Argus News - ମାନସିକ ବିକୃତ ମହିଳାଙ୍କୁ ଉଦ୍ଧାର ସହ ଟ୍ରକ୍‌ ଡ୍ରାଇଭରକୁ ଧରିଲା ପୋଲିସ, ବର୍ଷା ରାତିରେ ବାରଣ୍ଡାରୁ ଟେକି ନେଇଥିଲେ

ଭଦ୍ରକ: ଉଦ୍ଧାର ହେଲେ ମାନସିକ ବିକୃତ ମହିଳା । ଧରା ପଡ଼ିଲା ଟେକି ନେଇଥିବା ଟ୍ରକ୍ ଡ୍ରାଇଭର । ଚରମ୍ପ ଫାଣ୍ଡି ନିକଟ ଏକ ଦୋକାନ ବାରଣ୍ଡାରୁ ଅପହୃତ ମହିଳାଙ୍କୁ କେନ୍ଦୁଝର ଜିଲ୍ଲା ଝୁମ୍ପୁରାରୁ ଉଦ୍ଧାର କରିଛି ଭଦ୍ରକ ପୋଲିସ । ଏନେଇ ଟାଉନ ଥାନା ଅଧିକାରୀ ସୂଚନା ଦେଇଛନ୍ତି ।

ମାମଲାରେ ପୋଲିସ ଟ୍ରକ୍ ଡ୍ରାଇଭରକୁ ଅଟକ ରଖି ପଚରାଉଚରା କରୁଥିବା ବେଳେ ଟ୍ରକ୍‌କୁ ଜବତ କରିଛି । ଅକ୍ଚୋବର ୨ ତାରିଖ ବିଳମ୍ବିତ ରାତିରେ ଏହି ଅଘଟଣ ଘଟିଥିଲା । ଜାତୀୟ ରାଜପଥ ୧୬ର ଭଦ୍ରକ ଚରମ୍ପା ଫାଣ୍ଡି ନିକଟରେ ଏକ ଦୋକାନ ବାରଣ୍ଡାରୁ ମାନସିକ ବିକୃତ ମହିଳାଙ୍କୁ ଜୋର ଜବରଦସ୍ତ ଟେକି ନେଇଥିଲା ଟ୍ରକ୍ ଡ୍ରାଇଭର ।

ଏଥିସହ ପଢ଼ନ୍ତୁ: ରାତି ଅଧରେ ରାସ୍ତା କଡରୁ ମହିଳାଙ୍କୁ ଉଠାଇନେଲା ଡ୍ରାଇଭର, ସିସିଟିଭିରେ କଏଦ୍ ହେଲା ଦୃଶ୍ୟ

ଯାହାର ଭିଡିଓ ସିସିଟିଭିରେ ରେକର୍ଡ ହୋଇଥିଲା । ଭିଡିଓରେ ଦେଖା ଯାଉଛି, ୨ ତାରିଖ ରାତି ପ୍ରାୟ ୧୨ଟା ୪୦ରେ ଦୋକାନର ଅପରପାର୍ଶ୍ଵରେ ଯାଉଥିବା ଏକ ଟ୍ରକ୍ ମହିଳାଙ୍କୁ ଏକାକୀ ଦେଖି ଅଟକୁଛି । ଟ୍ରକ୍‌କୁ ଡ୍ରାଇଭର ପଛକୁ ନେବା ସହ ଗାଡ଼ିରୁ ଓହ୍ଲାଇ ଆସୁଛନ୍ତି । ପ୍ରାୟ ୧୩ ମିନଟ୍ ଧରି ଟ୍ରକ୍ ସେଇଠି ରଖିବା ସହ ଅଟକି ରହୁଛନ୍ତି ।

ଆଉ ରାତି ୧୨ଟା ୫୩ ମିନିଟ୍‌ରେ ରାସ୍ତା ପାର ହୋଇ ଅପରପାର୍ଶ୍ଵକୁ କିଛି ନ ଜାଣିଲା ଭଳି ଆସୁଛନ୍ତି ଟ୍ରକ୍ ଡ୍ରାଇଭର ଜଣଙ୍କ । ରାସ୍ତା ପାର୍ ହେବା ପରେ ଗୋଟିଏ ମିନିଟ୍ ଧରି ଏପେଟ ସେପଟ ହେଉଛନ୍ତି । ଆଉ ଠିକ୍ ଗୋଟିଏ ମିନିଟ୍ ପରେ ୧୨ଟା ୫୪ରେ ଛଞ୍ଚାଣ ଭଳି ମହିଳାଙ୍କ ଉପରେ ଝାମ୍ପି ହୋଇ ପଡ଼ୁଛନ୍ତି ।

ଏଥିସହ ପଢ଼ନ୍ତୁ: ପୁଣି ବର୍ଷାରେ ଭିଜିବ ଓଡ଼ିଶା, ବଙ୍ଗୋପସାଗରରେ ଆଉ ଏକ ଲଘୁଚାପ ସମ୍ଭାବନା

ହଠାତ୍ ବ୍ୟକ୍ତି ଜଣଙ୍କୁ ଦେଖି ମହିଳା ଜଣଙ୍କ ବ୍ୟାଗ୍ ନେଇ ପଳାଇବାକୁ ଉଦ୍ୟମ କରୁଥିଲେ ବି ସଫଳତା ମିଳି ନଥିଲା । ଶେଷରେ ୧୨ଟା ୫୫ରେ ମହିଳାଙ୍କୁ ଦୁଇ ହାତରେ ଟେକି ନେଇ ପଳାଇଥିଲେ ଟ୍ରକ୍ ଡ୍ରାଇଭର୍ । ଆଉ ସିସିଟିଭି ଫୁଟେଜ୍‌କୁ ଆଧାର କରି ପୋଲିସ ଛାନଭିନ୍ ଆରମ୍ଭ କରିଥିବା ବେଳେ କେନ୍ଦୁଝର ଝୁମ୍ପୁରା ଅଞ୍ଚଳରେ ସଫଳତା ମିଳିଛି । ମହିଳା ଉଦ୍ଧାର ହୋଇଥିବା ବେଳେ ଡ୍ରାଇଭରକୁ ଅଟକ ରଖି ପଚରାଉଚରା କରୁଛି ପୋଲିସ ।

ଟ୍ରକ୍‌ରେ ମାନସିକ ବିକୃତ ମହିଳାଙ୍କୁ ଡ୍ରାଇଭର ଟେକି ନେବା ପରେ କିଛି ଅଘଟଣ ଘଟିଛି କି ? କେଉଁ ଉଦ୍ଦେଶ୍ୟରେ ମହିଳାଙ୍କୁ ଟେକି ନେଇ ଯାଇଥିଲେ ଟ୍ରକ୍ ଡ୍ରାଇଭର ? ଏବେ ଏସବୁ ଦିଗରେ ପୋଲିସ ତଦନ୍ତ କରିବା ସହ ଅଟକ ରଖିଥିବା ଡ୍ରାଇଭରକୁ ପଚରାଉଚରା କରୁଛି ।