ନବୀନ ବ୍ରାଣ୍ଡର ଯୁଗ ଶେଷ, ନୂଆପଡ଼ା କଲା କି ପ୍ରମାଣ ? ନିର୍ବାଚନରେ ଥାର୍ଡ ପୋଜିସନ ପରେ ବିଜେଡିରେ ବିଦ୍ରୋହର ନିଆଁ । ବବି-ପାଣ୍ଡିଆନ ଯୋଡ଼ି ଉପରେ ବର୍ଷିଲେ ଯୁବ ମହାସଚିବ । ଆତ୍ମ ସମୀକ୍ଷା ପାଇଁ ନବୀନଙ୍କୁ ଚେତାଇଲେ ଉଭୟ ଯୁବ ଓ ବରିଷ୍ଠ । ଶ୍ରୀମୟୀ ବି ମାରିଲେ ବାଣ, ଲେଖିଲେ ହାରିଲ ତ ନିର୍ବାଚନ ଆଉ କେତେ କାହାକୁ କରିବ ନିଲମ୍ବନ ।

ନୂଆପଡ଼ା ଫଳାଫଳ ରାଜ୍ୟ ରାଜନୀତି ପାଇଁ ଦେଇଛି ନୂଆ ସଙ୍କେତ । ବିଜେପିର ବିଜୟକୁ ନେଇ ଯେତିକି ଚର୍ଚ୍ଚା ନୁହେଁ ତା ଠୁ ଅଧିକ ଚର୍ଚ୍ଚା ହେଉଛି ବିଜେଡି ଓ କଂଗ୍ରେସର ଦୁର୍ବଳ ରଣନୀତି ଓ ଶୋଚନୀୟ ପ୍ରଦର୍ଶନକୁ ନେଇ । ନବୀନ ବ୍ରାଣ୍ଡର ଯୁଗ ଶେଷ ବୋଲି ବି ପ୍ରମାଣ କରି ଦେଇଛି ନୂଆପଡ଼ା । ଏହା ବି ଦର୍ଶାଇଛି ମନ ଇଛା ପ୍ରାର୍ଥି ଚୟନ ଓ ନିର୍ଦ୍ଦିଷ୍ଟ ଗୋଷ୍ଠୀ ବା କୋଟେରୀ ଗ୍ରୁପକୁ ନେଇ ନିର୍ବାଚନ ପରିଚାଳନା ଦଳ ପାଇଁ କେତେ ଭୟଙ୍କର । ତେଣୁ ବର୍ତ୍ତମାନ ଆତ୍ମଚିନ୍ତନ ଓ ଆତ୍ମ ସମୀକ୍ଷା କରି ଗୋଷ୍ଠୀ କନ୍ଦଳର ଜାଲରୁ ନ ବାହାରିଲେ ଦଳ ଭାଙ୍ଗିଯିବା ଯେ ଥୟ ତାହା ବି ଦର୍ଶାଇ ଦେଇଛି ନୂଆପଡା ଉପ ନିର୍ବାଚନ । ଖାଲି ସେତିକି ନୁହେଁ ବ୍ରାଣ୍ଡ ନବୀନ ଓ ଶଙ୍ଖ ଚିହ୍ନ ନାଁରେ କରାଯାଉଥିବା ଆତ୍ମ ଗର୍ବକୁ ଛାଡ଼ି ଦ୍ୱିତୀୟ ଧାଡିର ସାଙ୍ଗଠନିକ ଦକ୍ଷତା ଥିବା ନେତାଙ୍କ କାନ୍ଧରେ ଆଗକୁ ବଢିବା ପାଇଁ ବିଜେଡିକୁ ଶିକ୍ଷା ଦେଇଛି ନୂଆପଡା ନିର୍ବାଚନ । ଯାହାକୁ ନେଇ ଆତ୍ମ ସମୀକ୍ଷା କରିବା ଲାଗି ନବୀନଙ୍କୁ ଚେତାଇ ଦେଇଛନ୍ତି ଯୁବ ଓ ବରିଷ୍ଠ ।

ଏବେ ନଜର ପକାନ୍ତୁ ବିଜେଡି ହାରିବାର ପ୍ରମୁଖ କାରଣ ସବୁ ଉପରେ

୧ - ଢୋଲକିଆଙ୍କ ପରିବାରକୁ ସାଥିରେ ରଖି ନ ପାରିବା
୨ - ଢୋଲକିଆଙ୍କ ପରିବାର ପ୍ରତି ଦଳୀୟ ନେତାଙ୍କ ଆପତ୍ତି ଜନକ ମନ୍ତବ୍ୟ (ଜୟ ଢୋଲକିଆଙ୍କୁ ପୋଷ୍ୟ ପୁଅ କହିବା)
୩ - ଭୁଲ ପ୍ରାର୍ଥୀ ଚୟନ ଓ ସ୍ଥାନୀୟ ନେତୃତ୍ୱଙ୍କୁ ଅଣଦେଖା
୪ - ହାରୁ ନେତାଙ୍କ ମାତ୍ରାଧିକ ହାକିମାତି
୫ - କୋଟେରୀ ଗ୍ରୁପ କାନ୍ଧରେ ନିର୍ବାଚନ ପରିଚାଳନା
୬ - ନବୀନଙ୍କ ଖରାପ ସ୍ୱାସ୍ଥ୍ୟବସ୍ଥାରେ ନିର୍ବାଚନ ପ୍ରଚାର କରାଇବା ହେଲା ବୁମେରାଂ
୭ - ନବୀନଙ୍କ ଭଳି ନେତାଙ୍କ ମୁହଁରେ ଢୋଲକିଆଙ୍କ ପରିବାରକୁ ବେଇମାନ କୁହାଇବା
୮ - ସ୍ଥାନୀୟ ପ୍ରସଙ୍ଗକୁ ମୁଦ୍ଦା ନ କରି ବୟାନ ବାଜିରେ ପ୍ରଚାର ସୀମିତ ରଖିବା
୯ - ସାଧାରଣ ନିର୍ବାଚନର ବିପର୍ଯ୍ୟୟ ପରେ ଦଳରେ ବଢିଥିବା ଗୋଷ୍ଠୀ କନ୍ଦଳ
୧୦ - ନିର୍ବାଚନୀ ଫଣ୍ଡ ମ୍ୟାନେଜମେଣ୍ଟ କ୍ଷେତ୍ରରେ ଭୁଲ ନିଷ୍ପତ୍ତି ଓ ନିର୍ବାଚନ ମଇଦାନରେ ନେତାଙ୍କ ସିରିଏସନେସ୍‌ ନ ରହିବା

ସାଧାରଣ ନିର୍ବାଚନରେ ବିଜେଡି ଏକ ନମ୍ବରରୁ ଦୁଇ ନମ୍ବରକୁ ଖସିଥିଲା ଆଉ ଏବେ ନୂଆପଡ଼ା ଉପ ନିର୍ବାଚନରେ ତିନି ନମ୍ବରକୁ ଖସି ଆସିଛି । ବଦଳି ଥିବା ରାଜ୍ୟ ରାଜନୀତିର ଏହି ସମୀକରଣ କୁ ଦେଖି ସମୀକ୍ଷକ କହୁଛନ୍ତି ବିଜେଡି ଭାଙ୍ଗିବାର ଦ୍ୱାର ଦେଶରେ ।