ଅର୍ଗସ ବ୍ୟୁରୋ: ପଖାଳ କଂସା ବଢାଯାଇଛି, ବାଡିର ସଜ ସଜ ସଜନା ଶାଗ ଭଜାଯାଇଛି । ଲେମ୍ବୁ, ଦହି ବାସ୍ନାରେ ଘର ମହକୁଛି । କାରଣ ଘରର ପୁଅ ପହଞ୍ଚିଛି...ବୁଲି ବୁଲି ହାଲିଆ ହୋଇ ଯିବଣୀ । ପୁଅର ମନକଥା ବୁଝି ତୋରାଣୀ କଂସା ସଜ କରି ରଖାଯାଇଛି । ବୁଲିବୁଲି ପୁଅ ହାଲିଆ ହୋଇଯାଇଛି, ପଖାଳ ବେଲା ଦେଖି ମନ ଅସମ୍ଭାଳ ହେଲାଣି । ହେଲେ ଆଉ ଡେରି ନକରି ପେଟେ ପଖାଳ ଖାଇ କଂସେ ତୋରାଣୀ ପିଇଲେ ମୋହନ । କଥା ହେଲା ମୁଖ୍ୟମନ୍ତ୍ରୀ ହେବା ପୂର୍ବରୁ ସେ ଘରେ ଯାହା ଯାହା ଖାଆନ୍ତି, ଏବେ ବି ସେଇୟା ଖାଇଲେ । ନା ଖାଦ୍ୟରେ ପରିବର୍ତ୍ତନ ଥିଲା, ନାଁ ବ୍ୟବହାରରେ । ଗାଁରେ ମୋହନ ପଞ୍ଚିବା ପରେ କିଛି ଏମିତି ଦୃଶ୍ୟକୁ ନେଇ ଏବେ ଭାରି ଚର୍ଚ୍ଚା ।

ଓଡିଆର ମନ ପଖାଳ କଂସାରେ ଥାଏ । ସେ ଯେତେ ବଡ ଲୋକ ହେଉ ନା କାହିଁକି ନିଜ ଘରେ ତଳେ ବସି ପଖାଳ ଗଣ୍ଡାଏ ଖାଇଲେ ଯେଉଁ ଶାନ୍ତି ମିଳେ । ସେ ଶାନ୍ତି ତାରକା ହୋଟେଲ ଦେଇ ନଥାଏ । ଠିକ୍ ସେମିତି ଏକ ଉଦାହରଣ ଦେଖିବାକୁ ମିଳିଛି । ମୁଖ୍ୟମନ୍ତ୍ରୀ ହେବା ପରେ ପ୍ରଥମ ଥର ପାଇଁ ନିଜ ଜନ୍ମସ୍ଥାନକୁ ଆସିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଆଉ ମୁଖ୍ୟମନ୍ତ୍ରୀଙ୍କ ଗସ୍ତକୁ ନେଇ ପୁରା ଜିଲ୍ଲାରେ ଉତ୍ସବର ମାହୋଲ୍ । 

ଏମିତି କି ଘରେ ଭାଉଜମାନେ ମୁଖ୍ୟମନ୍ତ୍ରୀଙ୍କ ପାଇଁ ବନାଇଛନ୍ତି ଖାଣ୍ଟି ଓଡିଆ ଘରର ଖାଇବା । ପଖାଳ ଭାତ, ଶାଗ ଭଜା, ଝୁଡୁଙ୍ଗ ଆଳୁ ଭଜା ଏବଂ କୁନ୍ଦୁରି ଭଜା, ବଡ଼ି ଚୁରା ଭଳି ଘରୋଇ ଖାଦ୍ୟ । ଶେଷରେ ଗାଁ ଲୋକଙ୍କ ସହ ବେଶ କିଛି ସମୟ ବିତାଇଥିଲେ ମୁଖ୍ୟମନ୍ତ୍ରୀ ମୋହନ ମାଝୀ । ରାଇକଳା ଗ୍ରାମବାସୀଙ୍କ ଦୁଃଖ ସୁଖ, ସୁବିଧା, ଅସୁବିଧା ପଚାରି ବୁଝିଥିଲେ ମାଟିର ପୁଅ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।

ନିଜ ଗାଁ ରାଇକଳା ମୁଖ୍ୟମନ୍ତ୍ରୀ ଦିଆଗଲା ଭବ୍ୟ ସ୍ଵାଗତ ସମ୍ବର୍ଦ୍ଧନା । ରାଇକଳା ଠାରୁ ଝୁମ୍ପୁରା ପର୍ଯ୍ୟନ୍ତ ବିଶାଳ ରୋଡ଼ ସୋ କରିଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ରୋଡ଼ ସୋ ବେଳେ ରାସ୍ତାର ଉଭୟ ପାର୍ଶ୍ଵରେ ଉପସ୍ଥିତ ରହି ମୁଖ୍ୟମନ୍ତ୍ରୀଙ୍କୁ ସ୍ବାଗତ କରିଥିଲେ ଝୁମ୍ପୁରା ବ୍ଲକର ଜନସାଧାରଣ । ମହିଳାମାନେ ପୁଷ୍ପ ବର୍ଷା କରି ମୋହନ ମାଝୀଙ୍କୁ ସ୍ଵାଗତ କରିଥିଲେ । ରୋଡ଼ ସୋ କୁ କିଛି ସମୟ ବନ୍ଦ କରି ନିଜେ ପାଠ ପଢ଼ିଥିବା ଝୁମ୍ପୁରା ହାଇସ୍କୁଲକୁ ପରିଦର୍ଶନ କରିଥିଲେ ମୁଖ୍ୟମନ୍ତ୍ରୀ । ସ୍କୁଲ କର୍ତ୍ତୃପକ୍ଷ ଏବଂ ଛାତ୍ରଛାତ୍ରୀମାନଙ୍କ ପକ୍ଷରୁ ମୁଖ୍ୟମନ୍ତ୍ରୀଙ୍କୁ ସ୍ବାଗତ କରି ପାଛୋଟି ନେଇଥିଲେ । 

ହାଇସ୍କୁଲରେ 1987 ବ୍ୟାଚର ଛାତ୍ର ମାନେ ମୁଖ୍ୟମନ୍ତ୍ରୀ ଭାବେ ନିଜ ସହପାଠୀଙ୍କୁ ପାଇ ଭବ୍ୟ ସମ୍ବର୍ଦ୍ଧନା ଦେଇଥିଲେ । ପାଖାପାଖି 37 ବର୍ଷ ପରେ ନିଜ ସହପାଠୀ ତଥା ସାଙ୍ଗ ମାନଙ୍କୁ ପାଖରେ ପାଇ ଅତ୍ୟନ୍ତ ଆନନ୍ଦିତ ହୋଇଥିଲେ ମୁଖ୍ୟମନ୍ତ୍ରୀ । ସ୍କୁଲରେ ମୋହନ ମାଝୀଙ୍କ ସହ ବିତାଇଥିବା ସମୟ ଏବଂ ସ୍ମୃତି ସବୁ ମନେ ପକାଇ ଭାବବିହ୍ୱଳ ହୋଇଥିଲେ ସହପାଠୀ ମାନେ । ଝୁମ୍ପୁରା ବଜାରରେ ମଧ୍ୟ ରାସ୍ତା କଡ଼ରେ ଅପେକ୍ଷା କରିଥିବା ଜନ ସାଧାରଣ ମୁଖ୍ୟମନ୍ତ୍ରୀଙ୍କୁ ଫୁଲ ବର୍ଷା କରି ସ୍ବାଗତ କରିଥିବା ଦେଖିବାକୁ ମିଳିଛି ।

ଆହୁରି ପଢନ୍ତୁ ଓଡିଶା ଖବର...