ଭୁବନେଶ୍ଵର: ଶୁକ୍ରବାର ଟ୍ରାଙ୍କୁଲାଇଜ୍‍ କଲେ, ଶନିବାର ଜଙ୍ଗଲରେ ଛାଡ଼ିଦେଲେ । ସୁରକ୍ଷିତ ତ ଅସୁସ୍ଥ ଦନ୍ତା ? ମାଡ଼ି ଆସିବନି ତ ବିପଦ ? ସ୍ଵାସ୍ଥ୍ୟାବସ୍ଥା ଠିକ୍ ନଥିବା ବେଳେ ଦାନ୍ତ ପାଇଁ ଦନ୍ତାକୁ ଶିକାର କରିବେନି ତ ଶିକାରୀ ? ଚନ୍ଦକା ଜଙ୍ଗଲରେ ଅସୁସ୍ଥ ଦନ୍ତାର ପ୍ରାଥମିକ ଚିକିତ୍ସା କରି ଜଙ୍ଗଲରେ ଛାଡ଼ି ଦେଇଛି ବନ ବିଭାଗ । ଅସୁସ୍ଥ ଦନ୍ତା ଏବେ ଘୁରି ବୁଲୁଛି ଜଙ୍ଗଲ ଭିତରେ । ଆଉ ଏପରି ସମୟରେ ଜଙ୍ଗଲୀ ଦନ୍ତା ହାତୀର ସୁରକ୍ଷାକୁ ନେଇ ପ୍ରଶ୍ନ ଉଠାଇଛନ୍ତି ପଶୁ ପ୍ରେମୀ I

କହିଛନ୍ତି, "ଏମିତି ଅସୁସ୍ଥ ସମୟରେ ଜଙ୍ଗଲରେ ବୁଲିଲେ ଦନ୍ତା ଜୀବନ ପ୍ରତି ରହିଛି ବିପଦ । ଅନ୍ୟ ଦନ୍ତା ହାତୀମାନେ ବି ଏହାର ଅସୁସ୍ଥତାର ଫାଇଦା ଉଠାଇ ଆକ୍ରମଣ ବି କରିପାରନ୍ତି, ନଚେତ ରାତ୍ରୀର ଅନ୍ଧକାରରେ ଶିକାରୀମାନେ ବି କରିପାରନ୍ତି ଟାର୍ଗେଟ୍ ।

ଏଥିସହ ପଢ଼ନ୍ତୁ: ସାରା ରାତି ଟ୍ରେନ୍‌ ଟ୍ରାକ୍‌ରେ ଛୁଆକୁ ଜଗି ରହିଲା ହାତୀ, କଢ଼େଇ ନେଲା ବାଟ; ଦେଖନ୍ତୁ Video

ଦନ୍ତାର ସୁରକ୍ଷା ନେଇ ପ୍ରଶ୍ନ ଉଠୁଥିବା ବେଳେ ପତିକ୍ରିୟା ରଖିଛି ବନ ବିଭାଗ I ଡିଏଫଓ ବିନୋଦ ଆଚାର୍ଯ୍ୟ କହିଛନ୍ତି, "ଦନ୍ତା ଉପରେ ୨୪ ଘଣ୍ଟିଆ କଡ଼ା ନଜର ରଖା ଯାଇଛି । ଦିନରାତି ୧୫ରୁ ଅଧିକ ଷ୍ଟାଫ ଜଗି ରହିଥିବା ବେଳେ ଡ୍ରୋନ ମାଧ୍ୟମରେ ବି ତାର ଗତିବିଧି ଉପରେ ନଜର ରଖା ଯାଇଛି । ଅନ୍ୟ ଦନ୍ତା ହାତୀଙ୍କ ସାମନା ସାମନି ଯେମିତି ନହେବ ସେଥିପ୍ରତି ନଜର ଦିଆ ଯାଉଛି । କିଛି ଦିନ ପର୍ଯ୍ୟନ୍ତ ବନ୍ଧୁକ ସହାୟତାରେ ଆଣ୍ଟି ବାୟୋଟିକ ମେଡିସିନ୍ ଦିଆଯିବା ପାଇଁ ଯୋଜନା କରାଯାଇଛି । ଧୀରେ ଧୀରେ ଫୁଲା କମିବ, ନ କମିଲେ ଆଗକୁ ଡାକ୍ତରମାନଙ୍କ ପରାମର୍ଶ କ୍ରମେ ଚିକିତ୍ସା ଆଗକୁ ବଢ଼ାଯିବ ।"

ଶୁକ୍ରବାର ଦନ୍ତାକୁ ଟ୍ରାଙ୍କୁଲାଇଜ୍ କରିବାକୁ ନାକେଦମ୍ ହୋଇଥିଲା ଟିମ୍ । ୨୦ ଜଣିଆ ଡାକ୍ତରୀ ଟିମ୍ ସହିତ ବନ ବିଭାଗ ଟିମ ଟ୍ରାଙ୍କୁଲାଇଜ୍‌ରେ ସାମିଲ୍ ଥିଲା । ସ୍ଵତନ୍ତ୍ର ଗାଡ଼ିରେ ଅତି ନିକଟରୁ ଜାଇଲେଳିନ୍ ଓ କେଟାମିନ୍ ମିଶାଇ ବନ୍ଧୁକରୁ ଟ୍ରାଙ୍କୁଲାଇଜ୍ କରିଥିଲେ ବିଶେଷଜ୍ଞ । ଦନ୍ତା ଚେତା ଶୂନ୍ୟ ହେବା ପରେ ପ୍ରାଥମିକ ପରୀକ୍ଷାରେ ତାର ବାମଗୋଡ଼ ଆଣ୍ଠୁରେ ବଡ଼ ହିମାଟୋମା ହୋଇଥିବା ଜଣାପଡ଼ିଥିଲା ।

ଏଥିସହ ପଢ଼ନ୍ତୁ: ଟ୍ରେନ ଧକ୍କାରେ ଗଲା ୮ ଗଜରାଜଙ୍କ ଜୀବନ

ମେଟାଲ ଡିଟେକ୍ଟର ସ୍କାନ୍ ପରେ ଫୁଲାସ୍ଥାନରେ ଜମାଟ ହୋଇଥିବା ରକ୍ତକୁ ମେଲଟ କରିବା ପାଇଁ ଆଣ୍ଟିବାୟୋଟିକ୍ ସହିତ ପେନ୍ କିଲର ଦିଆଯାଇ ତାକୁ ଜଙ୍ଗଲରେ ଛାଡ଼ି ଦିଆ ଯାଇଥିଲା । ଯେହେତୁ ଦନ୍ତା ହାତୀଟି ସମ୍ପୂର୍ଣ୍ଣ ସୁସ୍ଥ ହୋଇନାହିଁ ତାକୁ ରେସ୍କ୍ୟୁ ସେଣ୍ଟରରେ ରଖାଯାଇ ସମ୍ପୂର୍ଣ୍ଣ ଚିକିତ୍ସା କରାଯାଇ ପାରିଥାନ୍ତା । କାହିଁକି ରେସ୍କ୍ୟୁ ସେଣ୍ଟରରେ ନ ରଖି ବନ ବିଭାଗ ଏଭଳି ନିଷ୍ପତ୍ତି ନେଲା ତାକୁ ନେଇ ଏବେ ବନ ବିଭାଗ ପ୍ରଶ୍ନ ଘେରରେ ରହିଛି ।