Minor Boys Missing / ଘରୁ ଟିଉସନ୍ ଯାଇ ୩ ନାବାଳକ ନିଖୋଜ; ଦୁଇ ଦିନ ପରେ ବି ମିଳୁନି ପତ୍ତା

ଭୁବନେଶ୍ଵର: ରାଜଧାନୀରେ ଘରୁ ଟିଉସନ୍ ଯାଇ ୩ ନାବାଳକ ନିଖୋଜ ଘଟଣା । ଦୁଇଦିନ ବିତି ଯାଇଥିଲେ ମଧ୍ୟ ତିନିଜଣଙ୍କ ମିଳିନି ପତ୍ତା । ଚନ୍ଦ୍ରଶେଖରପୁର ଥାନାରେ ଅଭିଯୋଗ ପରେ ଗତକାଲିଠାରୁ ପୋଲିସ କରୁଛି ତନାଘନା । ୩ଟି ଟିମ୍ ଗଠନ କରି ଖୋଜିବା ସହ ଡିସିପି କରୁଛନ୍ତି ମନିଟର । ସିସିଟିଭି ଫୁଟେଜ୍ ଜରିଆରେ ଚାଲିଛି ସର୍ଚ୍ଚ ଅପରେସନ । ରେଲୱେ ଷ୍ଟେସନ୍, ଚନ୍ଦ୍ରଶେଖରପୁର ଏବଂ ପଥରଗାଡ଼ିଆ ଅଞ୍ଚଳରେ ସର୍ଚ୍ଚ ଅପରେସନ ଜାରି ରହିଛି ।

• ରାତି ତମାମ ଖୋଜିଛି ପୋଲିସ

ଆଜି ଭୋରୁ ପୁଣିଥରେ ବାପାମାଆ ସମେତ ସୀତାନାଥ ଓ ଆଦର୍ଶ ବସ୍ତି ଅଞ୍ଚଳର ଲୋକେ ଆରମ୍ଭ କରିଛନ୍ତି ଖୋଜାଖୋଜି । ନାବାଳକମାନେ ମୋବାଇଲ୍ ବ୍ୟବହାର କରୁନଥିବାରୁ ରାତି ତମାମ ଖୋଜିଛି ପୋଲିସ । ତିନି ପିଲାଙ୍କୁ ଖୋଜିବା ଚ୍ୟାଲେଞ୍ଜ ହୋଇଥିବା ବେଳେ ପିଲାଙ୍କୁ ଖୋଜି ଆଣିବାକୁ ସରକାରଙ୍କୁ ଆକୁଳ ନିବେଦନ କରିଛନ୍ତି ତିନି ପିଲାଙ୍କ ବାପାମାଆ । ପୋଲିସ ଟିଉସନ୍ ଶିକ୍ଷକଙ୍କଠାରୁ ଆରମ୍ଭ କରି ତିନି ନିଖୋଜ ପିଲାଙ୍କ ସାଙ୍ଗସାଥୀ, ଘରଲୋକ ସମସ୍ତଙ୍କୁ ପଚରାଉଚରା କରୁଛି । ତାଙ୍କୁ ଶେଷ ଥର ଲାଗି କେଉଁଠି ଦେଖାଯାଇଥିଲା, କିପରି ସ୍ଥିତିରେ ଦେଖାଯାଇଥଲା ସେସବୁ ନେଇ ମଧ୍ୟ ପୋଲିସ ତଦନ୍ତ କରୁଛି ।

ସେପଟେ ପୁଅକୁ ନ ପାଇ କାନ୍ଦି କାନ୍ଦି ନୟାନ୍ତ ହେଲେଣି ତିନି ପିଲାଙ୍କ ମାଆ । ସ୍ଥାନୀୟ ଅଞ୍ଚଳରେ ଲୋକଙ୍କ ଭିଡ଼ ମଧ୍ୟ ଜମିଛି । ନାବାଳକମାନେ କୌଣସି ଫୋନ ବ୍ୟବହାର କରୁନଥିବାରୁ ଏହି ଘଟଣାଟି ପୋଲିସ ପାଇଁ ଚ୍ୟାଲେଞ୍ଜିଂ ହୋଇଛି । ତଥାପି ୩ ପିଲାଙ୍କୁ ସୁରକ୍ଷିତ ଭାବେ ଖୁବଶୀଘ୍ର ଉଦ୍ଧାର କରିବା ଲାଗି ପୋଲିସ ଉଦ୍ୟମ ଜାରି ରଖିଛି । ଆଖପାଖ ଅଞ୍ଚଳର ସିସିଟିଭି ଫୁଟେଜ ମଧ୍ୟ ଯାଞ୍ଚ କରାଯାଉଛି । ଖୁବଶୀଘ୍ର ପିଲାଙ୍କୁ ଉଦ୍ଧାର କରାଯିବ ବୋଲି ଘରଲୋକଙ୍କୁ ଆଶ୍ଵାସନା ଦେଇଛି ପୋଲିସ । 

• ରାଜ୍ୟରେ ୨ବର୍ଷରେ କେତେ ନିଖୋଜ ?

ଦୁଇ ବର୍ଷରେ ରାଜ୍ୟରେ ୧୫ ହଜାର ମହିଳା ଓ ୪ ହଜାର ନିଖୋଜ ଶିଶୁଙ୍କ ମିଳୁନି ପତ୍ତା । ଦୁଇ ବର୍ଷରେ ୪୫ ହଜାର ୭୯୬ ଜଣ ମହିଳା ନିଖୋଜ । ସେହିପରି ଦୁଇ ବର୍ଷରେ ୨୦ ହଜାର ୫୨୮ ଶିଶୁ ନିଖୋଜ ହୋଇଛନ୍ତି । ସେଥିମଧ୍ୟରୁ ୩୦ ହଜାର ୧୭୧ ମହିଳା ଉଦ୍ଧାର ହୋଇଛନ୍ତି । ସେହିପରି ୧୫ ହଜାର ୯୭୬ ଶିଶୁ ଉଦ୍ଧାର ହୋଇଛନ୍ତି । ବିଧାନସଭାରେ ମୁଖ୍ୟମନ୍ତ୍ରୀ ମୋହନ ମାଝୀ ଲିଖିତ ଉତ୍ତର ରଖିଛନ୍ତି ।