ତାଘାଟରେ ଛାତିଏ ଉଚ୍ଚର ବନ୍ୟାପାଣି, ତା’ ଭିତରେ ବାସହରା ହୋଇ ପଡ଼ି ରହିଛନ୍ତି ହଜାର ହଜାର ଲୋକ ।

ଭଦ୍ରକ ଜିଲ୍ଲାରେ ଲଗାତାର ବର୍ଷା ଓ ବନ୍ୟା ପରିସ୍ଥିତି ଜାରି ରହିଥିବା ବେଳେ ଛାତ୍ରଛାତ୍ରୀଙ୍କ ସୁରକ୍ଷାକୁ ଗୁରୁତ୍ୱ ଦେଇ ଜିଲ୍ଲା ପ୍ରଶାସନ ପକ୍ଷରୁ ବଡ଼ ପଦକ୍ଷେପ ନିଆଯାଇଛି । ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଭଦ୍ରକ ଜିଲ୍ଲାର ୪ଟି ବ୍ଲକ୍‌ର ୧୩୧ଟି ପ୍ରଭାବିତ ବିଦ୍ୟାଳୟ ଆଜି ବନ୍ଦ ରହିବ । ଧାମନଗର ବ୍ଲକ୍‌ର ୬ଟି, ଭଦ୍ରକର ୧ଟି ଚାନ୍ଦବାଲିର ୭୩ଟି ଓ ତିହିଡ଼ିର ୫୧ଟି ସ୍କୁଲରେ ପାଠପଢ଼ା ଆଜି ବନ୍ଦ ରହିବ ।

ବନ୍ୟା ପରିସ୍ଥିତି ଏବଂ ଲଗାତାର ବର୍ଷା ଯୋଗୁଁ ଅନେକ ଅଞ୍ଚଳ ପ୍ରଭାବିତ ହୋଇଥିବାରୁ ବିଦ୍ୟାଳୟକୁ ଯାତାୟାତ ସମୟରେ ଛାତ୍ରଛାତ୍ରୀଙ୍କ ସୁରକ୍ଷା ପ୍ରତି ବିପଦ ରହିଛି । ଛାତ୍ରଛାତ୍ରୀଙ୍କ ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇ ବିଦ୍ୟାଳୟ ବନ୍ଦ ରଖିବାର ଏହି ନିଷ୍ପତ୍ତି ନିଆଯାଇଥିବା ବେଳେ ପରିସ୍ଥିତି ଅନୁଧ୍ୟାନ କରି ପରବର୍ତ୍ତୀ ନିଷ୍ପତ୍ତି ନିଆଯିବ ।
ସେପଟେ ହୀରାକୁଦ ଜଳଭଣ୍ଡାରକୁ କମୁଛି ଜଳ ପ୍ରବେଶ । ଆଜି ଆଉ ୧୦ଟି ଗେଟ୍ ବନ୍ଦ ହୋଇଛି । ବର୍ତ୍ତମାନ ହୀରାକୁଦ ଜଳଭଣ୍ଡାରର ଉପରମୁଣ୍ଡରୁ ଜଳ ପ୍ରବେଶ କମିବାରେ ଲାଗିଛି । ଫଳରେ ପର୍ଯ୍ୟାୟକ୍ରମେ ଗେଟ୍ ଗୁଡ଼ିକୁ ବନ୍ଦ କରାଯାଉଛି । ଗତ ମଧ୍ୟରାତ୍ରରୁ ପର୍ଯ୍ୟାୟ କ୍ରମେ ମୋଟ ୧୦ଟି ଗେଟ୍ ବନ୍ଦ କରାଯାଇଛି । ବର୍ତ୍ତମାନ ମାତ୍ର ୫ଟି ଗେଟ୍ ଦେଇ ଜଳ ନିଷ୍କାସନ ଜାରି ରହିଛି ।

ଆଜି ସକାଳ ୬ଟା ସୁଦ୍ଧା ଜଳଭଣ୍ଡାରର ଜଳସ୍ତର ୬୨୯.୬୦ ଫୁଟ୍ ରହିଛି । ଉପରମୁଣ୍ଡରୁ ସେକେଣ୍ଡ ପ୍ରତି ୨ ଲକ୍ଷ ୪ ହଜାର ୮୬୪ କ୍ୟୁସେକ ଜଳ ପ୍ରବେଶ କରୁଛି । ସେପଟେ ସେକେଣ୍ଡ ପ୍ରତି ୨ ଲକ୍ଷ ୧୭ ହଜାର ୫୬୯ କ୍ୟୁସେକ ଜଳ ନିଷ୍କାସନ ହେଉଛି ।

ସେହିପରି ରାଜ୍ୟରେ ଏବେ ପାଗରେ ପରିବର୍ତ୍ତନ ଜାରି ରହିଛି । ଆସନ୍ତା ୨ ଦିନ ପର୍ଯ୍ୟନ୍ତ ଓଡ଼ିଶାର ବିଭିନ୍ନ ଅଞ୍ଚଳରେ ହାଲୁକାରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଥିଲେ ବି, ବିଶେଷକରି ଉତ୍ତର ଓ ଉପକୂଳ ଓଡ଼ିଶାରେ ଘଡ଼ଘଡ଼ି ସହ ବର୍ଷା ହୋଇପାରେ । ଏଥିପାଇଁ ସମ୍ପୃକ୍ତ ଅଞ୍ଚଳଗୁଡ଼ିକ ପାଇଁ ୟେଲୋ ଆଲର୍ଟ ଜାରି କରାଯାଇଛି । ବର୍ଷା ସହ କେତେକ ସ୍ଥାନରେ ପବନର ବେଗ ମଧ୍ୟ ବଢ଼ିପାରେ । ପବନ ଘଣ୍ଟାପ୍ରତି ୩୦ରୁ ୪୦ କିଲୋମିଟର ବେଗରେ ପ୍ରବାହିତ ହେବାର ସମ୍ଭାବନା ରହିଛି । ଫଳରେ ବଜ୍ରପାତ ସମୟରେ ବାହାରକୁ ବାହାରିବା ବେଳେ ସତର୍କ ରହିବାକୁ ପରାମର୍ଶ ରହିଛି । ଆସନ୍ତା ୨ ତାରିଖରୁ ରାଜ୍ୟରେ ପାଗ ଧୀରେ ଧୀରେ ଶୁଖିଲା ହେବାର ସମ୍ଭାବନା ରହିଛି।