Free Pucca House / ବଲାଙ୍ଗୀରରୁ PM ଆବାସ ଯୋଜନାର ଶୁଭାରମ୍ଭ; ସମସ୍ତଙ୍କୁ ପକ୍କାଘର ମିଳିବ କହିଲେ ମୁଖ୍ୟମନ୍ତ୍ରୀ

ବଲାଙ୍ଗୀର: ସମସ୍ତଙ୍କୁ ପକ୍କା ଘର ପ୍ରଦାନ ଆମ ସମସ୍ତଙ୍କ ଲକ୍ଷ୍ୟ । ୨ ବର୍ଷରେ ୫ ଲକ୍ଷରୁ ଅଧିକ ଗୃହ ପ୍ରଦାନ କରାଯାଇଛି । ବଲାଙ୍ଗୀରରୁ ପ୍ରଧାନମନ୍ତ୍ରୀ ଆବାସ ଯୋଜନାର ଶୁଭାରମ୍ଭ କରି ଏପରି କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । କାର୍ଯ୍ୟକ୍ରମରେ କେନ୍ଦ୍ର କୃଷିମନ୍ତ୍ରୀ ଶିବରାଜ ସିଂ ଚୌହାନ ମଧ୍ୟ ଯୋଗଦେଇଥିଲେ । ଏହି ଅବସରରେ ପୂର୍ବ ବିଜେଡି ସରକାର ଉପରେ ବର୍ଷିଛନ୍ତି ଶିବରାଜ । ପିଏମ୍ ଆବାସ ଯୋଜନାରେ ବଡ଼ ଘୋଟାଲା ହୋଇଥିଲା । ପୂର୍ବ ବିଜେଡି ସରକାର ଓଡ଼ିଶାର ଗରିବ ଲୋକଙ୍କ ହକ୍‌ ଛଡ଼ାଇନେଇଥିଲା ବୋଲି ସେ କହିଛନ୍ତି ।

• ୭ଲକ୍ଷ ହିତାଧିକାରୀଙ୍କୁ ଆବାସ ଘର

ପଥରଚେପା ପଡ଼ିଆରେ ଆୟୋଜିତ ପ୍ରଧାନମନ୍ତ୍ରୀ ଆବାସ ଯୋଜନା (ଗ୍ରାମୀଣ)ର ସ୍ୱତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଆଜି ୭ଲକ୍ଷ ହିତାଧିକାରୀଙ୍କୁ ମିଳିଛି ଆବାସ ଘର । ବଲାଙ୍ଗୀର ଜିଲ୍ଲାକୁ ୨୪୮ଟି ପ୍ରକଳ୍ପରେ ୯୧୧ କୋଟିରୁ ଊର୍ଦ୍ଧ୍ଵ ଟଙ୍କାର ଭେଟି ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ତେବେ ମୁଖ୍ୟମନ୍ତ୍ରୀଙ୍କ ସହ ଉପମୁଖ୍ୟମନ୍ତ୍ରୀ କେଭି ସିଂ ଦେଓ, ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଏବଂ ପଞ୍ଚାୟତିରାଜ ମନ୍ତ୍ରୀ ରବି ନାଏକ ମଧ୍ୟ ସାମିଲ ହୋଇଥିଲେ । ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ କହିଛନ୍ତି ଯେ,  ୨ ବର୍ଷରେ ୫ ଲକ୍ଷରୁ ଅଧିକ ଗୃହ ପ୍ରଦାନ କରାଯାଇଛି । ସମସ୍ତଙ୍କୁ ପକ୍କା ଘର ପ୍ରଦାନ ଆମ ସମସ୍ତଙ୍କ ଲକ୍ଷ୍ୟ ।

• ୬୦ ପୂରିଲେ ଗୋଟିଏ ମାସ ଭିତରେ ଭତ୍ତା ମିଳିବ

କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସମ୍ବୋଧନ କରି କହିଛନ୍ତି, "ବିଜେଡି ଭତ୍ତା ପ୍ରଦାନର ଘୋଷଣା କଲା ଦେଲାନି । ଜଣେ ହିତାଧିକାରୀର ମୃତ୍ୟୁ ପରେ ଆଉ ଜଣଙ୍କୁ ମିଳୁଥିଲା । ବିଜେପି ସରକାରରେ ଭତ୍ତା ପାଇବାର ସୁବିଧା କରାଗଲା । ୬୦ ବର୍ଷ ପୂରିଲେ ଗୋଟିଏ ମାସ ଭିତରେ ଭତ୍ତା ପାଇବେ ଲୋକେ । ଆମେ କଥାରେ ନୁହେଁ କାମରେ ବିଶ୍ଵାସ କରୁ ।"

ପଢନ୍ତୁ ଏହି ଖବର: ରାଜ୍ୟ ସରକାରଙ୍କ ବଡ଼ ଭେଟି; ପାର୍ଟ-ଟାଇମ୍ କଳା, ସଂଗୀତ ଓ କ୍ରୀଡ଼ା ଶିକ୍ଷକଙ୍କ ଦରମା ୧୬ ହଜାର ଟଙ୍କାକୁ ବୃଦ୍ଧି

• ବିଜେଡି ସରକାର ଉପରେ ବର୍ଷିଲେ ଶିବରାଜ

କାର୍ଯ୍ୟକ୍ରମରେ ଯୋଗଦେଇ କେନ୍ଦ୍ର କୃଷି ମନ୍ତ୍ରୀ ଶିବରାଜ ସିଂ ଚୌହାନ ବିଜେଡି ସରକାର ଉପରେ ବର୍ଷିଛନ୍ତି । ସେ କହିଛନ୍ତି, "ଓଡ଼ିଶାବାସୀଙ୍କ ସହ ଅନ୍ୟାୟ କରିଥିଲା ପୂର୍ବ ବିଜେଡି ସରକାର । ପିଏମ୍ ଆବାସ ଯୋଜନାରେ ବଡ଼ ଘୋଟାଲା କରିଥିଲା ବିଜେଡି । ଯାଞ୍ଚ ପରେ ଜଣାପଡ଼ିଲା ବିଜେଡି ସରକାର ଯୋଗ୍ୟଙ୍କୁ ବଞ୍ଚିତ କରିଥିଲା । ଓଡ଼ିଶାର ଗରିବ ଲୋକଙ୍କ ହକ୍‌ ଛଡ଼ାଇନେଇଥିଲା ବିଜେଡି । ପ୍ରଧାନମନ୍ତ୍ରୀ ଯାହା ଦେଉଥିଲେ, ଏଠି ଲାଭାର୍ଥୀ ପାଉନଥିଲେ । ଏବେ ଓଡ଼ିଶା ସରକାର ଗରିବଙ୍କ ହିତ ପାଇଁ କାର୍ଯ୍ୟ କରୁଛନ୍ତି । କୌଣସି ଯୋଗ୍ୟ ହିତାଧିକାରୀ ସେମାନଙ୍କ ହକ୍‌ରୁ ବଞ୍ଚିତ ହେବେନି । ସମସ୍ତଙ୍କୁ ପକ୍କାଘର ବାବଦରେ ଆବଶ୍ୟକ ଅର୍ଥ ଯୋଗାଇଦିଆଯିବ । ମୁଣ୍ଡ ଉପରେ ପକ୍କାଘର ଦେବାକୁ କୌଣସି ହେଳା କରାଯିବନି ।"