ବିଜେଡିର ପରାଜୟ ପରେ ଏବେ ପାଣ୍ଡିଆନଙ୍କ ଉପରେ ଖଡ଼ଗହସ୍ତ ଦଳୀୟ ନେତା
Key Points
- ବିଜେଡିର ପରାଜୟ ପରେ ଏବେ ପାଣ୍ଡିଆନଙ୍କ ଉପରେ ଖଡ଼ଗହସ୍ତ ଦଳୀୟ ନେତା
- ବିଜୁ ଜନତା ଦଳରେ ପାଣ୍ଡିଆନଙ୍କୁ ଘନ ଘନ ଆକ୍ରମଣ
- ଭୈରବଙ୍କୁ ଦଳରୁ ତଡ଼ିବାକୁ ବିଜେଡି ନେତାଙ୍କ ଖୁଲମଖୁଲ୍ଲା ଦାବି
- #PANDIANGOBACK ସୋସିଆଲ୍ ମିଡିଆରେ ଟ୍ରେଣ୍ଡ କରାଉଛନ୍ତି ବିଜେଡି ନେତା
- ଭୈରବଙ୍କ ହାତରେ ପ୍ରଚାର ମଙ୍ଗ ବିଜେଡିକୁ ପଡ଼ିଲା ମହଙ୍ଗା
- ନବୀନଙ୍କ ନାଁରେ ନିର୍ବାଚନ ଲଢ଼ି ସିଏମ୍ ବନିବା ସ୍ବପ୍ନ ପଡ଼ିଲା ଫିକା
- ପାଣ୍ଡିଆନଙ୍କ ପ୍ରତି ଦୁର୍ବଳତା ନବୀନଙ୍କ ଷଷ୍ଠ ପାଳି ଆଶାକୁ କରିଦେଲା ଚୁନା
ଅର୍ଗସ ବ୍ୟୁରୋ : 24 ମହାଲଢ଼େଇରେ ମାଟି କାମୁଡ଼ିଲା 24 ବର୍ଷ ହେଲା ଓଡ଼ିଶାର ଶାସନ ଗାଦି ମାଡ଼ି ବସିଥିବା ବିଜୁ ଜନତା ଦଳ। ବିଜେଡିର ପରାଜୟ ପରେ ସବୁଠୁ ବେଶୀ ବିବାଦୀୟ ଭୈରବ କାର୍ତ୍ତିକେୟନ ପାଣ୍ଡିଆନ୍। ପାଞ୍ଚ ପାଞ୍ଚ ପାଳିର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜନପ୍ରିୟତା ଓ ପ୍ରତିଷ୍ଠାରେ ଗ୍ରହଣ ଲାଗିବାରୁ ତାଙ୍କ ବିରୋଧରେ ଖଡ଼ଗହସ୍ତ ବିଜେଡି ନେତା। କେତେକ ତ ସାମ୍ନାକୁ ଆସି ଖୁଲମଖୁଲ୍ଲା ପାଣ୍ଡିଆନଙ୍କୁ ଗାଳି ଦେଉଛନ୍ତି। ବିଜେଡିରୁ ତଡ଼ିବାକୁ ନିଜ ଦଳର ନେତାଙ୍କୁ ଦେଉଛନ୍ତି ଆହ୍ବାନ।
ବଡ଼ ହୋର୍ଡିଂରେ ପାଣ୍ଡିଆନଙ୍କୁ କରାଯାଉଛି କଟାକ୍ଷ। ସୋସିଆଲ୍ ମିଡିଆ ପୋଷ୍ଟରେ #PANDIANGOBACK ସୋସିଆଲ୍ ମିଡିଆରେ ଟ୍ରେଣ୍ଡ କରାଉଛନ୍ତି ବିଜେଡି ନେତା। ଗୋଟିଏ ପଟେ ପାଣ୍ଡିଆନଙ୍କ ବିରୋଧରେ ବିଜେଡି ନେତାଙ୍କ ବିଷୋଦଗାର, ଅନ୍ୟପଟେ ପରାଜୟ ପରେ ମୁହଁ ଲୁଚାଉଛନ୍ତି ପାଣ୍ଡିଆନ । ଲୁଚି ଛପି ନବୀନ ନିବାସ ଯାଉଛନ୍ତି ଭୈରବ । ବୁଧବାର ସନ୍ଧ୍ୟାରେ ନବୀନ ନିବାସ ଯାଇଥିଲେ ବି ବୈଠକରେ ଭି.କେ ପାଣ୍ଡିଆନଙ୍କୁ ଦେଖିବାକୁ ମିଳିନଥିଲା । ଏପରିକି କ୍ୟାମେରା ପଡିବା ଭୟରେ ନବୀନ ନିବାସ ଲାଇଟ ବନ୍ଦ କରାଇ ବାହାରିଥିଲେ ପାଣ୍ଡିଆନ । ଚର୍ଚ୍ଚା ହେଉଛି ଏପରି ଶୋଚନୀୟ ପରାଜୟ ପାଇଁ ଅନେକ ତୁଙ୍ଗ ନେତା ସିଧାସଳଖ ପାଣ୍ଡିଆନଙ୍କୁ ଦାୟୀ କରୁଛନ୍ତି, ଆଉ କିଛି ନେତା ପାଣ୍ଡିଆନଙ୍କ ପ୍ରଶ୍ନକୁ ଆଡ଼େଇ ଯାଉଛନ୍ତି। ଆଉ ଏ ସବୁ ଭିତରେ ଦଳଠୁ ଦୁରେଇ ରହିବାକୁ ଚେଷ୍ଟା କରୁଛନ୍ତି ଭି.କେ ପାଣ୍ଡିଆନ ।
ଅଧିକ ପଢନ୍ତୁ :
📱 Get Argus News App
✨ ସବୁଠୁ ବଡ଼ କଥା ହେଉଛି ବିଜେଡି କାହିଁକି ହାରିଲା ? କ'ଣ ପାଇଁ ଏତେ ବଡ଼ ବିପର୍ଯ୍ୟୟ ଭୋଗିଲା ଦଳ ? କେଉଁଠି ରହିଗଲା ତ୍ରୁଟି ? କେଉଁ କାରଣରୁ ପରାଜୟର ବାଟ ଦେଖାଇଲେ ଜନତା ? ନବୀନଙ୍କ ଚେହେରାରେ ବିଜେଡି 5 ଥର 5 ଥର ବିଜୟୀ ହୋଇଥିଲା । କିନ୍ତୁ ଷଷ୍ଠ ପାଳି ବେଳକୁ ନବୀନ ନୁହେଁ ବରଂ ଭୈରବ ପାଣ୍ଡିଆନ ପାଲଟିଗଲେ ବିଜେଡିର ପ୍ରମୁଖ ଚେହେରା। ପୁରା ନିର୍ବାଚନ ପ୍ରଚାରରେ ନବୀନ କାଁ ଭାଁ ଦେଖାଯାଇଥିବାବେଳେ ସବୁଠି ଛାଇ ରହିଲେ ପାଣ୍ଡିଆନ । କୁହାଯାଉଛି ପାଣ୍ଡିଆନଙ୍କ ପ୍ରତି ଦୁର୍ବଳତା ନବୀନଙ୍କ ଷଷ୍ଠ ପାଳି ଆଶାକୁ କରିଦେଲା ଚୁନା।
ବୁଧବାର ବିଜେଡି ବୈଠକ ସରିବା ପରେ ଗଣମାଧ୍ୟମକୁ ବିଜେଡିର ନେତାମାନେ ଭେଟିଥିଲେ । କିନ୍ତୁ ଯାହାଙ୍କୁ ବିଜେଡିର ସର୍ବେସର୍ବା କୁହାଯାଉଥିଲା ସେ କିନ୍ତୁ କ୍ୟାମେରା ସାମ୍ନାକୁ ଆସି ନଥିଲେ । ସେପେଟ ବିଜେଡି ଏଭଳି ଅପ୍ରତ୍ୟାଶିତ ପରାଜୟର କାରଣ ଖୋଜିବା ଆରମ୍ଭ କରିଦେଇଛି ଦଳ । ନିର୍ବାଚନରେ ପରାଜୟର କାରଣ ଖୋଜିବାକୁ ବିଜୁ ଜନତା ଦଳ ଏକ ଉଚ୍ଚସ୍ତରୀୟ କମିଟି ଗଠନ କରିବ । ଏହି କମିଟିରେ ରହିବେ ଦଳର ବରିଷ୍ଠ ନେତା । କମିଟି ସମସ୍ତ ଦିଗକୁ ତନ୍ନତନ୍ନ କରି ଅନୁଧ୍ୟାନ କରି ପରାଜୟର କାରଣ ଖୋଜିବ । ଚୂଡ଼ାନ୍ତ ରିପୋର୍ଟ ପ୍ରସ୍ତୁତ କରି ଦଳର ହାଇକମାଣ୍ଡଙ୍କ ନିକଟରେ ଦାଖଲ କରାଯିବ । ତେବେ ତୁଙ୍ଗ ନେତାଙ୍କ ଅସନ୍ତୋଷ ଯଦି କମିଟିର ରିପୋର୍ଟରେ ପ୍ରତିଫଳିତ ହୁଏ ବିଜେଡିରୁ ପାଣ୍ଡିଆନ ତଡ଼ା ଖାଇବା ସୁନିଶ୍ଚିତ ବୋଲି ଚର୍ଚ୍ଚା ହେଉଛି ।