Bishnu Sethi Tribute / ବିଷ୍ଣୁ ସେଠୀଙ୍କୁ ମନେ ପକାଇଲେ ଧର୍ମେନ୍ଦ୍ର, କହିଲେ—‘ସେ ଜଣେ ବ୍ୟକ୍ତି ନୁହନ୍ତି, ଏକ ଅନୁଷ୍ଠାନ’

ବିଜେପିର ବରିଷ୍ଠ ନେତା ତଥା ପୂର୍ବତନ ବିଧାୟକ ବିଷ୍ଣୁ ସେଠୀଙ୍କ ଚତୁର୍ଥ ଶ୍ରାଦ୍ଧବାର୍ଷିକୀ ଅବସରରେ ଏକ ଶ୍ରଦ୍ଧାଞ୍ଜଳି କାର୍ଯ୍ୟକ୍ରମ ଆୟୋଜିତ ହୋଇଥିଲା । ଏଥିରେ ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନ ସାମିଲ ହୋଇ ବିଷ୍ଣୁ ସେଠୀଙ୍କୁ ସ୍ମରଣ କରିଥିଲେ । ଏହି ଅବସରରେ ‘ଘାସ ଫୁଲ’ ୱେବସାଇଟ, ‘ବିଷ୍ଣୁ ବୈଭବ’ ଏବଂ ଏକ କଫି ଟେବୁଲ ପୁସ୍ତକ ଉନ୍ମୋଚନ କରାଯାଇଥିଲା ।

ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ''ବିଷ୍ଣୁ ସେଠୀ ଜଣେ ବ୍ୟକ୍ତି ନୁହଁନ୍ତି ସେ ଏକ ବିଚାର ଓ ଏକ ଅନୁଷ୍ଠାନ । ତାଙ୍କୁ ଶ୍ରଦ୍ଧାଞ୍ଜଳି ଜଣାଇଥିବାରୁ ସମସ୍ତଙ୍କୁ ଧନ୍ୟବାଦ । ୨୦୦୦ ମସିହାରେ ବିଧାନସଭାକୁ ବିଷ୍ଣୁ ଭାଇଙ୍କ ସହ ଏକାଠି ଯାଇଥିଲୁ । ଏକାଠି ବସୁଥିଲୁ । ଏକା କମିଟିରେ ଥିଲୁ ।'' ବିଷ୍ଣୁ ସେଠୀ ଖାରବେଳ ସ୍ୱାଇଁଙ୍କ ପ୍ରେସରେ କାମ କରୁଥିବା ଏବଂ ପରେ ମନମୋହନ ସାମଲଙ୍କ ମାଧ୍ୟମରେ ଦଳରେ ସାମିଲ ହୋଇଥିବା କଥା ସେ ଉଲ୍ଲେଖ କରିଥିଲେ ।

ରାମ ଜନ୍ମଭୂମି ଆନ୍ଦୋଳନ ପରେ ବିଷ୍ଣୁ ସେଠୀ ଏକ ପରିଚିତ ଚେହେରା ହୋଇଥିଲେ ବୋଲି ଧର୍ମେନ୍ଦ୍ର ପ୍ରଧାନ କହିଥିଲେ । ତାଙ୍କ ଅନୁସାରେ, ବିଷ୍ଣୁ ସେଠୀ ସବୁବେଳେ ଗରିବ ଓ ବଞ୍ଚିତ ଲୋକଙ୍କ ପାଇଁ କାମ କରୁଥିଲେ । ଜନସେବା ଓ ରାଜନୀତିରେ ସେ ଏକ ଦୀର୍ଘ ମୂଲ୍ୟବୋଧର ରେଖା ଟାଣି ଯାଇଛନ୍ତି । ବିଷ୍ଣୁ ସେଠୀ ଭଦ୍ରକର ବିଭିନ୍ନ ସାମାଜିକ ସଂଗଠନ ସହ ଜଡ଼ିତ ଥିଲେ ଏବଂ ସାଧାରଣ ଲୋକଙ୍କ ସମସ୍ୟାକୁ ନିର୍ଭୀକ ଭାବରେ ଉଠାଉଥିଲେ। ତାଙ୍କ ଆଦର୍ଶ ଆଗାମୀ ପିଢ଼ି ପାଇଁ ପ୍ରେରଣା ହେଉ ବୋଲି ଧର୍ମେନ୍ଦ୍ର ପ୍ରଧାନ କହିଛନ୍ତି ।

ଭଦ୍ରକ ତିହିଡ଼ି ଠାରେ ଧାମନଗରର ପୂର୍ବତନ ବିଧାୟକ, ଓଡ଼ିଶା ବିଧାନସଭାର ପୂର୍ବତନ ବିରୋଧୀ ଦଳର ଉପନେତା, ସ୍ୱର୍ଗତ ବିଷ୍ଣୁ ଚରଣ ସେଠୀଙ୍କ ଚତୁର୍ଥ ଶ୍ରାଦ୍ଧବାର୍ଷିକୀ ଅବସରରେ ଆୟୋଜିତ ସ୍ୱତନ୍ତ୍ର କାର୍ଯ୍ୟକ୍ରମରେ ଯୋଗଦେଇ 'ବିଷ୍ଣୁ ବିଭବ' ଓ 'ଘାସଫୁଲ'ର ବିଶେଷ ପତ୍ରିକା ତଥା ସଂସ୍କରଣ ସହ 'ଘାସଫୁଲ' ନାମରେ ଏକ ୱେବସାଇଟ୍ ଲୋକାର୍ପଣ କରିବାର… pic.twitter.com/5sfrsAjPdj

— Dharmendra Pradhan (@dpradhanbjp) September 19, 2026

ସେହିପରି ସେ ଆହୁରି କହିଛନ୍ତି, ବିଷ୍ଣୁ ଭାଇ ଅସୁସ୍ଥ ଥିବା ବେଳେ ସମୀର ଭାଇ ମୋତେ କହିଲେ ସେ ମେଡିକାଲ ଯିବାକୁ ରାଜି ହେଉନାହାନ୍ତି । ମୁଁ ତାଙ୍କୁ ବାଧ୍ୟ କାଲି ସେ କହିଲେ ବନ୍ୟା ହେଇଛି ରିଲିଫ ପଠା, ମୁଁ ପରେ ମେଡିକାଲ ଯିବି ।

‘ଘାସ ଫୁଲ’ ସହ ନିଜର ମଧ୍ୟ କିଛି ସମ୍ପର୍କ ଥିବା କଥା କହି ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ଏହା ବିଷ୍ଣୁ ସେଠୀଙ୍କ ବିଚାରଧାରାର ଏକ ମଞ୍ଚ ହେଉ । ସମାଜର ଦୁଃଖ, କଷ୍ଟ ଓ ସମସ୍ୟା ସାହିତ୍ୟ ମାଧ୍ୟମରେ ଲୋକଙ୍କ ସାମ୍ନାକୁ ଆସିବା ହିଁ ବିଷ୍ଣୁ ସେଠୀଙ୍କ ପାଇଁ ପ୍ରକୃତ ଶ୍ରଦ୍ଧାଞ୍ଜଳି ହେବ ବୋଲି ସେ କହିଥିଲେ । ବିଷ୍ଣୁ ସେଠୀଙ୍କ ପୁଅ ସୂରଜ ମଧ୍ୟ ତାଙ୍କ ବାପାଙ୍କ ଆଦର୍ଶରେ ଅନୁପ୍ରାଣିତ ହୋଇ ଆଗକୁ ବଢ଼ନ୍ତୁ ବୋଲି ଧର୍ମେନ୍ଦ୍ର ପ୍ରଧାନ ଆଶା ପ୍ରକାଶ କରିଥିଲେ ।

କାର୍ଯ୍ୟକ୍ରମରେ ଧର୍ମେନ୍ଦ୍ର ପ୍ରଧାନ ଦୁଇଟି ସାମାଜିକ ଅନୁରୋଧ ରଖିଥିଲେ । ଅଙ୍ଗନୱାଡିଠାରୁ ଷଷ୍ଠ ଶ୍ରେଣୀ ପର୍ଯ୍ୟନ୍ତ ପିଲାମାନଙ୍କ ସ୍ୱାସ୍ଥ୍ୟ ଓ ପୋଷଣ ପ୍ରତି ସମାଜ ଯତ୍ନବାନ ହେବା ଆବଶ୍ୟକ ବୋଲି ସେ କହିଥିଲେ । ବିଷ୍ଣୁ ସେଠୀଙ୍କ ସ୍ମୃତିରେ ନିଜ ଅଞ୍ଚଳର ଅଙ୍ଗନୱାଡି ଓ ପ୍ରାଥମିକ ସ୍କୁଲର ପିଲାମାନଙ୍କୁ ବର୍ଷକୁ ଅନ୍ତତଃ ଥରେ ଫଳ ବଣ୍ଟନ କରିବା ପାଇଁ ସେ ଆହ୍ୱାନ ଦେଇଥିଲେ ।

ଏଥିସହ ସିଙ୍ଗଲ୍-ୟୁଜ୍ ପ୍ଲାଷ୍ଟିକ ସଂଗ୍ରହ କରି ନଷ୍ଟ କରିବା ଦିଗରେ ସମାଜକୁ ସକ୍ରିୟ ଭାବେ ଯୋଗଦେବାକୁ ମଧ୍ୟ ସେ ଆହ୍ୱାନ ଦେଇଥିଲେ । ସରକାରୀ ବ୍ୟବସ୍ଥା ସହ ସାଧାରଣ ଲୋକଙ୍କ ସହଯୋଗ ରହିଲେ ଏହି କାମ ଅଧିକ ପ୍ରଭାବଶାଳୀ ହେବ ବୋଲି ସେ କହିଥିଲେ ।