ସତ୍ୟବାଦୀରୁ ସିମୁଳିଆ ସବୁଠି ଶାସକ ଦଳ ଫାଳଫାଳ
ଅର୍ଗସ ବ୍ୟୁରୋ: ସତ୍ୟବାଦୀ କାହାର ? କିଏ ହେବ ବିଜେଡି ସତ୍ୟବାଦୀ ବିଧାୟକ ପ୍ରାଥି । ତାକୁ ନେଇ ମୁହାଁ ମୁହିଁ ହୋଇଛନ୍ତି ବିଜେଡିର ତୁଙ୍ଗ ନେତା । ବ୍ରହ୍ମଗିରିର ପୂର୍ବତନ ବିଧାୟକ ସଂଜୟ କୁମାର ଦାସବର୍ମା ଓ ସତ୍ୟବାଦୀ ବିଧାୟକ ଉମାସାମନ୍ତ ରାୟ ପରସ୍ପର ବିରୁଦ୍ଧରେ କରିଛନ୍ତି ବିଶୋଦଗାର । ଦୁଇ ନେତା ଙ୍କ ତୁ ତୁ ମେ ମେ ରେ ଫାଳ ଫାଳ ହୋଇଯାଇଛି ପୁରୀ ଜିଲ୍ଲା ବିଜେଡି ସଂଗଠନ । ଚର୍ଚ୍ଚା ହେଉଛି ଜିଲ୍ଲାର କିଛି ନେତା ସଂଜୟଙ୍କ ସପକ୍ଷରେ ଛିଡ଼ା ହୋଇଥିବା ବେଳେ ଆଉ କିଛି ନେତା ଉମାଙ୍କ ସମର୍ଥନରେ ବାହାରିଛନ୍ତି । ଏସବୁ ଭିତରେ ଡ୍ୟାମେଜ କଣ୍ଟ୍ରୋଲ ପାଇଁ ସଂଗଠନ ସମ୍ପାଦକ ଉଭୟ ନେତାଙ୍କୁ ଶଙ୍ଖ ଭବନ ଡାକି ଆଲୋଚନା କରିଥିଲେ ବି ସମାଧାନର ବାଟ ବାହାରି ପାରିନି । ଶେଷରେ କଳି ଯାଇ ପହଁଛିଛି ଶଙ୍ଖ ସୁପ୍ରିମୋଙ୍କ ନିକଟରେ ।
ସତ୍ୟବାଦୀ କେବଳ ନୁହେଁ ବରଂ ସିମୁଳିଆ ଠୁ ନେଇ ଭଦ୍ରକ ଓ ପାଟଣାଗଡ଼ ନିର୍ବାଚନ ମଣ୍ଡଳୀରେ ବିଜେଡିର ଗୋଷ୍ଠୀ କନ୍ଦଳ ଉଗ୍ର ରୂପ ଧାରଣ କରିଛି । ଭଦ୍ରକରେ ବିଧାୟକ ସଞ୍ଜୀବ ମଲିକ ବନାମ ଅସିତ ପଟ୍ଟନାୟକ, ସିମୁଳିଆରେ ବିଧାୟକ ଜ୍ୟୋତି ପାଣିଗ୍ରାହୀ ବନାମ ଗଣେଷ ମହାପାତ୍ର, ପାଟଣାଗଡ଼ ରେ ବିଧାୟକ ସରୋଜ ମେହେର ବନାମ ଶିବାନନ୍ଦ ପରିଛାଙ୍କୁ ନେଇ ଦଳ ଏବେ ଦୁଇ ଭାଗରେ ବିଭକ୍ତ ହୋଇଛି । ସବୁଠି ଦୁଇ ଗୋଷ୍ଠୀ ମଧ୍ୟରେ ଛକାପଞ୍ଝା ଓ ଶକ୍ତି ପ୍ରଦର୍ଶନ ଦେଖିବାକୁ ମିଳିଛି ।
ଏ ସବୁ ଭିତରେ ବବିଙ୍କ ସୋସିଆଲ ମିଡ଼ିଆ ପୋଷ୍ଟ ପରେ ସବୁଦିନେ ନବୀନ ନିବାସ ଆଗରେ ଦଳୀୟ ଟିକେଟ ପାଇଁ ଲମ୍ବା ଲାଇନ ବିଜେଡି ସୁପ୍ରିମୋଙ୍କ ମୁଣ୍ଡ ବିନ୍ଧାକୁ ଅଧିକ ବଢ଼ାଇଛି । ଦିନକୁ ଦିନ ଟିକେଟ ଆଶାୟୀ ବଢୁଥିବାରୁ ପ୍ରାଥି ତାଲିକା ଘୋଷଣା ପରେ ଅସନ୍ତୁଷ୍ଟ ଅସମ୍ଭାଳ ସ୍ଥିତି ସୃଷ୍ଟି କରିବେ ବୋଲି ଚର୍ଚ୍ଚା ହେଉଛି ।
📱 Get Argus News App
✨ଅଧିକ ପଢ଼ନ୍ତୁ ଓଡିଶା ଖବର: