ଭଦ୍ରକ: ଜିଲ୍ଲା ଜେଲ୍‌ରେ ଯନ୍ତ୍ରଣାରେ ଷଢ଼ୁଛନ୍ତି ଅନ୍ତେବାସୀ । ସେପଟେ ନୂଆ ଜେଲ୍ ପାଲଟିଲାଣି ଭୂତକୋଠି । ଭଦ୍ରକ ଜିଲ୍ଲା କାରାଗାରରେ ଆବଶ୍ୟକ ଠାରୁ ଅଧିକ ଅନ୍ତେବାସୀ ରହିବାକୁ ନେଇ ସ୍ଥାନୀୟ ଅଞ୍ଚଳରେ ଜନ ଅସନ୍ତୋଷ ଦେଖିବାକୁ ମିଳିଛି ।

କାମରେ ଆସୁନି ନୂତନ ଜେଲ । ଫଳରେ କୋଟି କୋଟି ଟଙ୍କା ଖର୍ଚ୍ଚରେ ପ୍ରସ୍ତୁତ ହୋଇଥିବା ନୂତନ ଜେଲ୍ ପାଲଟିଛି ଭୂତକୋଠି । ବ୍ରିଟିଶ ସରକାର ଅମଳର ବହୁ ପୁରାତନ ଭଦ୍ରକ ଜେଲରେ ୨୦୧ ଜଣ ବିଚାରଧୀନ କଏଦୀ ରହିବା ପାଇଁ ବ୍ୟବସ୍ଥା ରହିଛି । କିନ୍ତୁ ଏବେ ଅଛନ୍ତି ୩୨୧ରୁ ଅଧିକ ଅନ୍ତେବାସୀ । ଫଳରେ ୧୦୦ରୁ ଅଧିକ ବିଚାରଧୀନ କଏଦୀଙ୍କୁ ପଡ଼ୋଶୀ ଜିଲ୍ଲାର କାରାଗାରରେ ରଖାଯାଇଛି ।

ଏଥିସହ ପଢ଼ନ୍ତୁ: ମୋହନ ସରକାରଙ୍କ ବଡ଼ ଘୋଷଣା; କେଜିରୁ ପିଜି ପର୍ଯ୍ୟନ୍ତ ମାଗଣାରେ ପଢ଼ିବେ ସମସ୍ତେ 

ଗତ ବିଜେଡି ସରକାରରେ ୨୦୨୨ରେ ନୂତନ ଜିଲ୍ଲା କାରାଗାର ପ୍ରକଳ୍ପକୁ ଅନୁମୋଦନ ମିଳିଥିଲା । ସ୍ଥାନୀୟ ଲୋକଙ୍କ ଅନୁମତି ନ ନେଇ ବହୁଦରଡ଼ାଠାରେ କୋଟି କୋଟି ଟଙ୍କା ଖର୍ଚ୍ଚ କରି ୧୮୦ କ୍ଷମତା ବିଶିଷ୍ଟ ଦୁଇ ମହଲା କୋଠା ଓ ରାସ୍ତା ନିର୍ମାଣ ସରିଲା । କିନ୍ତୁ ଏବେ ଚାଷ ଜମିକୁ ଯିବାରେ ସମସ୍ୟା ସହ ସ୍ଥାନୀୟ ମଶାଣି ବ୍ୟବହାରରେ ବାଧା ହେଉଥିବା ଅଭିଯୋଗ ହୋଇଛି ।

ଅନ୍ୟପଟେ ଭଦ୍ରକ ଜେଲରେ ଜାଗା ନଥିବାରୁ କଏଦୀମାନଙ୍କୁ ପଡ଼ୋଶୀ ବାଲେଶ୍ୱର କିମ୍ବା ସୋର ଜେଲ୍‌କୁ ପଠାଇ ଦିଆଯାଉଛି । ଯାହାଦ୍ୱାରା ସେମାନଙ୍କ ସମ୍ପର୍କୀୟମାନେ ଭେଟିବା ପାଇଁ ନାହିଁ ନଥିବା ହଇରାଣ ହେଉଛନ୍ତି । ଗ୍ରାମବାସୀଙ୍କ ବାରମ୍ବାର ଅଭିଯୋଗ ପରେ ସ୍ଥାନୀୟ ବିଧାୟକ, ସାଂସଦ, ଜିଲ୍ଲାପାଳ, ଏସପି ଏବଂ ଜେଲ କର୍ତ୍ତୃପକ୍ଷ ଘଟଣାସ୍ଥଳ ପରିଦର୍ଶନ କରି ସ୍ଥିତି ଅନୁଧ୍ୟାନ କରିଛନ୍ତି ।

ନୂତନ ଜେଲ ଓ ଲୋକଙ୍କୁ ହେଉଥିବା ସମସ୍ୟାକୁ ସ୍ଵୀକାର କରିଛନ୍ତି ଜିଲ୍ଲାପାଳ । କହିଛନ୍ତି- ଲୋକଙ୍କ ଦାବି ମୁତାବକ ଜେଲ୍ ପାଇଁ ଜାଗା ଛାଡ଼ିଲେ, ଏହା ସଂକୁଚିତ ହୋଇଯିବ ଏବଂ ସୁରକ୍ଷା ବିପନ୍ନ ହେବ । ତେଣୁ ଜେଲ୍ କର୍ତ୍ତୃପକ୍ଷ ବିକଳ୍ପ ଜମି ପାଇଁ ଜିଲ୍ଲା ପ୍ରଶାସନକୁ ଚିଠି ଲେଖିଛି । ପ୍ରଶାସନ ପକ୍ଷରୁ ଏବେ ଭଦ୍ରକ ସହର ଉପକଣ୍ଠ ଭଣ୍ଡାରିପୋଖରୀ ତହସିଲ ଅଞ୍ଚଳରେ ଏକ ନୂଆ ଜାଗା ଚିହ୍ନଟ କରାଯାଇଛି ।

ଏଥିସହ ପଢ଼ନ୍ତୁ: ନିଟ୍‌ ପରୀକ୍ଷାର୍ଥୀଙ୍କ ପାଇଁ ମାଗଣା ବସ୍‌ ସେବା,ଆଡମିଟ୍ କାର୍ଡ ଦେଖାଇଲେ ମିଳିବ ସୁବିଧା 

ଯଦି ବହୁଦରଡ଼ା ସ୍ଥାନଟି ଜେଲ୍ ନିର୍ମାଣ ପାଇଁ ଉପଯୁକ୍ତ ନଥିଲା ତେବେ ପୂର୍ବ ସରକାର ଏଠାରେ କାହିଁକି ଜେଲ ନିର୍ମାଣ କଲେ ? ସରକାରୀ ଅର୍ଥ ଅପଚୟ ପାଇଁ କାହାକୁ ଦାୟୀ କରାଯିବ ବୋଲି ଲୋକେ ପ୍ରଶ୍ନ କରୁଛନ୍ତି ।