ଭୁବନେଶ୍ବର,୦୭/୦୬: କନ୍ଧମାଳ ଜିଲ୍ଲା ବାଲିଗୁଡ଼ା ITDAର ସହକାରୀ ନିର୍ବାହୀ ଯନ୍ତ୍ରୀ ବୈକୁଣ୍ଠ ନାଥ ବେହେରାଙ୍କ ଅମାପ ସମ୍ପତ୍ତି । ଭିଜିଲାନ୍ସ ଚଢ଼ାଉରେ ଆଉ ଏକ ବଡ଼ ଖୁଲାସା ସାମ୍ନାକୁ ଆସିଛି । ଅଭିଯୁକ୍ତ ଅଧିକାରୀଙ୍କ ବ୍ୟାଙ୍କ ଲକରରୁ ପ୍ରାୟ ୨ କୋଟିରୁ ଅଧିକ ଟଙ୍କା ଜବତ ହୋଇଛି। ବର୍ତ୍ତମାନ ବ୍ୟାଙ୍କର କ୍ୟାସ୍ କାଉଣ୍ଟିଂ ମେସିନ ମାଧ୍ୟମରେ ଟଙ୍କା ଗଣନା ଜାରି ରହିଛି । ବୈକୁଣ୍ଠଙ୍କର ମୋଟ ୫ ଟି ଲକର ଥିବାବେଳେ, ୪ଟି ଲକରରୁ ଏହି ଟଙ୍କା ଜବତ ହୋଇଛି । ଆଜି ଆଉ ଏକ ଲକର ଖୋଲାଯିବ।

ଭିଜିଲାନ୍ସ ଘାଣ୍ଟୁଛି, ବିଡ଼ା ପରେ ବିଡ଼ା ଟଙ୍କା ମିଳୁଛି । କନ୍ଧମାଳ ଜିଲ୍ଲା ବାଲିଗୁଡ଼ା ITDAର ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀ ବୈକୁଣ୍ଠନାଥ ବେହେରାଙ୍କ ସମ୍ପତ୍ତି ଦେଖି କାବା ହୋଇ ଗଲେଣି ଭିଜିଲାନ୍ସ ଅଧିକାରୀ । ବୈକୁଣ୍ଠଙ୍କ ଘର ପରେ ଭିଜିଲାନ୍ସ ତାଙ୍କ ବ୍ୟାଙ୍କ  ଲକର୍‌ ଯାଞ୍ଚ କରିଛି । ଲକର୍‌ରୁ ମିଳିଛି ପ୍ରାୟ ୨ କୋଟି ଟଙ୍କା ।

ପଢନ୍ତୁ ଏହି ଖବର: ଲାଞ୍ଚ ନେଇ ଧରା ପଡିଲେ ଯନ୍ତ୍ରୀ, ୧ ଲକ୍ଷ ଟଙ୍କା ଲାଞ୍ଚ ନେବା ବେଳେ ମାଡ଼ିବସିଲା ଭିଜିଲାନ୍ସ

ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ବାଲିଗୁଡ଼ା ITDAର ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀ ବୈକୁଣ୍ଠନାଥ ବେହେରାଙ୍କ ଅଫିସ୍ ସହ ଘରେ ରେଡ୍ ଜାରି ରଖିଛି । ଚଢ଼ାଉ ବେଳେ ବାବୁଙ୍କ ବ୍ୟାଙ୍କ୍ ଲକର୍‌ରୁ ମିଳିଛି ୨ କୋଟି ଟଙ୍କା । ଯାହାକୁ ଗଣିବା ଲାଗି ବ୍ୟାଙ୍କର ଟଙ୍କା ଗଣିବା ମେସିନ୍‌କୁ ନିୟୋଜିତ କରାଯାଇଛି ।


ବୈକୁଣ୍ଠଙ୍କ କୁବେର ଭଣ୍ଡାର

ଭିଜିଲାନ୍ସ ରେଡ୍ ବେଳେ ବୈକୁଣ୍ଠଙ୍କ ୫ଟି ରାଜକୀୟ ବହୁତଳ କୋଠା ସହ ୧୩ଟି ଉଚ୍ଚ ମୂଲ୍ୟର ପ୍ଲଟ୍ ପାଇଛି । ଘରୁ ମିଳିଛି ନଗଦ ୨ ଲକ୍ଷ ୬୬ ଲକ୍ଷ ଟଙ୍କା । ଏହା ପରେ ଭିଜିଲାନ୍ସ ବୈକୁଣ୍ଠଙ୍କ ବ୍ଯାଙ୍କ୍‌ ଲକର୍ ଯାଞ୍ଚ କରିଛି ।

ବୈକୁଣ୍ଠ ଓ ତାଙ୍କ ପତ୍ନୀଙ୍କ ନାଁରେ ଥିବା ଆକ୍ସିସ୍ ବ୍ୟାଙ୍କ୍ ଏବଂ ୟୁନିଅନ୍ ବ୍ୟାଙ୍କ୍ ଅଫ୍ ଇଣ୍ଡିଆ ଲକର୍‌ରେ ଭିଜିଲାନ୍ସ ରେଡ୍ କରିଛି । ରେଡ୍ ବେଳେ ଗୋଟିଏ ଲକର୍‌ରୁ ନଗଦ ୨ କୋଟି ଟଙ୍କା ଭିଜିଲାନ୍ସ ଠାବ କରିଛି ।

ଭୁବନେଶ୍ଵର ଚନ୍ଦ୍ରଶେଖରପୁରରେ ୧୦, ୫୦୦ ସ୍କୋୟାର୍ ଫୁଟ୍‌ରେ ୪ ମହଲା କୋଠା, ଶୈଳଶ୍ରୀ ବିହାରରେ ୧୧୦୦ ସ୍କୋୟାର୍ ଫୁଟ୍‌ରେ ୩ ମହଲା କୋଠା, ପଟିଆରେ ୩୭୫୦ ସ୍କୋୟାର୍ ଫୁଟ୍‌ରେ ୨ ମହଲା କୋଠା, ଚନ୍ଦ୍ରଶେଖରପୁର ଓ ଯାଜପୁର ଧର୍ମଶାଳାରେ ୨୫୦୦ ସ୍କୋୟାର୍ ଫୁଟ୍‌ରେ ୨ ମହଲା କୋଠା ମିଳିଛି ।


ଯନ୍ତ୍ରୀଙ୍କ ପାଖେ ୧୩ ପ୍ଲଟ୍

ଭିଜିଲାନ୍ସ ରେଡ୍ ବେଳେ ITDA ଯନ୍ତ୍ରୀ ବୈକୁଣ୍ଠନାଥଙ୍କ ନିକଟରୁ ୧୩ଟି ଉଚ୍ଚ ମୂଲ୍ୟର ପ୍ଲଟ୍ ପାଇଛି । ସେଥିରୁ ୭ଟି ପ୍ଲଟ୍ ଭୁବନେଶ୍ଵରର ପ୍ରମୁଖ ସ୍ଥାନରେ ରହିଥିବା ବେଳେ ୫ଟି ପ୍ଲଟ୍ ଧର୍ମଶାଳା, ଯାଜପୁର ରହିଥିବା ବେଳେ ଗୋଟିଏ ପ୍ଲଟ୍ ବାରିପଦାରେ ରହିଛି ।

ଏଥିସହ ଯନ୍ତ୍ରୀଙ୍କ ଘର ମିଳିଥିବା ସୁନା ଅଳଙ୍କାରର ଓଜନ ଚାଲିଛି । ବ୍ୟାଙ୍କ, ଡାକଘର ଓ ଅନ୍ୟ ନିବେଶର ଯାଞ୍ଚ କରୁଛି ଭିଜିଲାନ୍ସ । ୨ ଜଣ ଅତିରିକ୍ତ ଏସପି, ୫ ଜଣ ଡିଏସପି, ୬ ଜଣ ଇନ୍ସପେକ୍ଟର ଏବଂ ଅନ୍ୟ ସହଯୋଗୀ କର୍ମଚାରୀଙ୍କ ନେତୃତ୍ୱରେ ଭୁବନେଶ୍ୱର, ବାରିପଦା, ଧର୍ମଶାଳା ଏବଂ ବାଲିଗୁଡ଼ା ଆଦି ୯ଟି ଠିକଣାରେ ଚଢ଼ାଉ ଚାଲିଛି ।