ଆଠଗଡ଼ (କଟକ): ମହିଳାଙ୍କୁ ମାରିଦେଲା ମାଙ୍କଡ଼ । ଛାତରୁ ତଳକୁ ଠେଲି ଦେଲା । ଆଶ୍ଚର୍ଯ୍ୟ ଲାଗୁଥିଲେ ବି ଏ ଘଟଣା ସତ । କଟକ ଜିଲ୍ଲା ଆଠଗଡ଼ ଥାନା ଅନ୍ତର୍ଗତ ରାଜନଗର ଦେଉଳ ସାହିରେ ମାଙ୍କଡ଼ ଜଣେ ମହିଳାଙ୍କୁ ଛାତରୁ ଠେଲି ମାରି ଦେଇଛି ।

ସୂଚନା ଅନୁସାରେ, ଦେଉଳ ସାହିର ଅଭିମନ୍ୟୁ ସାହୁଙ୍କ ସ୍ତ୍ରୀ ସୁଲୋଚନା ସବୁଦିନ ଭଳି ରବିବାର ଛାତ ଉପରକୁ ଯାଇଥିଲେ । ସକାଳେ ଶୁଖାଇଥିବା ଘସି ସହ ଲୁଗା ପଟା ତୋଳୁଥିଲେ । ସେହି ସମୟରେ ସୁଲୋଚନାକୁ ଘେରିଗଲେ ମାଙ୍କଡ଼ ।

ଏଥିସହ ପଢ଼ନ୍ତୁ: ମଜାରେ ମଡେଲ୍ ପତ୍ନୀଙ୍କୁ 'ମାଙ୍କଡ଼' କହିଲେ ସ୍ଵାମୀ; ରାଗରେ ଝୁଲି ପଡ଼ିଲା ସ୍ତ୍ରୀ

ଗାଁ ଲୋକେ ତଳେ ଥାଇ ଦେଖିବା ସହ ପାଟି କରୁଥିଲେ । ଆଉ ସମସ୍ତଙ୍କ ଆଖି ଆଗରେ ମାଙ୍କଡ଼ ସୁଲୋଚନାକୁ ଛାତ ଉପରୁ ତଳକୁ ଠେଲିଦେଲା । ରକ୍ତାକ୍ତ ଅବସ୍ଥାରେ ପରିବାର ଓ ଗାଁ ଲୋକ ସୁଲୋଚନାଙ୍କୁ ମେଡିକାଲ୍ ନେଇଥିଲେ । ଡାକ୍ତରେ ସୁଲୋଚନାଙ୍କୁ ମୃତ ଘୋଷଣା କରିଛନ୍ତି ।

ପୂର୍ବତନ ସରପଞ୍ଚ ମହେନ୍ଦ୍ର ପରିଡ଼ା କହିଛନ୍ତି, "ପ୍ରାୟ ୪ ମାସ ହେଲା ଗାଁରେ ମାଙ୍କଡ଼ ଆତଙ୍କ ଜାରି ରହିଛି । ମାଙ୍କଡ଼ ଠେଲି ଦେବାରୁ ଆଜି ଜଣେ ମହିଳାଙ୍କ ମୃତ୍ୟୁ ହୋଇଛି । ୪ ମାସରେ ପ୍ରାୟ ୧୦୦ ଜଣ ଆହତ ହେଲେଣି । ଏନେଇ ଆମେ ବିଭାଗକୁ ଜଣାଇଛୁ, ଜାଲ ନେଇକି ଯାଇଥିଲେ ହେଲେ ମାଙ୍କଡ଼ ଧରି ପାରିଲେନି ।"

ଏଥିସହ ପଢ଼ନ୍ତୁ: ବୃନ୍ଦାବନ ଯିବେ ରାଷ୍ଟ୍ରପତି; ଚଷମା ଛଡ଼ାଉଥିବା ମାଙ୍କଡଙ୍କ ପାଇଁ ଖାସ ପ୍ଲାନ୍

ମାଙ୍କଡ଼କୁ ଏବେ ନ ଧରିଲେ, ଆଗକୁ ସ୍ଥିତି ଅସମ୍ଭାଳ ହେବ ବୋଲି କହିଛନ୍ତି ଗ୍ରାମବାସୀ । ଆଗାମୀ ଦିନରେ ଲୋକଙ୍କ ସୁରକ୍ଷା ପାଇଁ ମାଙ୍କଡ଼କୁ ଟ୍ରାଙ୍କୁଲାଇଜ୍ କରିବାକୁ ଦାବି ହୋଇଛି । ତେବେ ମାଙ୍କଡ଼ ଠେଲିବାରୁ ମହିଳାଙ୍କ ମୃତ୍ୟୁ ନେଇ ବନ ବିଭାଗର ପ୍ରତିକ୍ରିୟା ମିଳିପାରି ନାହିଁ ।

ଆଠଗଡ଼ ବ୍ଲକ ରାଜନଗର ଅଞ୍ଚଳରେ ୪ ମାସ ହେଲା ମାଙ୍କଡ଼ ଉତ୍ପାତ ମଚାଇ ଚାଲିଛି । ହେଲେ କାହିଁକି ଭାଙ୍ଗୁନି ବନ ବିଭାଗର ନିଦ ? ଏବେ ଜଣଙ୍କ ଜୀବନ ଗଲା, ଆଉ କେତେ ମୁଣ୍ଡ ଗଡ଼ିଲେ ସଜାଗ ହେବ ବନ ବିଭାଗ ? ଏ ଦିଗରେ ପ୍ରଶାସନ ଓ ବନ ବିଭାଗ ତୁରନ୍ତ ପଦକ୍ଷେପ ନେବା ଜରୁରୀ ହୋଇ ପଡ଼ିଛି ।