Crime In Odisha / ପରୀକ୍ଷା ସେଣ୍ଟରରେ ଉପରେ ରଖୁଥିଲା ନଜର; ପରୀକ୍ଷାର୍ଥୀ ଯିବା ପରେ ଡିକି ଭାଙ୍ଗି କରୁଥିଲା ଲୁଟ୍

ଭୁବନେଶ୍ଵର: ପରୀକ୍ଷା ହଲ୍ ବାହାରେ ଛାତ୍ରଛାତ୍ରୀ ସ୍କୁଟିରେ ରଖୁଥିବା ଫୋନ୍‌କୁ ଦେଢ଼ ବର୍ଷ ଧରି ଲୁଟୁଥିଲା ଅଭିଯୁକ୍ତ । ଚୋରି ପରେ ମୋବାଇଲ୍‌କୁ ସିଧାସଳଖ ନ ବିକି ପାର୍ଟ୍ସ ବିକ୍ରି କରୁଥିଲା । ପାର୍ଟ କିଣୁଥିବା ବ୍ୟବସାୟୀ ରାକେଶ ସାହୁ ମଧ୍ୟ ପୋଲିସ ହାତରେ ଧରାପଡ଼ିଛି । ଦାମୀ ମୋବାଇଲ୍‌କୁ ମାତ୍ର ୫ରୁ ୬ ହଜାର ଟଙ୍କାରେ ବିକି ହୋଟେଲରେ ରହିବା ସହ ଖେଳୁଥିଲା ଅନଲାଇନ୍ ଗେମ୍ ।

ରାଜଧାନୀର ବିଭିନ୍ନ ପରୀକ୍ଷା କେନ୍ଦ୍ର ଥିଲା ଚୋରର ଟାର୍ଗେଟ୍ । ପରୀକ୍ଷା ହଲ୍ ଭିତରେ ନୁହେଁ, ହଲ୍ ବାହାରେ ରହୁଥିଲା ଅଭିଯୁକ୍ତର ନଜର । ଛାତ୍ରଛାତ୍ରୀ ପରୀକ୍ଷା ଦେବାକୁ ଯିବା ପୂର୍ବରୁ ନିଜ ମୋବାଇଲ୍ ଫୋନ୍‌କୁ ସ୍କୁଟିରେ ରଖି ଯାଉଥିଲେ । ଆଉ ଏହି ସୁଯୋଗର ଫାଇଦା ଉଠାଉଥିଲା ଅଭିଯୁକ୍ତ ଦୁଷ୍ମନ୍ତ ସୁବୁଦ୍ଧି ।

ସ୍କୁଟିରେ ଥିବା ମୋବାଇଲ୍‌କୁ ଟାର୍ଗେଟ୍ କରି ଚୋରି କରି ଫେରାର୍ ହୋଇ ଯାଉଥିଲା । ଗତ ଦେଢ଼ ବର୍ଷ ଧରି ଏଭଳି ଢଙ୍ଗରେ ମୋବାଇଲ୍ ଚୋରି କରୁଥିବା ପୋଲିସ ତଦନ୍ତରୁ ଜଣାପଡ଼ିଛି । ପରୀକ୍ଷା ସେଣ୍ଟରରେ ଛାତ୍ରଛାତ୍ରୀଙ୍କ ଭିଡ଼ ଓ ସ୍କୁଟିରେ ମୋବାଇଲ୍ ରଖିବା ଅଭ୍ୟାସକୁ ହିଁ ନିଜ ଚୋରିର ହତିଆର କରିଥିଲା ଅଭିଯୁକ୍ତ ।

ଏଥିସହ ପଢ଼ନ୍ତୁ: ହୁତୁହୁତୁ ହୋଇ ଜଳିଗଲା ପୂଜା ପେଣ୍ଡାଲ୍‌; ଅକ୍ଷତ ରହିଲେ ଶ୍ରୀଗଣେଶ 

ଚୋରି କରିବା ପରେ ମୋବାଇଲ୍‌କୁ ନେଇ ପହଞ୍ଚୁଥିଲା ବାପୁଜୀ ନଗର । ସେଠାରେ ରାକେଶ କୁମାର ସାହୁଙ୍କୁ ମୋବାଇଲ୍ ଦେଉଥିଲା ଦୁଷ୍ମନ୍ତ । ପରେ ରାକେଶ ମୋବାଇଲ୍‌କୁ ଖୋଲି ଏହାର ବିଭିନ୍ନ ପାର୍ଟ୍ସ ବିକ୍ରି କରୁଥିବା ଅଭିଯୋଗ ହୋଇଛି । ଧରା ପଡ଼ିବା ଭୟରେ ମୋବାଇଲ୍‌କୁ ସିଧାସଳଖ ବିକ୍ରି ନକରି ପାର୍ଟ୍ସ କରି ବିକ୍ରି କରାଯାଉଥିଲା ।

ଦାମୀ ଦାମୀ ମୋବାଇଲ୍ ମଧ୍ୟ ୫ରୁ ୬ ହଜାର ଟଙ୍କାରେ ବିକ୍ରି ହେଉଥିଲା । ଏପଟେ ଚୋରି ଟଙ୍କାରେ ଅୟସ କରୁଥିଲା ଦୁଷ୍ମନ୍ତ । ହୋଟେଲ୍‌ରେ ରହିବା ସହ ଗେମ୍ ଖେଳି ଟଙ୍କା ଉଡ଼ାଉଥିବା ତଦନ୍ତରୁ ଜଣାପଡ଼ିଛି ।

କେବଳ ମୋବାଇଲ୍ ଚୋରି ନୁହେଁ, ଚୋରି କରିଥିବା ଫୋନ୍‌ରୁ ଫୋନ୍ ପେ’ରେ ଟ୍ରାଞ୍ଜାକ୍ସନ୍ ମଧ୍ୟ କରୁଥିଲା ଅଭିଯୁକ୍ତ । ଏବେ ଦୁଷ୍ମନ୍ତ ଗିରଫ ପରେ ଏହି ମୋବାଇଲ୍ ଚୋରି ରାକେଟ୍‌ର ଆହୁରି କିଏ କିଏ ସାମିଲ୍ ଅଛନ୍ତି, ସେ ନେଇ ତଦନ୍ତ ଚଲାଇଛି ପୋଲିସ । ଆବଶ୍ୟକ ପଡ଼ିଲେ ଚାଲାକ ଚୋର ଦୁଷ୍ମନ୍ତକୁ ରିମାଣ୍ଡରେ ଆଣି ଜେରା କରିପାରେ କମିସନରେଟ ପୋଲିସ ।