Cyclone Murasu / ସାମୁଦ୍ରିକ ବାତ୍ୟା 'ମୁରାସୁ' ଆନ୍ଧ୍ରର ନେଲୋରରେ ଛୁଇଁଲା ସ୍ଥଳଭାଗ... ଘଣ୍ଟାପ୍ରତି ୧୦୦-୧୧୦ କିମି ବେଗରେ ବହିଲା ପବନ

ସାମୁଦ୍ରିକ ବାତ୍ୟା 'ମୁରାସୁ' ନଭେମ୍ବର ୩, ମଙ୍ଗଳବାର ରାତି ୧ଟା ସମୟରେ ଓଙ୍ଗୋଲ ନିକଟବର୍ତ୍ତୀ ଦକ୍ଷିଣ ଆନ୍ଧ୍ରପ୍ରଦେଶ ଉପକୂଳରେ ସ୍ଥଳଭାଗ ଛୁଇଁଛି। ଏହି ସମୟରେ ପବନର ବେଗ ଘଣ୍ଟାପ୍ରତି ୧୦୦ ରୁ ୧୧୦ କିଲୋମିଟର ରହିଥିବା ବେଳେ ଝଟକା ପବନର ବେଗ ୧୨୦ କିଲୋମିଟର ପର୍ଯ୍ୟନ୍ତ ପହଞ୍ଚିଥିଲା। ଆନ୍ଧ୍ରପ୍ରଦେଶର ପ୍ରକାଶମ ଜିଲ୍ଲା ଏହାଦ୍ୱାରା ସବୁଠାରୁ ଅଧିକ ପ୍ରଭାବିତ ହୋଇଛି।



ପ୍ରବଳରୁ ଅତି ପ୍ରବଳ ବର୍ଷା ଯୋଗୁଁ ନନ୍ଦ୍ୟାଲ, ତିରୁପତି ଏବଂ ପଲନାଡୁ ଜିଲ୍ଲା ପାଇଁ 'ରେଡ୍ ଆଲର୍ଟ' ଜାରି ରହିଛି। ଏହା ସହିତ ପ୍ରକାଶମ, ନେଲୁର, ବାପଟଲା, ଗୁଣ୍ଟୁର ଏବଂ କୃଷ୍ଣା ସମେତ ଅନ୍ୟ ୧୧ଟି ଜିଲ୍ଲାରେ 'ଅରେଞ୍ଜ ଆଲର୍ଟ' ବଳବତ୍ତର ରହିଛି। ବାତ୍ୟାର ବାହ୍ୟ ବଳୟ ପ୍ରଭାବରେ ଗତ ମଧ୍ୟରାତ୍ରିରୁ ପୁଡୁଚେରୀ ଏବଂ ଉତ୍ତର ତାମିଲନାଡୁରେ ପ୍ରବଳ ବର୍ଷା ଜାରି ରହିଛି, ଯାହାଫଳରେ ଜନଜୀବନ ସମ୍ପୂର୍ଣ୍ଣ ବ୍ୟାହତ ହୋଇଛି। ସମୁଦ୍ରରେ ୧.୫ ରୁ ୨ ମିଟର ଉଚ୍ଚର ଜୁଆର ଉଠୁଥିବାରୁ ବାପଟଲା, କୃଷ୍ଣା ଏବଂ ପ୍ରକାଶମ ଜିଲ୍ଲାର ତଳିଆ ଉପକୂଳ ଅଞ୍ଚଳ ଜଳମଗ୍ନ ହେବାର ଆଶଙ୍କା ରହିଛି।

ଭାରତୀୟ ପାଣିପାଗ ବିଭାଗର ସୂଚନା ଅନୁଯାୟୀ, ଏହି ବାତ୍ୟା ପଶ୍ଚିମ-ଉତ୍ତରପଶ୍ଚିମ ଦିଗରେ ସ୍ଥଳଭାଗ ଆଡ଼କୁ ଗତି କରିବ। ଆଜି ସକାଳ ପର୍ଯ୍ୟନ୍ତ ଏହା ଏକ ଭୟଙ୍କର ବାତ୍ୟା ରୂପରେ ରହିବା ପରେ ଧୀରେ ଧୀରେ ଦୁର୍ବଳ ହୋଇ ସାଧାରଣ ବାତ୍ୟାରେ ପରିଣତ ହେବ। ଆଜି ମଧ୍ୟାହ୍ନ ପର୍ଯ୍ୟନ୍ତ ଆନ୍ଧ୍ରପ୍ରଦେଶର ଆଭ୍ୟନ୍ତରୀଣ ଉପକୂଳ, ରାୟଲସୀମା ଏବଂ ତେଲେଙ୍ଗାନାର କେତେକ ଅଞ୍ଚଳରେ ଘଣ୍ଟାପ୍ରତି ୭୦-୮୦ କିଲୋମିଟର (ଝଟକା ପବନ ୯୦ କିମି) ବେଗରେ ପବନ ବହିପାରେ। ଏହି ବାତ୍ୟା ପ୍ରଭାବରେ ଆଗାମୀ ୨୪ ରୁ ୪୮ ଘଣ୍ଟା ମଧ୍ୟରେ ଦକ୍ଷିଣ ଓଡ଼ିଶା, ତେଲେଙ୍ଗାନା ଏବଂ ଛତିଶଗଡ଼ରେ ପ୍ରବଳ ବର୍ଷା ହେବାର ସମ୍ଭାବନା ରହିଛି।

ପ୍ରତିକୂଳ ପାଣିପାଗ ଯୋଗୁଁ ଚେନ୍ନାଇ, ବିଜୟୱାଡା, ବିଶାଖାପାଟଣା ଏବଂ ତିରୁପତି ବିମାନବନ୍ଦରରେ ପ୍ରାୟ ୩୦ଟି ଘରୋଇ ବିମାନ ଉଡ଼ାଣ ବାତିଲ କରାଯାଇଛି ଏବଂ ୯ଟି ପ୍ରମୁଖ ଟ୍ରେନର ଯାତ୍ରାକୁ ସ୍ଥଗିତ ରଖାଯାଇଛି। ସୁରକ୍ଷା ଦୃଷ୍ଟିରୁ ୩୦,୦୦୦ ରୁ ଅଧିକ ଲୋକଙ୍କୁ ବିପଦସଙ୍କୁଳ ଅଞ୍ଚଳରୁ ସୁରକ୍ଷିତ ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଇଛି।

ବାତ୍ୟା ମୁରାସୁ ର ବିଶେଷ ପ୍ରଭାବ ଓଡ଼ିଶା ଉପରେ ନାହିଁ । ଏହାର ପ୍ରଭାବ ଦକ୍ଷିଣ ଆନ୍ଧ୍ରରେ ପଡିବ। ଲ୍ୟାଣ୍ଡଫଲ୍ ବେଳେ ପବନର ବେଗ ୧୦୦ରୁ ୧୧୦ ଓ ଝଟକା ପବନ ୧୨୦ କିଲୋମିଟର ପ୍ରବାହିତ ହେବାର ସମ୍ଭାବନା ରହିଛି ।

ତେବେ ଏହାର ପ୍ରଭାବରେ ଓଡ଼ିଶାର ଅଧିକାଂଶ ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି । ଆସନ୍ତା ୨୪ ଘଣ୍ଟା ମଧ୍ୟରେ ଦକ୍ଷିଣ ଓଡ଼ିଶାର ୫ଟି ଜିଲ୍ଲା ରାୟଗଡା, କୋରାପୁଟ, ମାଲକାନଗିରି, ଗଂଜାମ, ଗଜପତିର ଗୋଟେ ଦୁଇଟି ସ୍ଥାନରେ ପ୍ରବଳ ବର୍ଷା ହେବାର ସମ୍ଭାବନା ରହିଥିବାରୁ ୟେଲୋ ଅଳର୍ଟ ଜାରି କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ।

ସେହିଭଳି ୩ ତାରିଖରେ ମଧ୍ୟ ଏହି ୫ଟି ଜିଲ୍ଲାରେ ଗୋଟେ ଦୁଇଟି ସ୍ଥାନରେ ପ୍ରବଳ ବର୍ଷା ହେବାର ସମ୍ଭାବନା ରହିଥିବାରୁ ୟେଲୋ ଆଲର୍ଟ ଦିଆଯାଇଛି । ୪ ତାରିଖରେ କୋରାପୁଟ ଓ ମାଲକାନଗିରିର ଗୋଟେ ଦୁଇଟି ସ୍ଥାନରେ ପ୍ରବଳ ବର୍ଷା ହେବାକୁ ନେଇ ଚେତାବନୀ ଦିଆଯାଇଛି । ଏହାସହ ୨ରୁ ୪ ତାରିଖ ୩ ଦିନ ଧରି ଉପକୂଳ ଓଡ଼ିଶାରେ ମଧ୍ୟ ଘଡଘଡି ସହ ବର୍ଷା ସମ୍ଭାବନା ଥିବାରୁ ୟେଲୋ ଓ୍ବାର୍ଣ୍ଣିଂ ରହିଛି ।