Argus News - ଯାତ୍ରୀ ପରିବହନରେ ଭୁବନେଶ୍ଵର ବିମାନବନ୍ଦରର ସର୍ବକାଳୀନ ରେକର୍ଡ

ଭୁବନେଶ୍ଵର: ପୁରୁଣା ବର୍ଷରେ ନୂଆ ରେକର୍ଡ । ସର୍ବକାଳୀନ ରେକର୍ଡ କଲା ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର । ଯାତ୍ରୀ ପରିବହନରେ ଭୁବନେଶ୍ଵର ଅନ୍ତର୍ଜାତୀୟ ବିମାନବନ୍ଦର ନୂଆ ରେକର୍ଡ କରିଛି । ୨୦୨୫ ବର୍ଷରେ ଭୁବନେଶ୍ଵର ବିମାନବନ୍ଦରରେ ୫.୧୫ ମିଲିୟନ୍ ଯାତ୍ରୀ ଯାତାୟାତ କରିଛନ୍ତି ।

ଅର୍ଥାତ୍ ପ୍ରଥମଥର ପାଇଁ ଗୋଟିଏ ବର୍ଷରେ ଭୁବନେଶ୍ଵର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରେ ୫୦ ଲକ୍ଷରୁ ଅଧିକ ଯାତ୍ର ଯାତାୟାତ କରିଛନ୍ତି । ଯାହାକି ଭୁବନେଶ୍ଵର ଅନ୍ତର୍ଜାତୀୟ ବିମାନବନ୍ଦର ପାଇଁ ନୂଆ ଉପଲବ୍ଧି ଆଣି ଦେଇଛି ।

ଏଥିସହ ପଢ଼ନ୍ତୁ: ଘର ଚଳାଇବାକୁ ଟଙ୍କା ଧାର ଆଣିଥିଲେ, ଶୁଝି ନପାରି ସମ୍ପର୍କୀୟଙ୍କ ହାତକୁ ଶିଶୁ କନ୍ୟାକୁ ଟେକିଦେଲେ

ଯାହାକୁ ନେଇ ଭୁବନେଶ୍ଵର ଅନ୍ତର୍ଜାତୀୟ ବିମାନବନ୍ଦରର ନିର୍ଦ୍ଦେଶକ ପ୍ରସନ୍ନ ପ୍ରଧାନ କହିଛନ୍ତି, "ପ୍ରଥମଥର ପାଇଁ ଆମେ ଏଭଳି ସଫଳତା ପାଇଛୁ । ୨୦୨୫ରେ ୫.୧୫ ମିଲିୟନ୍ ଯାତ୍ରୀ ଭୁବନେଶ୍ଵର ବିମାନବନ୍ଦର ଦେଇ ଯାତାୟାତ କରିଛନ୍ତି । ସର୍ବାଧିକ ଯାତ୍ରୀ ଯାତାୟାତରେ ଭୁବନେଶ୍ଵର ବିମାନବନ୍ଦର ଦେଶରେ ୧୩ତମ ସ୍ଥାନରେ ରହିଛି ।"

ସେ ଆହୁରି କହିଛନ୍ତି, "୨୦୨୫ରେ କୁହୁଡ଼ି ଯୋଗୁଁ ଭୁବନେଶ୍ଵର ବିମାନବନ୍ଦରରେ ବିମାନ ସେବା ପ୍ରଭାବିତ ହୋଇଥିଲା । ୨ ଦିନ ବିମାନ ସେବା ପ୍ରଭାବିତ ହୋଇ ବିଳମ୍ବିତ ହୋଇଥିଲା । ସେ ସମୟରେ ଆମେ ଏକାଠି କାର୍ଯ୍ୟ କରି ସମସ୍ୟାର ସମାଧାନ କରିଥିଲୁ । କୁହୁଡ଼ି ଉପରେ ନଜର ରଖି କାର୍ଯ୍ୟ କରୁଛୁ, ଯାତ୍ରୀଙ୍କୁ କୌଣସି ଅସୁବିଧା ହେବ ନାହିଁ ।"

ଏଥିସହ ପଢ଼ନ୍ତୁ: ଶିକ୍ଷା ଦେଇଗଲା ୧୯ ବର୍ଷର ଝିଅ; ଜୀବନ ନେଇଗଲା ପିରିୟଡ୍ସ

ଏବେ ଭୁବନେଶ୍ଵର ଅନ୍ତର୍ଜାତୀୟ ବିମାନବନ୍ଦରରୁ ୨୮ଟି ସ୍ଥାନକୁ ବିମାନ ଉଡ଼ାଣ କରୁଛି । ଅଧିକ ସ୍ଥାନକୁ ଭୁବନେଶ୍ଵରରରୁ ବିମାନ ଉଡ଼ାଣ କଲେ ଯାତ୍ରୀ ସଂଖ୍ୟା ଆହୁରି ବୃଦ୍ଧି ପାଇବ ବୋଲି କହିଛନ୍ତି ବିଜୁ ପଟ୍ଟନାୟକ ବିମାନବନ୍ଦରର ନିର୍ଦ୍ଦେଶକ ।

ଏବେ ଭୁବନେଶ୍ଵରୁ ଇଣ୍ଡିଗୋ, ଏୟାର ଇଣ୍ଡିଆ ଏବଂ ଆକାଶା ଏୟାରଲାଇନ୍ସ ବିମାନ ଚଳାଚଳ କରୁଛି । ଭୁବନେଶ୍ଵରରୁ ଦିଲ୍ଲୀ, ବେଙ୍ଗାଳୁରୁ, ହାଇଦ୍ରାବାଦ, ବାରଣାସୀ, ମୁମ୍ବାଇ, ଇନ୍ଦୋର, ରାୟପୁର, ଗୁଆହାଟି, କୋଲକାତା, ରାଞ୍ଚି, ପୁନେ ଆଦି ସ୍ଥାନକୁ ବିମାନ ଚଳାଚଳ କରୁଛି । ସେହିଭଳି ଅନ୍ତର୍ଜାତୀୟ ମାର୍ଗରେ ଭୁବନେଶ୍ଵର ସହ ଦୁବାଇ, ସିଙ୍ଗାପୁର ଓ ବ୍ୟାଙ୍କଂକ ଯୋଡ଼ି ହୋଇଛି ।