ଓଡ଼ିଶା ଛୁଇଁଲା ଦକ୍ଷିଣ ପଶ୍ଚିମ ମୌସୁମୀ ବାୟୁ । କେରଳମ୍ ଛୁଇଁବାର ୮ ଦିନ ପରେ ଓଡ଼ିଶାରେ ପହଞ୍ଚିଛି ମୌସୁମୀ । ଆଉ ମୌସୁମୀକୁ ଦେଖି ଆକ୍ସନ ମୋଡରେ ଭୁବନେଶ୍ବର ମହାନଗର ନିଗମ । ସହରୀ ବନ୍ୟାକୁ ରୋକିବା ପାଇଁ ଜିଆଇଏସ ମ୍ୟାପିଂ କରିବ BMC । ଯାହା ଦ୍ୱାରା ସହରୀ ବନ୍ୟା ପୂର୍ବରୁ ଆସିବ ସୂଚନା । ତେବେ ଖୁବଶୀଘ୍ର ବମିଖାଲ, ବଡ଼ଗଡ଼ର ସାଇଫନ ସହ ଇସ୍କନ କାମ ସାରିବାକୁ ଲକ୍ଷ୍ୟ ରଖିଛି ବିଏମ୍‌ସି । ରାଜଧାନୀରେ ୧୩୦୦ କିଲୋମିଟର ସେକେଣ୍ଡାରୀ ଡ୍ରେନ ବିଏମ୍‌ସି ଅଧୀନରେ ଥିବା ବେଳେ ଆର.ଆଣ୍ଡ.ବି ଅଧୀନରେ ଥିବା ୩୬୦ କିଲୋମିଟର ପ୍ରାଇମେରୀ ଡ୍ରେନକୁ ବିଏମ୍‌ସିକୁ ହସ୍ତାନ୍ତର କରାଯାଇଛି । ଚଳିତ ମୌସୁମୀ ବର୍ଷାର ମୁକାବିଲା କରିବା ପାଇଁ ୨ ମାସ ଧରି ଡ୍ରେନ୍‌ ସଫା କରୁଛି ବିଏମ୍‌ସି ।

ବିଗତ ବର୍ଷଗୁଡିକରେ ଅସରାଏ ବର୍ଷାରେ ରାଜଧାନୀରେ ସହରୀ ବନ୍ୟା ସହ ଡ୍ରେନେଜ ସମସ୍ୟା ଦେଖାଯାଏ । ଚଳିତ ବର୍ଷ ମୌସୁମୀକୁ ନଜରରେ ରଖି ବିଏମ୍‌ସି ପକ୍ଷରୁ ୮ଟି ରାପିଡ୍‌ ଆକ୍ସନ ଟିମ୍ ଗଠନ ହୋଇଛି । ପ୍ରତି ଟିମରେ ୪ ଜଣ ଲେଖାଏଁ ରହିଛନ୍ତି, ସେମାନଙ୍କୁ ଦିଆଯାଇଛି ସ୍ୱତନ୍ତ୍ର ଟ୍ରେନିଂ । 24*7 ଏହି ଟିମ୍ ଆକ୍ଟିଭ ରହିବେ । ସେମାନଙ୍କୁ ବିଭିନ୍ନ ଯନ୍ତ୍ରପାତି ସହ ସ୍ଲାବ୍‌ ଉଠାଇବା ମେସିନ୍ ଏବଂ ଜେନେଟର ଦିଆଯାଇଛି । ରାଜଧାନୀରେ ଯେଉଁଠି ଜଳବନ୍ଦୀ ସମସ୍ୟା ସୃଷ୍ଟି ହେଲେ ୧୯୨୯ରେ ଯୋଗାଯୋଗ କଲେ, ଏହି ଟିମ୍ ପହଞ୍ଚି ସମସ୍ୟାର ସମାଧାନ କରିବେ ।

ପ୍ରତିବର୍ଷ ଲଗାଣ ବର୍ଷାରେ ଉବୁଟୁବୁ ହେଉଛି ରାଜଧାନୀ । ଭୁବନେଶ୍ୱର ଜଳବନ୍ଦୀ ସମସ୍ୟାର ମୁକାବିଲା ପାଇଁ ପ୍ରତି ଥର ମୁକାବିଲା ପାଇଁ ମାଷ୍ଟରପ୍ଲାନ ତିଆରି କରୁଛି ବିଏମ୍‌ସି । ହେଲେ ଗ୍ରାଉଣ୍ଡରେ ସ୍ଥିତି ଯଥା ପୂବଂ ତଥା ପରଂ । ତେବେ ଚଳିତ ଥର ବିଏମ୍‌ସି କିପରି ଜଳବନ୍ଦୀ ସମସ୍ୟାର ମୁକାବିଲା କରୁଛି ତାହା ଉପରେ ରହିଛି ସମସ୍ତଙ୍କ ନଜର ।