ହୋର୍ଡିଂ ଭାଙ୍ଗି ଜୀବନ ଯିବା ପରେ ବିଏମ୍‌ସିର ପଶିଲା ଚେତା । ଏଣିକି ମନଇଚ୍ଛା ଲଗାଇ ପାରିବେନି ହୋର୍ଡିଂ । ହୋର୍ଡିଂ ଲଗାଇଲେ ନେବାକୁ ପଡ଼ିବ ବିଏମ୍‌ସିର ଅନୁମତି । ଏହା ସହ ଏବେ ଥାର୍ଡପାଟି ଇନ୍ୟୁସରାନ୍ସ ପାଇଁ ବାଧ୍ୟତାମୂଳକ କରାଯାଇଛି ।

ଏଣିକି ମନଇଛା ଲଗାଇ ପାରିବେନି ହୋର୍ଡିଂ । ବିଏମସି ଅଞ୍ଚଳରେ ହୋର୍ଡିଂ ଲଗାଇବାକୁ ହେଲେ ଅନୁମତି ନେବାକୁ ପଡ଼ିବ । ହୋର୍ଡିଂ ଲଗାଇବା ଆଗରୁ ଷ୍ଟ୍ରକଚରାଲ ସାର୍ଟିଫିକେଟ ଏବଂ ଥାର୍ଡ ପାର୍ଟି ଇନସ୍ୟୁରାନ୍ସ ବାଧ୍ୟତାମୂଳକ ହେବ । ଘରୋଇ ଅନୁଷ୍ଠାନ କିମ୍ବା କୌଣସି ବ୍ୟକ୍ତି ନିଜ ଘର ଉପରେ ଲଗାଇ ପାରିବେନି ହୋର୍ଡିଂ । ୩ ଦିନ ତଳେ ଭୁବନେଶ୍ବର ଆଇଗିଣିଆରେ ହୋଡିଂ ପଡ଼ି ୨ ଜଣଙ୍କ ମୃତ୍ୟୁ ହୋଇଥିଲା । ଆଉ ଏହାପରେ ବିଏମସିର ଭାଙ୍ଗିଛି ନିଦ ।

ଏପଟେ ଏଜେନ୍ସି ଠାରୁ ପଇସା ନେଇ ମନଇଚ୍ଛା ଘର ଉପରେ ହୋର୍ଡିଂ ଲଗାଯାଉଛି । ତୁରନ୍ତ ସେ ସବୁ ହଟାଇବାକୁ ଅଭିଯାନ ଆରମ୍ଭ ହୋଇଛି । ବେଆଇନ ଭାବେ ହୋର୍ଡିଂ ଲଗାଯାଇଥିଲେ ତୁରନ୍ତ ଜଣାଇବାକୁ ଜନସାଧାରଣଙ୍କୁ ଅନୁରୋଧ କରିଛନ୍ତି ମେୟର । ଏଥିସହ ପ୍ରତି ହୋର୍ଡିଂରେ ଏଜେନ୍ସିର ଦସ୍ତଖତ ବାଧ୍ୟତାମୂଳକ କରାଯାଇଛି । ସେହିପରି ଥାର୍ଡ ପାର୍ଟି ଇନସ୍ୟୁରାନ୍ସ ନେଇ ବିଏମସି ବୈଠକରେ ଆଲୋଚନା ହୋଇଛି । କୌଣସି ଅଘଟଣ ସମୟରେ ଇନସ୍ୟୁରାନ୍ସ ବାବଦ ପଇସା ସମ୍ପୃକ୍ତ ବ୍ୟକ୍ତିଙ୍କ ପାଖକୁ ଯିବ ।

୨ଟି ନିରୀହ ଜୀବନ ଯିବା ପାଇଁ BMCର ବେପରୁଆ ମନୋଭାବ ଦାୟୀ ନୁହେଁ କି ? ଦାୟିତ୍ବରେ ଥିବା BMCର ବଡ଼ ବାବୁମାନଙ୍କ ବିରୋଧରେ ଫୌଜଦାରୀ ମାମଲା ହେବନାହିଁ କାହିଁକି ? ଆଇଗିଣିଆରେ ହୋର୍ଡିଂ ଲଗାଇଥିବା ମେଟ୍ରୋ ସାଇନ୍ ସଂସ୍ଥା ବିରୋଧରେ କି କାର୍ଯ୍ୟାନୁଷ୍ଠାନ ହେବ ? ଏହା ଉପରେ ରହିଛି ସମସ୍ତଙ୍କ ନଜର ।