ବର୍ଷ ଶେଷରେ ଅସୁରକ୍ଷିତ ହେଉଛି ରାଜଧାନୀ । ଗତ ଦଶ ଦିନ ଭିତରେ ଦୁଇ ଦୁଇଟି ଗଣଦୁଷ୍କର୍ମ ମାମଲା । ସହିଦନଗରରେ ଚାକିରି ବାହାନାରେ ଭଡ଼ା ଘରେ ନାବାଳିକାଙ୍କୁ ଗଣ ଦୁଷ୍କର୍ମ ଅଭିଯୋଗ ହୋଇଛି । ଏହି ଘଟଣା ଏବେ ରେଡ୍‌ ଫ୍ଲାଗ ଅନ୍ତର୍ଭୁକ୍ତ ହୋଇଛି । ଏହି ମାମଲାରେ ଦୁଇ ଅଭିଯୁକ୍ତଙ୍କୁ ବାନ୍ଧି ତନାଘନା ଜାରି ରଖିଛି ପୋଲିସ୍ । ସେପଟେ କିଛିଦିନ ତଳେ ଧଉଳି ଥାନା ଦୟା ନଦୀ କୂଳରୁ ସାମ୍ନାକୁ ଆସିଥିଲା ସମାନ ଛାତିଥରା ଘଟଣା ।

ରାଜଧାନୀରେ ଲଜ୍ୟାରେ ଲାଗି ପାରୁନି ବ୍ରେକ୍‌ । ୧୦ ଦିନରେ ୨ଟି ଗଣ ଦୁଷ୍କର୍ମ । ପୋଲିସକୁ ଅପରାଧୀଙ୍କ ଖୋଲା ଚ୍ୟାଲେଞ୍ଜ । ପଦାରେ ପଡ଼ିଲା ପୋଲିସର ପାରିବା ପଣିଆ । ଆକ୍ଟିଭ ଅପରାଧୀ, ଡି ଆକ୍ଟିଭ ପୋଲିସ । ୧୮ ତାରିଖ ଅପରାହ୍ନ ୨ଟା । ଚାକିରୀ ଦେବା ନାଁରେ ନାବାଳିକାଙ୍କୁ ଗଣଦୁଷ୍କର୍ମ କରିଥିଲେ ଦୁଇ ଯୌନ ପିପାସୁ । ଡାଟା ଏଣ୍ଟ୍ରି ଚାକିରୀ ଦେବା ନାଁରେ ହଷ୍ଟେଲରେ ଘଟାଇଥିଲେ କୁକର୍ମ । କୌଶଳକ୍ରମେ ନାବାଳିକା ଖସି ଆସି ସହିଦନଗର ଥାନାରେ ଅଭିଯୋଗ କରିଥିଲେ ।

ଆଉ ଏହା ପରେ ଘଟଣାର ତ୍ବରିତ ତଦନ୍ତ କରି ଦୁଇ ଯୌନ ପିପାସୁଙ୍କୁ ଗିରଫ କରିଛି ପୋଲିସ । ମୁଖ୍ୟ ଅଭିଯୁକ୍ତ ଅକ୍ଷୟ ରାଉତ ଏବଂ ସାହିଲ ଖାନକୁ BNSର ଦଫା 70(2) ଏବଂ ପୋକ୍ସ ଆକ୍ଟରେ ମାମଲା ରୁଜୁ କରି କୋର୍ଟ ଚାଲାଣ କରିଛି ପୋଲିସ ।

ସେପଟେ ଘଟଣାକୁ ସମ୍ବେଦନଶୀଳ ଭାବେ ଗ୍ରହଣ କରି ରେଡ୍‌ ଫ୍ଲାଗରେ ଅନ୍ତର୍ଭୁକ୍ତ କରିଛି ପୋଲିସ । CAW ସହିଦନଗର ଥାନାରୁ ସମସ୍ତ ତଥ୍ୟ ନେଇଛି । କ୍ରାଇମବ୍ରାଞ୍ଚ ଡିଜିଙ୍କ ପ୍ରତ୍ୟକ୍ଷ ଡିଜିଙ୍କ ତତ୍ତ୍ବାବଧାନରେ ଘଟଣାକୁ ନିରୀକ୍ଷଣ କରାଯିବ । କମିସନରେଟ ପୋଲିସକୁ ତଦନ୍ତରେ ସହଯୋଗ କରିବ କ୍ରାଇମବ୍ରାଞ୍ଚ । ତେବେ ଏଠି ପ୍ରଶ୍ନ ଉଠୁଛି କେତେଜଣଙ୍କୁ ଏହିଭଳି ଚାକିରୀ ଦେବାକୁ କହି କୁକର୍ମ ଘଟାଇଛନ୍ତି ଅଭିଯୁକ୍ତ ? ଅଭିଯୁକ୍ତ ଅକ୍ଷୟ ପୀଡିତାଙ୍କୁ ଆଗରୁ ଚିହ୍ନିଥିବା ବେଳେ ଏହାର ସୁଯୋଗ ନେଲେ କି ଅପରାଧୀ ? ସେପଟେ ଜୟଦେବ ବିହାର ଭଳି ଏକ ଶିକ୍ଷିତ ଓ ସମ୍ଭ୍ରାନ୍ତ ସ୍ଥାନରେ ଏଭଳି ଘଟଣାକୁ ସହଜରେ କେହି ବିଶ୍ୱାସ କରିପାରିନାହାନ୍ତି । ଅଭିଯୁକ୍ତଙ୍କ ରୁମ୍‌ ମେଟ୍‌ ମଧ୍ୟ କେସରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
ଗତ ୪ ମାସ ମଧ୍ୟରେ ରାଜଧାନୀରେ ଘଟିଛି ୩ଟି ଗଣ ଦୁଷ୍କର୍ମ ଘଟଣା । ଘଟଣା ନମ୍ବର ୧ । ସେପ୍ଟେମ୍ବର ୧୪ ତାରିଖରେ ଗାଡ଼କଣ ଅଞ୍ଚଳରେ ଲଜ୍‌ ଭିତରେ ନିଶା ଦେଇ ଯୁବତୀଙ୍କୁ ଗଣ ଦୁଷ୍କର୍ମ କରାଯାଇଥିଲା । ଯୁବତୀଙ୍କ ପୁରୁଷ ବନ୍ଧୁ ଚନ୍ଦନ ହାତୀ, ଲଜ୍‌ ମାଲିକ ରାଜେଶ ଦାସ ଏବଂ ଅନ୍ୟଜଣେ ଅଭିଯୁକ୍ତ ପ୍ରସନ୍ନ ଆଚାର୍ଯ୍ୟଙ୍କୁ ଗିରଫ କରିଥିଲା ମହିଳା ଥାନା ପୋଲିସ । ଗୀତ ସୁଟିଂ କରିବାକୁ ଡାକି ଲଜ୍‌ ଭିତରେ ଗଣ ଦୁଷ୍କର୍ମ କରିଥିଲେ ତିନ ଅଭିଯୁକ୍ତ ।

ଘଟଣା ନମ୍ବର (୨) ଡିସେମ୍ବର ୧୦ ତାରିଖ । ଧଉଳି ଥାନା ଦୟାନଦୀ କୂଳରେ ପୁରୁଷ ବନ୍ଧୁଙ୍କୁ ବାନ୍ଧି ମାଡ଼ ମାରି ନାବାଳିକାଙ୍କୁ ଗଣ ଦୁଷ୍କର୍ମ କରିଥିଲେ ଅଭିଯୁକ୍ତ । କୁକର୍ମ ବେଳର ସମସ୍ତ ଚିତ୍ର ମୋବାଇଲରେ ସୁଟ୍‌ କରିଥିଲେ ଅଭିଯୁକ୍ତ । ମୁଖ୍ୟ ଅଭିଯୁକ୍ତ ସତ୍ୟ ପ୍ରକାଶ ହାତୀ ଓରଫ ଜୋକର ହାପି ସମେତ ବିଭୁ ପ୍ରସାଦ ମିଶ୍ର ଏବଂ କାଳନ୍ଦୀ ପାତ୍ରଙ୍କୁ ଗିରଫ କରି କୋର୍ଟ ଚାଲାଣ କରିଛି ଧଉଳି ଥାନା ପୋଲିସ । ଏହି ଘଟଣାରେ ଏବେ ବି ଦୁଇଜଣ ଅଭିଯୁକ୍ତ ଫେରାର ଅଛନ୍ତି ।

ଘଟଣା ନମ୍ବର ୩ । ଡିସେମ୍ବର ୧୯ ତାରିଖ । ନାବାଳିକାଙ୍କୁ ଚାକିରୀ ଦେବାକୁ କହି ହଷ୍ଟେଲରେ ଗଣ ଦୁଷ୍କର୍ମ କରିଥିଲେ ୨ ଅଭିଯୁକ୍ତ । ଅକ୍ଷୟ ରାଉତ ଏବଂ ସାହିଲ ଖାନଙ୍କୁ ଗିରଫ କରି କୋର୍ଟ ଚାଲାଣ କରିଛି ସହିଦନଗର ଥାନା ପୋଲିସ ।

ରାଜଧାନୀରେ ବାରମ୍ବାର ଏଭଳି ଘଟଣା ପୁନରାବୃତ୍ତି ହେଉଛି । ନୂଆବର୍ଷ ବଡ଼ଦିନ ପାଇଁ ଛକ ବଜାରରେ ଚେକିଂ ବ୍ଳକିଂ ହେଉଥିଲେ ସୁଦ୍ଧା ଅପରାଧୀ ଏହାକୁ ତିଳେ ମାତ୍ର ଖାତିର କରୁ ନାହାଁନ୍ତି ।