ଅର୍ଗସ ବ୍ୟୁରୋ: ‘ଆମ ବସ୍‌ ଷ୍ଟାଣ୍ଡ’ ଯୋଜନାରେ ୧୩ଟି ଜିଲ୍ଲାରେ ୨୦ଟି ନବନିର୍ମିତ ବସ୍‌ ଷ୍ଟାଣ୍ଡ ଲୋକାର୍ପିତ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଅନୁଗୋଳ, ବାଲେଶ୍ୱର, ବୌଦ୍ଧ, , ସୁବର୍ଣ୍ଣପୁର ସମେତ 13 ଜିଲ୍ଲାରେ ନୂଆ ବସ ଷ୍ଟାଣ୍ଡ ଉଦଘାଟିତ ହୋଇଛି । ହେଲେ ରାଜ୍ୟର ପ୍ରମୁଖ ଅଞ୍ଚଳ ଗୁଡିକରେ ଏବେ ଯାଏଁ ତିଆରି ହୋଇପାରିଲାନି ବସ ଷ୍ଟାଣ୍ଡ । ଏପରିକି ମୁଖ୍ୟମନ୍ତ୍ରୀଙ୍କ ନିଜ ଜିଲ୍ଲା ଗଞ୍ଜାମରେ ସ୍ଥିତି ସଙ୍ଗୀନ । ଏଇ ଯେମିତି ଖଲ୍ଲିକୋଟ ସହର । ଖଲ୍ଲିକୋଟ ଏନଏସି ଗଠନ ହେବାର 50 ବର୍ଷ ପରେ ବି ଆଜି ଯାଏଁ ହୋଇପାରିଲାନି ସ୍ଥାୟୀ ବସଷ୍ଟାଣ୍ଡ । ଖଲ୍ଲିକୋଟରେ ରାସ୍ତା କଡରେ ରହୁଛି ବସ । ତେବେ ୨୦୨୩ ଅଗଷ୍ଟ ୨୩ ତାରିଖରେ ଭିସି ଜିରିଆରେ ୨୬ଟି ନୂଆ ବସଷ୍ଟାଣ୍ଡର ଭିତ୍ତି ପ୍ରସ୍ତର ସ୍ଥାପନ କରିଥିଲେ ମୁଖ୍ୟମନ୍ତ୍ରୀ ।

ସେଥି ମଧ୍ୟରେ ଖଲ୍ଲିକୋଟ ବସଷ୍ଟାଣ୍ଡ ପାଇଁ ବି ଶିଳାନ୍ୟାସ ହୋଇଥିଲା । କିନ୍ତୁ ଆଜି ଯାଏଁ ବସ ଷ୍ଟାଣ୍ଡ କାମ ଆରମ୍ଭ ହୋଇପାରିଲାନି । ସେହିପରି ଗୋପାଳପୁର ଠାରେ ୬ କୋଟି ଟଙ୍କାରେ ନିର୍ମିତ ନୂଆ ବସ ଷ୍ଟାଣ୍ଡକୁ ୨୦୧୬ରେ ଉଦଘାଟନ କରିଥିଲେ ଖୋଦ୍ ମୁଖ୍ୟମନ୍ତ୍ରୀ । ହେଲେ ନିର୍ମାଣ ହେବାର ୭ ବର୍ଷ ପରେ ବି ହେଲା କାର୍ଯ୍ୟକ୍ଷମ ନହୋଇ ଭୂତ କୋଠି ପାଲଟିଛି ବସ ଷ୍ଟାଣ୍ଡ । ଛତ୍ରପୁରରେ ବି ସାଢେ ୬ କୋଟିରେ ନିର୍ମିତ ବସ ଷ୍ଟାଣ୍ଡ ମଧ୍ୟ ବିଜୁ ଜୟନ୍ତୀ ଦିନ ୨୦୧୬ରେ ଉଦଘାଟନ କରିଥିଲେ ମୁଖ୍ୟମନ୍ତ୍ରୀ । ଯାହା ଦୀର୍ଘ ୭ ବର୍ଷ ହେଲା କାର୍ଯ୍ୟକ୍ଷମ ନହୋଇ ପଡ଼ିରହିଛି । କୋରାପୁଟର ବି ସେହି ଏକା ଦିନ 10 ଟି ବସଷ୍ଟାଣ୍ଡର ଶିଳାନ୍ୟାସ ହୋଇଥିଲା.. ତେବେ 10ରୁ କେବଳ ସୁନାବେଡାକୁ ଛାଡିଦେଲେ ବାକି 9 ଟି ସ୍ଥାନରେ ବସଷ୍ଟାଣ୍ଡ ହୋଇନି।

ଆଉ ଏ ହେଉଛି କଳାହାଣ୍ଡି ଜିଲ୍ଲା ଜୟପାଟଣା ସହର । ଜୟପାଟଣାରେ ୨୦୦୦ ମସିହାରେ ଏକ ବସ ଷ୍ଟପ ନିର୍ମାଣ ହୋଇଥିଲା । ହେଲେ ପରବର୍ତ୍ତୀ ସମୟରେ ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ଏବେ ଜରାଜୀର୍ଣ୍ଣ ଅବସ୍ଥାରେ ପଡିରହିଛି ବସ ଷ୍ଟାଣ୍ଡ । ସେହିପରି 11 ତଳେ ବାଲେଶ୍ୱରରେ ବସ ଟର୍ମିନାଲ ପାଇଁ ହୋଇଥିଲା ଶିଳାନ୍ୟାସ। ହେଲେ ଆଜି ପର୍ଯ୍ୟନ୍ତ ସରିଲାନ କାମ।

ତେବେ ସବୁ ବ୍ଲକରେ ବସଷ୍ଟାଣ୍ଡ କରିବାକୁ ଘୋଷଣା କରିଥିଲେ ରାଜ୍ୟ ସରକାର । ବିଧାନସଭାରେ ପରିବହନ ମନ୍ତ୍ରୀ ମଧ୍ୟ କହିଥିଲେ ରାଜ୍ୟର ସବୁ ବ୍ଲକରେ ଉନ୍ନତ ମାନର ବସଷ୍ଟାଣ୍ଡ ପାଇଁ ଯୋଜନା ରହିଛି । କିନ୍ତୁ ୨୪ ନିର୍ବାଚନ ଆଗରୁ ମାତ୍ର ୧୩ ଜିଲ୍ଲାରେ ୨୦ଟି ବସ ଷ୍ଟାଣ୍ଡ କରି ବାକି ଅଞ୍ଚଳ କଥା ଭୁଲି ଯିବେନି ତ ମୁଖ୍ୟମନ୍ତ୍ରୀ ।
ପ୍ରଶ୍ନ ଉଠୁଛି, ଆଉ କେତେ ପାଳି ସରକାରକୁ ଆସିଲେ ଓଡିଶାର ପ୍ରତି ବ୍ଲକରେ ନିର୍ମାଣ ହେବ ସ୍ଥାୟୀ ବସ ଷ୍ଟାଣ୍ଡ ? କେବେ ସରିବ ଅଧାପନ୍ତରିଆ ଅବସ୍ଥାରେ ଥିବା ବସଷ୍ଟାଣ୍ଡ ଗୁଡିକର ନିର୍ମାଣ ?

ଅଧିକ ପଢ଼ନ୍ତୁ ଓଡିଶା ଖବର:

Argus News | argus news | -Argusnews Home: Odisha Latest News, Breaking News, Trending News, Live TV and more