ଅର୍ଗସ ବ୍ୟୁରୋ : ପଡୋଶୀ ଛତିଶଗଡ଼ର କଲମା ବ୍ୟାରେଜ୍‌ ଠାରେ ଏବେ ମହାନଦୀ ସଂପୂର୍ଣ୍ଣ ବନ୍ଦିନୀ । ପିଲାବେଳେ ପଢିଥିବା ଓଡ଼ିଶାର ବଡ଼ ନଦୀ ‘ମହାନଦୀ’ ଏବେ ଖରା ଆରମ୍ଭରୁ ମୃତପ୍ରାୟ । ଏଠି ଯୁଆଡ଼େ ଦେଖିବ ଖାଲି ବାଲି ଆଉ ବାଲି । ଏ ହେଉଛି କାଠଯୋଡି ଓ ମହାନଦୀର ଦୃଶ୍ୟ । ଏ ହେଉଛି ଖରା ଆରମ୍ଭର ଦୃଶ୍ୟ । ଖରା ଆରମ୍ଭରୁ ଶୁଖିଲା ପଡିଛି କଟକ ସହରକୁ ଘେରି ରହିଥିବା ଏହି ଦୁଇ ନଦୀ । ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ପ୍ରସ୍ତୁତି ଆରମ୍ଭ କରିଥିବା ବେଳେ କିନ୍ତୁ କଟକ ଦେଇ ପ୍ରବାହିତ ଦୁଇ ପ୍ରମୁଖ ନଦୀରେ ଦେଖାଦେଲାଣି ପାଣି ସମସ୍ୟା ।

କେବଳ ବର୍ଷା ଦିନକୁ ଛାଡି ଦେଲେ ଅନ୍ୟ ଦିନ ମାନଙ୍କରେ ନଦୀରେ ପାଣି ନ ଥାଏ । ଯାହା ଫଳରେ ନଦୀ ଉପରେ ନିର୍ଭର କରୁଥିବା ମତ୍ସ୍ୟଜୀବୀ, ଚାଷୀ , ପ୍ରଭାବିତ ହେଉଛନ୍ତି । ଢେର ଦୁର୍ଦ୍ଦଶାର ସମ୍ମୁଖୀନ ମଧ୍ୟ ହେଉଛନ୍ତି । ୨୪ ବର୍ଷର ସ୍ଥିର ସରକାର ରାଜ୍ୟରେ ଶାସନ କରୁଥିବା ବେଳେ କିନ୍ତୁ କାଠଯୋଡ଼ି ନଦୀ ଉପରେ ଗୋଟିଏ ବି ଛୋଟ ବଡ଼ ବ୍ୟାରେଜ କି ଡ୍ୟାମ ନିର୍ମାଣ ହୋଇନାହିଁ । ଯାହା ଫଳରେ ବର୍ଷା ଜଳ ହେଉ କି ବନ୍ୟା ଜଳ ତାକୁ ସରଣକ୍ଷଣ କରାଯାଇ ପାରୁ ନାହିଁ ।

କାଠଯୋଡି ନଦୀରେ ଡ୍ୟାମ ନିର୍ମାଣ ପାଇଁ ଦୀର୍ଘ ବର୍ଷ ଧରି ଦାବି ହେଉଥିଲେ ବି, ତାକୁ କର୍ଣ୍ଣପାତ କରୁନାହାନ୍ତି ରାଜ୍ୟ ସରକାର ବୋଲି ଅଭିଯୋଗ କରିଛନ୍ତି କଟକ ନଗର ବିଜେପି ସଭାପତି । ଦେଖିବାକୁ ରହିଲା କେବେ ଦୁର ହେବ ଏ ସମସ୍ୟା । ନା ଏ ସମସ୍ୟାରେ ଛନ୍ଦି ହୋଇ, ପାଣିର ଅଭାବକୁ ନେଇ ବଞ୍ଚିବେ ସାଧାରଣ ଲୋକେ । ଭୂଗୋଳ ନରହି କେବଳ ଇତିହାସରେ ରହି ଯିବନି ତ ମହାନଦୀର ପରିଚୟ ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV