ଅର୍ଗସ ବ୍ୟୁରୋ:  ଅକ୍ଟୋବରରେ ଓଡ଼ିଶାକୁ ଘାରିଛି ବାତ୍ୟା ଭୟ । ପାଣିପାଗ କେନ୍ଦ୍ର କହିଲା, କେବଳ ଲଘୁଚାପ କ୍ଷେତ୍ର ଓ ଅବପାତର କରାଯାଇଛି ଆକଳନ। ବାତ୍ୟା ନେଇ ଏବେ ପର୍ଯ୍ୟନ୍ତ ନାହିଁ ସୂଚନା। ଆଜି କେନ୍ଦ୍ରୀୟ ଆଣ୍ଡାମାନ ସାଗରରେ ସୃଷ୍ଟି ହୋଇଛି ଘୂର୍ଣ୍ଣିବଳୟ। ବାୟୁମଣ୍ଡଳର ଉପରି ଭାଗରେ ୫.୮ କିମି ଯାଏଁ ବ୍ୟାପ୍ତ ଅଛି । ଏହା 21 ବେଳକୁ ବଙ୍ଗୋପସାଗରରେ ଲଘୁଚାପ କ୍ଷେତ୍ରରେ ପରିଣତ ହେବା ସମ୍ଭାବନା । ଏହା କ୍ରମଶଃ ଉତ୍ତର-ପଶ୍ଚିମକୁ ଗତି କରି 23 ତାରିଖ ବଳକୁ ଅବପାତର ରୂପ ନେବ । ପ୍ରଭାବରେ 23 ତାରିଖରୁ 25 ଯାଏଁ ରାଜ୍ୟରେ ପ୍ରବଳ ବର୍ଷା ସମ୍ଭାବନା ରହିଛି । 22ରୁ ସମୁଦ୍ର ଅଶାନ୍ତ ରହିବ, 21 ତାରିଖ ସୁଦ୍ଧା ମତ୍ସ୍ୟଜୀବୀଙ୍କୁ ଫେରି ଆସିବାକୁ ପରାମର୍ଶ ଦେଇଛନ୍ତି ଭୁବନେଶ୍ବର ଆଞ୍ଚଳିକ ପାଣିପାଗ ନିର୍ଦ୍ଦେଶିକା ।

ସେପଟେ ବିଭିନ୍ନ ମଡେଲର ଆକଳନ କହୁଛି, ଓଡ଼ିଶା ଉପକୂଳ ଅତିକ୍ରମ କରିବ ବାତ୍ୟା । ୟୁରୋପିଆନ ମଡେଲ ECMWF ଅନୁଯାୟୀ, ଲଘୁଚାପ ୨୩ରେ ଅବପାତ ଓ ୨୪ରେ ବାତ୍ୟା ହୋଇ ଓଡ଼ିଶା ଉପକୂଳ ଅତିକ୍ରମ କରିବ । ସେହିପରି GFS ଗ୍ଲୋବାଲ ଫୋରକାଷ୍ଟିଂ ସିଷ୍ଟମ ଅନୁଯାୟୀ,  ଅବପାତ ୨୪ରେ ବାତ୍ୟା ହୋଇ ଓଡ଼ିଶା ସଂଲଗ୍ନ ପଶ୍ଚିମବଙ୍ଗ ଉପକୂଳ ଅତିକ୍ରମ କରିବ ।  ତେବେ ଅକ୍ଟୋବରକୁ ବାତ୍ୟା ପ୍ରବଣ ମାସ କୁହାଯାଉଥିବାବେଳେ ବାତ୍ୟା ସୃଷ୍ଟି ପାଇଁ ପାଗ ଅନୁକୂଳ ଥିବା କହିଛି ଭାରତୀୟ ପାଣିପାଗ ବିଭାଗ- IMD । ହେଲେ ଲଘୁଚାପ କେତେ ଘନୀଭୂତ ହେବ ଓ ଏହାର ଗତିପଥ କେଉଁ ଆଡ଼କୁ ରହିବ ଓ ଏହାର ପ୍ରଭାବ କେଉଁ ଉପକୂଳରେ ପଡ଼ିବ, ତାହା ଏବେଠାରୁ ଆକଳନ କରିନାହିଁ ଭାରତୀୟ ପାଣିପାଗ ବିଭାଗ ।

ଆସନ୍ତା 24 ଘଣ୍ଟାରେ କିଛି କିଛି ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହେବ । ଭଦ୍ରକ, ବାଲେଶ୍ବର, ଯାଜପୁର ଜିଲ୍ଲାକୁ ୱାର୍ଣ୍ଣିଂ ଜାରି ହୋଇଛି । ସେହିପରି ଉପକୂଳବର୍ତ୍ତୀ ଜିଲ୍ଲା ମାନଙ୍କରେ ବିଜୁଳି, ଘଡ଼ଘଡ଼ି ହୋଇପାରେ । 20, 21 ଓ 22 ତାରିଖ ଉପକୂଳ ସମେତ ଦକ୍ଷିଣ ଓଡ଼ିଶାର କାଁଭାଁ ସ୍ଥାନରେ ବର୍ଷା ସମ୍ଭାବନା ଥିବା ସୂଚନା ଦେଇଛି ପାଣିପାଗ କେନ୍ଦ୍ର ।

ଅଧିକ ପଢ଼ନ୍ତୁ ଓଡ଼ିଶା ଖବର: