Bhubaneswar Ring Road / ଟ୍ରାଫିକ୍ ଜାମ୍‌ରେ ଲାଗିବ ବ୍ରେକ୍‌ ! ଭୁବନେଶ୍ୱରକୁ ଘେରିବ ୧୨୯ କିମିର ରିଙ୍ଗରୋଡ୍‌

ଏଣିକି ଟ୍ରାଫିକ୍ ଜାମ୍‌ରେ ଲାଗିବ ବ୍ରେକ୍‌ । ରାଜଧାନୀ ଭୁବନେଶ୍ୱରକୁ ଘେରିବ ୧୨୯ କିମିର ରିଙ୍ଗରୋଡ୍‌ । ଭୁବନେଶ୍ୱରର ଟ୍ରାଫିକ୍‌ ବ୍ୟବସ୍ଥାକୁ ବଦଳାଇବାକୁ ସରକାର ମେଗା ପ୍ଲାନ୍‌ କରିଛନ୍ତି । ଆସୁଛି ଆଉଟର ରିଙ୍ଗରୋଡ୍‌ । ଖୁବଶୀଘ୍ର ଆରମ୍ଭ ହେବ ଆଉଟର ରିଙ୍ଗରୋଡ୍‌ କାମ । ଏନେଇ ଆଜି ଲୋକସେବା ଭବନରେ ପୂର୍ତ୍ତମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିଲା ଗୁରୁତ୍ୱପୂର୍ଣ୍ଣ ବୈଠକ । ବୈଠକରେ ରିଙ୍ଗରୋଡ୍‌ର ଆଲାଏନମେଣ୍ଟ ମଧ୍ୟ ସ୍ଥିର ହୋଇଛି ।

• ରାଜଧାନୀରେ କମିବ ଟ୍ରାଫିକ ଯନ୍ତ୍ରଣା

ରାଜଧାନୀ ଭୁବନେଶ୍ଵରରେ ଯିବାଆସିବା କରିବା ବେଳେ ସବୁଠୁ ବଡ଼ ଚିନ୍ତା ପାଲଟେ ଟ୍ରାଫକ ଜାମ୍ । ଖାଲି ଗଳିକନ୍ଦି ନହେଁ ରାଜ୍ୟ ରାଜପଥରୁ ନେଇ ଜାତୀୟ ରାଜପଥ ସବୁଠି ମାଳ ମାଳ ଗାଡ଼ି । ପ୍ରବଳ ଜାମ୍ । ଏମିତିରେ ଏଥିରୁ ଖୁବ ଶୀଘ୍ର ମିଳିବ ମୁକ୍ତି । କାହିଁକ ନା ଟ୍ରାଫିକ୍ ଟେନସନ କମାଇବାକୁ ମାଷ୍ଟରପ୍ଲାନ ପ୍ରସ୍ତୁତ କରିଛନ୍ତି ରାଜ୍ୟ ସରକାର । ନିର୍ମାଣ ହେବାକୁ ଯାଉଛି ୧୨୯ କିମିର ଆଉଟର ରିଙ୍ଗରୋଡ୍ ।

• କେଉଁ ଅଞ୍ଚଳକୁ ଘେରିବ ରିଙ୍ଗ ରୋଡ୍ ?

କ୍ୟାପିଟାଲ ରିଜନ ରିଙ୍ଗରୋଡରେ ଏହା ଯୋଡ଼ିବ ଅତିରିକ୍ତ ୯୦ କିଲୋମିଟର । ବାଘମାରିରୁ ଚୌଦ୍ୱାର । ପୁରୀରୁ ପିପିଲି ଆଉ ଖୋର୍ଦ୍ଧାରୁ ଭୁବନେଶ୍ୱର । ଏହି ସବୁ ଅଞ୍ଚଳକୁ ଘେରି ତିଆରି ହେବ ରିଙ୍ଗ୍‌ ରୋଡ୍‌ର ବଡ଼ ନେଟୱର୍କ । ଯାହା ଭିତରେ ରହିବ କଟକ, ଭୁବନେଶ୍ୱର, ପୁରୀ, ପିପିଲି, ଖୋର୍ଦ୍ଧା ଓ ଚୌଦ୍ୱାର ମ୍ୟୁନିସିପାଲିଟି ଅଞ୍ଚଳ । ଅର୍ଥାତ ସହର ଭିତରକୁ ନପସି ମଧ୍ୟ ବାହାରୁ ବାହାରୁ ଗନ୍ତବ୍ୟ ସ୍ଥଳରେ ପହଞ୍ଚିହେବ ।

ପଢନ୍ତୁ ଏହି ଖବର: ସମ୍ବଲପୁର ହେବ ‘ସ୍କିଲ୍ ଲ୍ୟାବ୍’, ଗାଁ ଗାଁରେ ତିଆରି ହେବେ କଣ୍ଟେଣ୍ଟ କ୍ରିଏଟର- ଧର୍ମେନ୍ଦ୍ର ପ୍ରଧାନ

• ଗୋଟିଏ ନୁହେଁ ଏକାଧିକ ରାସ୍ତାର ମାଷ୍ଟରପ୍ଲାନ

ତେବେ ରିଙ୍ଗ ରୋଡ୍ ସହ ଆଉ ଦୁଇଟି ଏଲିଭେଟେଡ୍‌ ରାସ୍ତାକୁ ମଧ୍ୟ ମିଳିଛି ଗ୍ରୀନ୍‌ ସିଗନାଲ୍ । କଳିଙ୍ଗ ଷ୍ଟୁଡିଓ ଛକରୁ ନୂଆଗାଁ । ରଘୁନାଥପୁରରୁ ତ୍ରିଶୁଳିଆ । ଏହି ଦୁଇ ଏଲିଭେଟେଡ୍‌ ରାସ୍ତା ପାଇଁ ମଧ୍ୟ ଖୁବ ଶୀଘ୍ର ଆରମ୍ଭ ହେବ ଟେଣ୍ଡର ପ୍ରକ୍ରିୟା । ଅକ୍ଟୋବର ପ୍ରଥମ ସପ୍ତାହ ପୂର୍ବରୁ ଏହି ସବୁ ରାସ୍ତା ପାଇଁ ଫାଉଣ୍ଡେସନ୍‌ ଷ୍ଟୋନ୍‌ ପଡ଼ିବ ବୋଲି କହିଛନ୍ତି ମନ୍ତ୍ରୀ । ଖାଲି ଏତିକି ନୁହେଁ ବାରଙ୍ଗ–ପଳାଶୁଣୀ, ସୁନ୍ଦରପଦା–ଜଟଣୀ, ଭଳି ରାସ୍ତାର   ଆଲାଏନମେଣ୍ଟ ମଧ୍ୟ ସ୍ଥିର ହୋଇଛି । ସେପଟେ ଜୟଦେବ ବିହାରରୁ ନନ୍ଦନକାନନ ରାସ୍ତାର ମାଟି ପରୀକ୍ଷା ଚାଲିଛି । ଖୁବଶୀଘ୍ର ଏହାର ଟେଣ୍ଡର ହେବ ବୋଲି କହିଛନ୍ତି ପୂର୍ତ୍ତମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ।