Ceiling Collapse / MKCGରେ ବଡ଼ ଅଘଟଣ... କର୍କଟ ୱାର୍ଡରେ ଖସିଲା ସିଲିଂ

ଏମକେସିଜି ମେଡିକାଲ କଲେଜ ଓ ହସ୍ପିଟାଲର କର୍କଟ ରୋଗ ବିଭାଗରେ ଅଘଟଣ । ବିଭାଗରେ ଥିବା ସିଲିଂ ଖସିପଡ଼ିବାରୁ ରୋଗୀ ଓ ସେମାନଙ୍କ ସମ୍ପର୍କୀୟଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି । ତେବେ ଏହି ଅଘଟଣରେ ରୋଗୀମାନେ ଅଳ୍ପକେ ବର୍ତ୍ତିଯାଇଥିବା ଜଣାପଡ଼ିଛି । ଘଟଣା ପରେ ମେଡିକାଲ କର୍ତ୍ତୃପକ୍ଷ ତତ୍ପର ହୋଇଉଠିଛନ୍ତି ।

ସୂଚନା ଅନୁଯାୟୀ, କର୍କଟ ରୋଗ ବିଭାଗରେ ରୋଗୀମାନେ ଚିକିତ୍ସିତ ହେଉଥିବା ସମୟରେ ହଠାତ୍ ସିଲିଂର ଏକ ଅଂଶ ଖସିପଡ଼ିଥିଲା । ଏହାକୁ ନେଇ ସେଠାରେ ଉପସ୍ଥିତ ରୋଗୀ, ସେମାନଙ୍କ ସମ୍ପର୍କୀୟ ଓ ଅନ୍ୟ କର୍ମଚାରୀଙ୍କ ମଧ୍ୟରେ ଆତଙ୍କ ଖେଳିଯାଇଥିଲା । ସୌଭାଗ୍ୟବଶତଃ, ସିଲିଂ ଖସିଥିବା ସ୍ଥାନରେ ଥିବା ରୋଗୀମାନେ ବଡ଼ଧରଣର ବିପଦରୁ ରକ୍ଷା ପାଇଯାଇଥିଲେ ।

ଘଟଣା ସମ୍ପର୍କରେ ଖବର ପାଇ ମେଡିକାଲ ଅଧୀକ୍ଷକ ଓ ରେଜିଷ୍ଟ୍ରାର ଘଟଣାସ୍ଥଳରେ ପହଞ୍ଚିଥିଲେ । ସୁରକ୍ଷା ଦୃଷ୍ଟିରୁ ସିଲିଂ ଖସିଥିବା ସ୍ଥାନରୁ ରୋଗୀମାନଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଥିଲା । ରୋଗୀଙ୍କ ଚିକିତ୍ସା ଓ ସୁରକ୍ଷାକୁ ନେଇ ମେଡିକାଲ କର୍ତ୍ତୃପକ୍ଷ ପଦକ୍ଷେପ ନେଇଥିବା ଜଣାପଡ଼ିଛି ।

ଏତେ ବଡ଼ ମେଡିକାଲର ଏକ ଗୁରୁତ୍ୱପୂର୍ଣ୍ଣ ବିଭାଗରେ ଏଭଳି ଅଘଟଣ ଘଟିବାକୁ ନେଇ ରୋଗୀଙ୍କ ସୁରକ୍ଷା ଓ ଭିତ୍ତିଭୂମିର ରକ୍ଷଣାବେକ୍ଷଣକୁ ନେଇ ପ୍ରଶ୍ନ ଉଠିଛି । ବିଶେଷକରି କର୍କଟ ରୋଗ ଭଳି ଗୁରୁତର ରୋଗରେ ପୀଡ଼ିତ ରୋଗୀମାନେ ଚିକିତ୍ସା ପାଇଁ ହସ୍ପିଟାଲ ଉପରେ ନିର୍ଭର କରୁଥିବାରୁ ସେମାନଙ୍କ ପାଇଁ ସୁରକ୍ଷିତ ପରିବେଶ ଯୋଗାଇଦେବା ଅତ୍ୟନ୍ତ ଜରୁରୀ ।

ତେବେ ସିଲିଂ କାହିଁକି ଖସିଲା ଏବଂ ଏହା ପଛରେ ନିର୍ମାଣଗତ ତ୍ରୁଟି ରହିଛି କି ନାହିଁ, ସେନେଇ ସବିଶେଷ ତଥ୍ୟ ମିଳିନାହିଁ । ଘଟଣାର ତଦନ୍ତ କରାଯାଇ ଆବଶ୍ୟକ ମରାମତି ଓ ସୁରକ୍ଷା ବ୍ୟବସ୍ଥା ସୁନିଶ୍ଚିତ କରିବାକୁ ଦାବି ହେଉଛି ।