ବ୍ରହ୍ମପୁର: କିଏ କଲା ଗୁଳି ? ପୀତବାସଙ୍କ ପଛେ ପଛେ କିଏ କରୁଥିଲା ଫଲୋ ? ଗୁଳିମାଡ଼ ପୂର୍ବରୁ କାହିଁକି ସେଠି ଅଟକି ରହିଥିଲେ ଦୁର୍ବୃତ୍ତ । ବ୍ରହ୍ମପୁରର ବରିଷ୍ଠ ଆଇନଜୀବୀ ପୀତବାସ ପଣ୍ଡାଙ୍କୁ ଗୁଳି କରି ହତ୍ୟା ଘଟଣାରେ ପୋଲିସକୁ ମିଳିଛି କ୍ଲୁ । ସିସିଟିଭି ଫୁଟେଜ୍‌ରୁ ପୋଲିସକୁ ବଡ଼ କ୍ଲୁ ମିଳିଥିବା ବେଳେ ତଦନ୍ତ ଆଗେଇଥିବା ସୂଚନା ଦେଇଛନ୍ତି ବ୍ରହ୍ମପୁର ଏସ୍‌ପି ଶ୍ରବଣା ବିବେକ ଏମ୍ ।

ପୀତବାସଙ୍କ ହତ୍ୟା ମାମଲାରେ ବ୍ରହ୍ମପୁର ଏସ୍‌ପି କହିଛନ୍ତି, "ମୃତଦେହରୁ ମିଳିଥିବା ଗୁଳି ଖୋକାକୁ ବାଲିଷ୍ଟିକ ବିଶେଷଜ୍ଞଙ୍କ ନିକଟକୁ ପଠାଇଛି । ରିପୋର୍ଟ ଆସିବା ପରେ ଜଣା ପଡ଼ିବ କେଉଁ ବନ୍ଧୁକରୁ ଗୁଳି କରିଛନ୍ତି ଦୁର୍ବୃତ୍ତ । ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ସ୍ପଷ୍ଟ ହେବ କେଉଁ ଦିଗରୁ ଗୁଳିମାଡ଼ ହୋଇଥିଲା ଆଉ କ୍ଷତ କେତେ ଗଭୀର ଥିଲା । ଘଟଣାସ୍ଥଳକୁ ଯାଇ ସାଇଣ୍ଟିଫିକ୍ ଟିମ୍ ତଦନ୍ତ କରିଥିବା ବେଳେ ତଥ୍ୟ ପ୍ରଦାନ କରିଛି ।"

ଏଥିସହ ପଢ଼ନ୍ତୁ: ପୀତବାସ ପଣ୍ଡା ହତ୍ୟା ମାମଲା, ଜଣେ CISF ଯବାନ ସହ ୩ ଜଣ ଅଟକ

ମାମଲାରେ ବ୍ରହ୍ମପୁର ପୋଲିସ ୫୦ରୁ ଅଧିକ ସିସିଟିଭି ଫୁଟେଜ୍ ଏବେ ସୁଦ୍ଧା ଦେଖି ସାରିଛି । ଯେଉଁଥିରୁ ପୋଲିସକୁ ଅନେକ କ୍ଲୁ ମିଳିଛି । ଯାହାକୁ ନେଇ ବ୍ରହ୍ମପୁର ଏସ୍‌ପି କହିଛନ୍ତି, "ପୀତବାସ କେଉଁଠୁ କେତେବେଳେ ବାହାରିଲେ, କେଉଁ ରାସ୍ତାରେ ଗଲେ । ପୀତବାସ ଯେଉଁଠି ଅଟକିଲେ, ସେଠି କିଛି ସନ୍ଦିଗ୍ଧ ପୂର୍ବରୁ ବୁଲୁଥିଲେ, ଅଟକି ରହିଥିଲେ । ସେ ନେଇ ସନ୍ଦିଗ୍ଧଙ୍କୁ ପଚରାଉଚରା କରାଯାଉଛି ।"

ପୋଲିସ ସନ୍ଦେହରେ ଅନେକ ଲୋକଙ୍କୁ ଗୁପ୍ତ ବାବେ ଜେରା କରୁଥିବା କହିଛନ୍ତି ବ୍ରହ୍ମପୁର ଏସ୍‌ପି । ଗୁଳିମାଡ଼ କରିଥିବା ଦୁଇ ଦୁର୍ବୃତ୍ତଙ୍କୁ କିଏ ପୀତବାସଙ୍କ ସବୁ ସୂଚନା ସେ ଦିନ ରାତିରେ ଦେଉଥିଲା ସେ ଦିଗରେ ବି ପୋଲିସ ତଦନ୍ତ କରୁଛି । ସିସିଟିଭି ଫୁଟେଜ୍ ଛାନଭିନ୍ ବେଳେ ପୋଲିସ ସନ୍ଦେହକୁ ଏକ ଦାମୀ ଗାଡ଼ି ଆସିଛି । ଦାମୀ ଗାଡ଼ିରେ ଥିବା ଲୋକଙ୍କୁ ପୋଲିସ ପଚରାଉଚରା କରୁଛି । ଏବେ ସୁଦ୍ଧା ପୋଲିସ ୫୦ରୁ ୬୦ ଜଣଙ୍କୁ ପଚରାଉଚରା କରିଥିବା କହିଛନ୍ତି ବ୍ରହ୍ମପୁର ଏସ୍‌ପି । ସନ୍ଦେହରେ ୫ରୁ ୬ ଜଣଙ୍କୁ ପଚରାଉଚରା କରାଯାଉଛି । ତେବେ ସନ୍ଦିଗ୍ଧଙ୍କୁ ଜେରା, ସବୁ ଦିଗକୁ ଅନୁଧ୍ୟାନ ପରେ ପୋଲିସ ଶତ ପ୍ରତିଶତ ନିଶ୍ଚିତ ହେଲେ ଯାହା ନିଷ୍ପତ୍ତି ନେବ ବୋଲି ଏସ୍‌ପି ସୂଚନା ଦେଇଛନ୍ତି ।

ଏଥିସହ ପଢ଼ନ୍ତୁ: ପ୍ରି-ପ୍ଲାନ୍ ସହ ପୀତବାସଙ୍କୁ ଗୁଳି କରିଥିଲେ ପ୍ରଫେସନାଲ ସାର୍ପ ସୁଟର୍ ! କିଏ କରିଥିଲା ଶେଷ କଲ୍ ?

ପୀତବାସ ଅଫିସ୍ କରିଥିବା ସ୍ଥାନ ସହ ତାଙ୍କ ସହ ପ୍ରତିଦିନ ମିଶୁଥିବା ଲୋକଙ୍କୁ ମଧ୍ୟ ପୋଲିସ ପଚରାଉଚରା କରିଛି । ତେବେ ଗୁଳିମାଡ଼ ପୂର୍ବରୁ ଦୁର୍ବୃତ୍ତ ସେହି ସ୍ଥାନରେ ଆଗରୁ ଛିଡ଼ା ହୋଇଥିବାରୁ ବଢ଼ୁଛି ପୋଲିସର ସନ୍ଦେହ । ଏସ୍‌ପି କହିଛନ୍ତି, "ଲାଗୁଛି କେହି ପୀତବାସଙ୍କୁ ପଛରୁ ଫଲୋ କରି ଦୁର୍ବୃତ୍ତ ତଥ୍ୟ ଦେଉଛନ୍ତି । ସବୁ ଦିଗକୁ ନେଇ ତଦନ୍ତ ଚାଲିଛି, ଖୁବଶୀଘ୍ର ସଫଳତା ମିଳିବ ।

ଏଥିସହ ପଢ଼ନ୍ତୁ: 'ବାପା, ତୁମେ କେବେ ଟଙ୍କା ବାନ୍ଧିବ ?' ପରୀକ୍ଷାରେ ଦଶମ ଛାତ୍ରଙ୍କୁ ଚଟାଣରେ ବସାଇ ଦେଲେ

ହତ୍ୟାକାଣ୍ଡ ମାମଲାରେ ପୋଲିସ ଜଣେ CISF ଯବାନ ସହ ୩ ଜଣଙ୍କୁ ଅଟକ ରଖିଛି । ରାଜ୍ୟ ବାହାରକୁ ଗୋଟିଏ ଟିମ୍ ଯାଇଥିବା ସୂଚନା ମିଳିଛି । କଲ୍‌ ଡିଟେଲସରୁ ବଡ଼ ପ୍ରମାଣ ମିଳୁଛି ବୋଲି ସୂଚନା ମିଳିଛି । ତେବେ ଏ ସମ୍ବେଦନଶୀଳ ମର୍ଡର ମିଷ୍ଟ୍ରି ପଛରେ କ'ଣ ଥାଇପାରେ ମୂଳ କାରଣ ? ଦୋଷୀ କିଏ ? କିଏ ଦେଇଥିଲେ ସୁପାରୀ ? କାହା ପ୍ରରୋଚନାରେ ହୋଇଥିଲା ହତ୍ୟାକାଣ୍ଡ ? ଧଳା ସାର୍ଟ ହେଲମେଟ୍ ପିନ୍ଧି ଆସିଥିବା ଦୁଇ ହତ୍ୟାକାରୀ କିଏ ? ଦେଶୀ ବନ୍ଧୁକରେ ପଏଣ୍ଟ ଜିରୋରୁ କିଏ ମାରିଲା ଗୁଳି ? ହତ୍ୟା ପଛରେ ରାଜନୈତିକ, ବ୍ୟକ୍ତିଗତ ନା ରହିଛି ବୃତ୍ତିଗତ କାରଣ ? କ'ଣ ହୋଇପାରେ ମର୍ଡର ପଛର ମୋଟିଭ୍ ? ଏମିତି ଅନେକ ପ୍ରଶ୍ନ ସମସ୍ତଙ୍କୁ ଆନ୍ଦୋଳିତ କରୁଛି ।

Argus News | argus news | Odisha Latest News, Breaking News, Trending News, Live TV