ଭୋଗରାଇ: ପ୍ରୟାଗରାଜ ମହାକୁମ୍ଭକୁ ଶ୍ରଦ୍ଧାଳୁଙ୍କ ସୁଅ ଛୁଟିବାରେ ଲାଗିଛି । ଟ୍ରେନ୍ କଥା ତ ଛାଡ଼ନ୍ତୁ ଷ୍ଟେସନରେ ବି ପାଦ ରଖିବାକୁ ଜାଗା ନାହିଁ । ଫଳରେ ଲୋକେ ବସ୍ ଓ କାର୍ ଯୋଗେ ପ୍ରୟାଗରାଜ ପହଞ୍ଚୁଛନ୍ତି । ଏହାରି ଭିତରେ ବାଲେଶ୍ଵର ଜିଲା ଭୋଗରାଇ ବ୍ଲକ ଅଞ୍ଚଳରୁ ଶ୍ରଦ୍ଧାଳୁଙ୍କୁ ନେଇ ମହାକୁମ୍ଭକୁ ଯାଇଥିବା ଏକ ଘରୋଇ ବସ୍ ଦୁର୍ଘଟଣାଗ୍ରସ୍ତ ହୋଇଛି । 

ମିଳିଥିବା ସୂଚନା ଅନୁସାରେ, ଭୋଗରାଇର ଚନ୍ଦନେଶ୍ଵରରୁ ଏକ ବସ୍ ଯୋଗେ ୫୦ରୁ ଅଧିକ ଯାତ୍ରୀ ପ୍ରୟାଗରାଜ ଯାଉଥିଲେ । ବୁଧବାର ବିଳମ୍ବିତ ରାତିରେ ବସ୍‌ ଡ୍ରାଇଭରଙ୍କ ଆଖି ଲାଗିଯିବାରୁ ବସ୍‌ଟି ଏକ ବାଲି ଭର୍ତ୍ତି ଡମ୍ପରକୁ ପଛରୁ ଧକ୍କା ଦେଇଥିଲା । ୟୁପି-ବିହାର ସୀମାର ମହାନୀ ନିକଟରେ ଏହି ଦୁର୍ଘଟଣା ହୋଇଛି ।

ବସ୍‌ରେ ଥିବା ୩୫ରୁ ଯାତ୍ରୀ ଆହତ ହୋଇଛନ୍ତି । ସେଥିମଧ୍ୟରୁ ୩ ଜଣଙ୍କ ଅବସ୍ଥା ଗୁରୁତର ରହିଥିବା ବେଳେ ସେମାନଙ୍କୁ ଆଇସିୟୁରେ ଭର୍ତ୍ତି କରାଯାଇଛି । ଆହତଙ୍କ ମଧ୍ୟରେ ଅଧିକାଂଶ ମହିଳା ରହିଥିବା ସୂଚନା ମିଳିଛି । ତେବେ ଦୁର୍ଘଟଣା ପରେ ବସ୍ ଡ୍ରାଇଭର କେଉଁ ଆଡ଼େ ଫେରାର୍ ହୋଇ ଯାଇଛି ।