ଅର୍ଗସ ବ୍ୟୁରୋ : ସୀମା ଟପିଲା ବିଜେଡି ନେତାଙ୍କ ଔଦ୍ଧତ୍ୟ । ପ୍ରହସନ ପାଲଟିଲା ମା'କୁ ସମ୍ମାନ ନାରା । ମହିଳା ସମ୍ମାନଙ୍କୁ ନେଇ ବଡ ବଡ କଥା କହୁଛି ବିଜେଡି । କିନ୍ତୁ କାମରେ ସବୁ ଓଲଟା । ହୋ ହାଲ୍ଲା, ପାଟି ତୁଣ୍ଡ ଓ ମାଡ଼ ଗୋଳ । ପୁଣି ଉଡ଼ିଲା ମା'କୁ ସମ୍ମାନର ଧଜିଆ । ଏଭଳି କାଣ୍ଡ ରଚିଲେ ଖୋଦ୍ ବିଜେଡ଼ି ବିଧାୟକ ତଥା ବିଜେଡ଼ି କୃଷିମନ୍ତ୍ରୀ । ଏଭଳି ଘଟଣା ଦେଖିବାକୁ ମିଳିଛି ଆଠଗଡ ବିଜେଡି କାର୍ଯ୍ୟାଳୟରେ । ଜଣେ ମହିଳାଙ୍କୁ ଅଶ୍ଳୀଳ ଭାଷାରେ ଗାଳି ଗୁଲଜ କରିଛନ୍ତି ଖୋଦ ଆଠଗଡ ବିଧାୟକ ତଥା କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ଵାଇଁ । ତା ପୁଣି ନିଜ ଅସୁବିଧା ନେଇ ଗୁହାରି କହିବାକୁ ଆସିଥିବାବେଳେ ବିଧାୟକ ତାଙ୍କୁ ଅଭଦ୍ର ଭାଷାରେ ଗାଳିଗୁଲଜ କରିଛନ୍ତି । 

ଏମିତିକି ମାଡ଼ ମାରି ତଡ଼ିଦେବାକୁ ନିଜ କର୍ମୀଙ୍କୁ ନିର୍ଦ୍ଦେଶ ଦେଇଥିଲେ । ଆଠଗଡ଼ ବ୍ଲକ ଗୋପାଳପ୍ରସାଦ ଗାଁର ସଞ୍ଜୁକ୍ତା ରାଉତ ଏବଂ ତାଙ୍କ ପୁଅ ଟୁକୁନା ରାଉତ ଗୁହାରୀ କରିବା ପାଇଁ କୃଷିମନ୍ତ୍ରୀଙ୍କ ବିଜେଡି କାର୍ଯ୍ୟାଳୟକୁ ଆସିଥିବାବେଳେ ଏଭଳି ଘଟଣା ଘଟିଛି । ମହିଳାଙ୍କୁ ଅଶ୍ଲିଳ ଭାଷା କହିବାରୁ ମହିଳାଙ୍କ ପୁଅ ଟୁକୁନା ରାଉତ ମନ୍ତ୍ରୀଙ୍କୁ ଭାଷା ସଂଯତ କରି କଥାବାର୍ତ୍ତା କରିବା ପାଇଁ କହିଥିଲେ । 

ଏହା ପରେ ସେଠାରେ ଉପସ୍ଥିତ ଥିବା ମନ୍ତ୍ରୀଙ୍କ କର୍ମୀମାନେ ତାଙ୍କୁ ମାଡ ମାରି ଘଉଡାଇ ଦେଇଥିଲେ । କାର୍ଯ୍ୟାଳୟ ଭିତରୁ ତଡିବା ପରେ ମା' ପୁଅ ପ୍ରାୟ ଏକ ଘଣ୍ଟା ଧରି ବିଜେଡି କାର୍ଯ୍ୟାଳୟ ସମ୍ମୁଖରେ ପ୍ରତିବାଦ କରିଥିଲେ । ଊଭୟେ ଗଣମାଧ୍ୟମକୁ ଯୋଗାଯୋଗ କରିବା ସମୟରେ ସେମାନଙ୍କଠାରୁ ଫୋନ ମଧ୍ୟ ଛଡ଼ାଇ ନିଆଯାଇଥିଲା । ଶେଷରେ ପୋଲିସ ବୁଝାସୁଝା କରିବା ପରେ ମା' ପୁଅ ସେଠାରୁ ଆସି ଆଠଗଡ଼ ଥାନାରେ ଲିଖିତ ଅଭିଯୋଗ କରିଛନ୍ତି । ଏଠି ପ୍ରଶ୍ନ ଉଠୁଛି ମହିଳା ସମ୍ମାନ ନେଇ ବଡ ବଡ କଥା କହୁଥିବା ବିଜେଡି ମୁଖିଆ ଆଠଗଡ ବିଧାୟକଙ୍କ ପ୍ରତି କଣ କାର୍ଯ୍ୟାନୁଷ୍ଠାନ ନେବ । ନା ନିଜ ଦଳର କଥା ତଥା ନିଜ ଦଳର ମନ୍ତ୍ରୀ ବୋଲି ତାଙ୍କୁ ମାଫ୍ କରିଦେବେ  ।