ଅର୍ଗସ ବ୍ୟୁରୋ: ରାଷ୍ଟ୍ରୀୟ ଗଣମାଧ୍ୟମରେ ଓଡିଶାରେ ବିଜେପିର ଗ୍ରାଫ୍ ଉପରକୁ ଉଠିବା ନେଇ ଚର୍ଚ୍ଚା । ପ୍ରମୁଖ ଗଣମାଧ୍ୟମ ଇଣ୍ଡିଆ ଟୁଡେ ସାମ୍ନାକୁ ଆଣିଛି ବିଜେପିର ଭୋଟ ପ୍ରତିଶତ ବଢିବା ଓ ବିଜେଡିର କମିବା ଆଧାରରେ କେତେ ସିଟି କାହାର ହେବ ଆକଳନ କରିଛି । ରିପୋର୍ଟ ଅନୁସାରେ ନିର୍ବାଚନରେ ଯଦି ୫ ପ୍ରତିଶତ ଅଧିକ ଭୋଟ ବିଜେପି ସପକ୍ଷରେ ଯାଏ ତେବେ ବିଧାନସଭା ସିଟରେ ବଡ ପରିବର୍ତ୍ତନ ଆସିବ । ବିଜେପିକୁ ୬୭ଟି ସିଟ୍ ମିଳିପାରେ ।  ପାଞ୍ଚ ପ୍ରତିଶତ ବିଜେଡିର ଭୋଟ କମିଲେ ବିଧାନସଭା ସିଟ୍ ସଂଖ୍ୟା ୬୯କୁ ଖସି ଆସିବ । 

ଯେତେବେଳେ କି ଦଳ ଏକାକୀ ସରକାର ଗଠନ କରିବାକୁ ଆଉ ସମର୍ଥ ହୋଇପାରିବନି । ଝୁଲା ବିଧାନସଭା ହୋଇପାରେ । କଂଗ୍ରେସକୁ ୧୧ଟି ବିଧାନସଭା ସିଟ୍ ମିଳିବ ବୋଲି ଆକଳନ ହୋଇଛି । ଯଦି ବିଜେପି ସପକ୍ଷରେ ୩ ପ୍ରତିଶତ ଅଧିକ ଭୋଟ ଆସେ ଦଳକୁ ୪୮ଟି ଆସନ ମିଳିବ । ବିଜେଡିର ୩ ପ୍ରତିଶତ ଭୋଟ କମିଲେ ବିଧାନସଭା ସିଟ୍ ସଂଖ୍ୟା ୮୮କୁ ଖସିଯିବ ।  କଂଗ୍ରେସ ୧୧ଟି ସିଟ୍ ପାଇବ ବୋଲି ଆକଳନ କରାଯାଇଛି । 

୨୦୧୯ ବିଧାନସଭା ନିର୍ବାଚନରେ ବିଜେଡି ୧୧୩, ବିଜେପି ୨୩ ଓ କଂଗ୍ରେସ ୯ଟି ସିଟ୍ ପାଇଥିଲେ । ଯଦି ଲୋକସଭାରେ ବିଜେପି ୨୦୧୯ ତୁଳନାରେ ୩ ପ୍ରତିଶତ ଅଧିକ ଭୋଟ ପାଏ ତେବେ ବିଜେପି ୧୩ଟି ସିଟ୍ ଅକ୍ତିଆର କରିବ । ଅନ୍ୟପକ୍ଷରେ ୩ ପ୍ରତିଶତ ଭୋଟ୍ କମ୍ ପାଇଲେ ବିଜେଡିର ଲୋକସଭା ସଦସ୍ୟ ସଂଖ୍ୟା ୭କୁ ଖସିଯିବ । କଂଗ୍ରେସ ପୂର୍ବଭଳି ଗୋଟିଏ ସିଟ୍ ପାଇବ । ସେହିପରି ଯଦି ବିଜେପି ସପକ୍ଷରେ ଅଧିକ ୫ପ୍ରତିଶତ ଭୋଟ ଆସେ ତେବେ ବିଜେପିର ଲୋକସଭା ସିଟ୍ ୧୫ରେ ପହଞ୍ଚିବ । ବିଜେଡି ୫ପ୍ରତିଶତ କମ ଭୋଟ ପାଇଲେ ଦଳକୁ ମାତ୍ର ୫ଟି ଲୋକସଭା ଆସନରେ ସନ୍ତୁଷ୍ଟ ହେବାକୁ ପଡିବ । 

୨୦୧୯ ଲୋକସଭାରେ ବିଜେଡି ୧୨, ବିଜେପି ୮ ଓ କଂଗ୍ରେସକୁ ଗୋଟିଏ ସିଟ୍ ମିଳିଥିଲା ।  ବିଜେପିକୁ ରେକର୍ଡ ୩୯ପ୍ରତିଶତ ଭୋଟ ମିଳିଥିଲା ବେଳେ ବିଜେଡିକୁ ୪୩ ପ୍ରତିଶତ ଭୋଟ ମିଳିଥିଲା । ଏପରିକି ଦୁଇ ଦଳ ମଧ୍ୟରେ ୧୫ଟି ସିଟରେ କଡା ଟକ୍କର ହୋଇଥିଲା । ଏଥର ବିଧାନସଭାରେ ୭୫ ଓ ଲୋକସଭା ନିର୍ବାଚନରେ ବିଜେପି ୧୬ଟି ସିଟ୍ ପାଇବ ବୋଲି କେନ୍ଦ୍ରୀୟ ନେତା ମାନେ ଦୃଢୋକ୍ତି କରିଛନ୍ତି । 

ଆହୁରି ପଢନ୍ତୁ ରାଜନୀତି ଖବର...