ବର୍ଷର ଶେଷ ସାତ ଦିନରେ ରାଜଧାନୀବାସୀ ପିଇଦେଲେ ୩୨ କୋଟି ଟଙ୍କାର ମଦ । ଭୁବନେଶ୍ବରବାସୀ ଅଢେଇ ଲକ୍ଷ ଲିଟର ବିଦେଶୀ ମଦ ସାଙ୍ଗକୁ ଦେଢ ଲକ୍ଷ ଲିଟର ଦେଶୀ ମଦ ପିଇଛନ୍ତି । ସେହିଭଳି ୧ ଲକ୍ଷ ୭୮ ହଜାର ଲିଟର୍‌ ବିୟର୍‌ ପିଇଛନ୍ତି । ମୋଟ ୩୨ କୋଟି ୫୫ ଲକ୍ଷ ୧୨ ହଜାର ୫୬୦ ଟଙ୍କାର ମଦ ପିଇ ବର୍ଷକୁ ବିଦାୟ ଦେଇଛନ୍ତି ରାଜଧାନୀବାସୀ ।

ଡିସେମ୍ବର ୨୫ ବଡ଼ ଦିନଠାରୁ ଜିରୋ ନାଇଟ୍ ରାଜଧାନୀର କ୍ଲବ, ପବ୍‌, ଅଫ୍‌ ସପ୍‌ ସହ ଦେଶୀ ମଦ କାଉଣ୍ଟରରେ ବିପୁଳ ପରିମାଣର ମଦ ବିକ୍ରି ହୋଇଛି । ଅବକାରୀ ବିଭାଗ ତଥ୍ୟ କହୁଛି ଡିସେମ୍ବର୍ ୨୫ରୁ ୩୧ ତାରିଖ ମଧ୍ୟରେ ରାଜଧାନୀବାସୀ ୨୮ କୋଟି ୪ ଲକ୍ଷ ୮୧ ହଜାର ୫୬୦ ଟଙ୍କାରେ ୨ ଲକ୍ଷ ୮୦ ହଜାର ୪୮୧ ଲିଟର ବିଦେଶୀ ମଦ ପିଇଥିବା ବେଳେ ୩ କୋଟି ୫୬ ଲକ୍ଷ ୧୧ ହଜାର ଟଙ୍କାର ୧ ଲକ୍ଷ ୭୮ ହଜାର ୫୫ ଲିଟର ବିୟର୍ ପିଇଛନ୍ତି । ସେହିଭଳି ୯୪ ଲକ୍ଷ ୨୦ ହଜାର ଟଙ୍କାର ଦେଶୀ ମଦ ପିଇଛନ୍ତି । ମଦ ପିଇ ନୂଆବର୍ଷକୁ ବେଶ ଉତ୍ସାହ ସହକାରେ ଲୋକମାନେ ପାଳନ କରିବା ସହ ଜିରୋ ନାଇଟରେ ସହରବାସୀ ମତୁଆଲା ହୋଇଛନ୍ତି ।