Bhubaneswar Waterlogging / ଲଗାଣ ବର୍ଷାରେ ବେହାଲ ରାଜଧାନୀ, ସ୍ମାର୍ଟ ସିଟିରେ ଜଳବନ୍ଦୀ ସମସ୍ୟାରେ ଅତିଷ୍ଠ ଲୋକ

ଲଗାଣ ବର୍ଷାରେ ବେହାଲ ରାଜଧାନୀ । ରାଜଧାନୀ ଉପକଣ୍ଠସ୍ଥ ହଂସପାଳ, ହରିଦାସପୁର, ମିଲେନିୟମ ସିଟି, ଜିଜିପି କଲୋନୀ ହୋଇଛି ଜଳମଗ୍ନ । ରାସ୍ତା ଉପରେ ଆଣ୍ଠୁଏ ଉଚ୍ଚର ପାଣି, ଘରେ ଜମିଛି ଅଣ୍ଟାଏ ଉଚ୍ଚର ବର୍ଷା ଜଳ । ଉପାନ୍ତ ଅଞ୍ଚଳ ପରି ରାଜଧାନୀରେ ଜଳବନ୍ଦୀ ସମସ୍ୟା ଭୋଗୁଛନ୍ତି ଅଞ୍ଚଳବାସୀ । ଏପରି ସ୍ଥିତିକୁ ନେଇ ମହାନଗର ନିଗମର ମାଷ୍ଟର ପ୍ଲାନ୍ ଉପରେ ପ୍ରଶ୍ନ ଉଠିଛି ।

ରାସ୍ତାରେ ଆଣ୍ଠୁଏ ପାଣି । କୌଣସି ଉପାନ୍ତ ଅଞ୍ଚଳର ଦୁର୍ଗମ ଇଲାକା ନୁହେଁ, ବରଂ ଏହା ହେଉଛି ଖୋଦ୍ ସ୍ମାର୍ଟ ସିଟି ଭୁବନେଶ୍ୱରର ଉପକଣ୍ଠ । ବର୍ଷା ଦିନେ ଏସବୁ ସ୍ଥାନର ସ୍ଥିତି ନ କହିବା ଭଲ । ସାମାନ୍ୟ ବର୍ଷାରେ କେଉଁଠି ରାସ୍ତା ଉପରେ ଆଣ୍ଠୁଏ ଲେଖାଏଁ ପାଣି ଚାଲୁଛି ତ ଆଉ କେଉଁଠି ଘରେ ଜମିଛି ଅଣ୍ଟାଏ ଉଚ୍ଚର ବର୍ଷା ଜଳ । ବାହାରକୁ ବାହାରିବା ମଧ୍ୟ କଷ୍ଟକର ହୋଇପଡ଼ିଛି । ଏସବୁ ଭିତରେ ଲୋକଙ୍କ ମଧ୍ୟରେ ବିଏମସି ବିରୋଧରେ ଦେଖିବାକୁ ମିଳିଛି ପ୍ରବଳ ଜନ ଅସନ୍ତୋଷ । ଲକ୍ଷ୍ମୀସାଗର ଥାନା ଅଞ୍ଚଳ ଜିଜିପି କଲୋନୀର ତାରିଣୀ ବସ୍ତି ଓ ଜଗନ୍ନାଥ ବସ୍ତିରେ ସୃଷ୍ଟି ହୋଇଛି ଜଳବନ୍ଦୀ ପରିସ୍ଥିତି । ଖୋଦ୍ ପୋଲିସ କମିଶନର ଏସ ଦେବଦତ୍ତ ସିଂ ପ୍ରଭାବିତ ଅଞ୍ଚଳକୁ ଯାଇ ବସ୍ତିବାସୀଙ୍କ ସହ ଆଲୋଚନା କରିବା ସହିତ ଶୁଖିଲା ଖାଦ୍ୟ ସାମଗ୍ରୀ ବଣ୍ଟନ କରିଛନ୍ତି ।

ଅନେକ ଲୋକ ଜୀବନର ସମସ୍ତ ପୁଞ୍ଜି ବିନିଯୋଗ କରି ରାଜଧାନୀରେ ଘର କରି ରହିବାକୁ ସ୍ଵପ୍ନ ଦେଖିଥାନ୍ତି । ଭାବିଥାନ୍ତି ରାସ୍ତାଘାଟ, ଡ୍ରେନ୍, ପାନୀୟ ଜଳର ସୁବିଧା ସବୁକିଛି ଠିକ ଥିବ । ହେଲେ ବର୍ଷା ଦିନ ଆସିଲେ ପ୍ରଶାସନିକ ଅପାରଗତା ପାଇଁ ନାକେଦମ ହେଉଛନ୍ତି ଲୋକ । ଭୁବନେଶ୍ଵର ମହାନଗର ନିଗମ ପକ୍ଷରୁ ଏସବୁ ଅଞ୍ଚଳ ଗୁଡ଼ିକରେ ଡ୍ରେନେଜ୍ ଭିତ୍ତିଭୂମି ପ୍ରତି ଅଣଦେଖା ଅଭିଯୋଗ ହୋଇଛି । ରାସ୍ତାଘାଟ ବିପର୍ଯ୍ୟସ୍ତ ହୋଇ ପଡ଼ି ରହିଥିବା ବେଳେ ସାମାନ୍ୟ ବର୍ଷାରେ ଲୋକଙ୍କ ସମସ୍ୟା ବଢୁଛି । ବିଭାଗୀୟ କର୍ତ୍ତୃପକ୍ଷ କେବଳ ସ୍ଥିତି ସୁଧୁରିବ ବୋଲି ପ୍ରତିଶ୍ରୁତି ଦେଇ ଚାଲିଛନ୍ତି, ଯାହା ପାଣିର ଗାର ପାଲଟୁଛି ।

ରାଜଧାନୀବାସୀଙ୍କ ସମସ୍ୟା ବଢୁଥିବାରୁ ମହାନଗର ନିଗମର ମାଷ୍ଟର ପ୍ଲାନ୍ ଉପରେ ମଧ୍ୟ ପ୍ରଶ୍ନ ଉଠିଛି । ସହରର ଉପକଣ୍ଠରେ ଜଳବନ୍ଦୀ ସମସ୍ୟା କେବେ ଦୂର ହେବ ? କେବେ ଆଶ୍ବସ୍ତ ହେବେ ପ୍ରଭାବିତ ଜନସାଧାରଣ? ଏହା ଏବେ ସବୁଠାରୁ ବଡ଼ ପ୍ରଶ୍ନ ହୋଇଛି ।