School Closed / ପୁଣି ଆସୁଛି ବାତ୍ୟା; ନଭେମ୍ବର ୪ ପର୍ଯ୍ୟନ୍ତ ସ୍କୁଲ କଲେଜ ଛୁଟି

ମାଲକାନଗିରି: ବାତ୍ୟା 'ଅର୍ଣ୍ଣବ'ର ଦୁଃଖ ନ ଯାଉଣୁ, ପୁଣି ଆସୁଛି ଆଉ ଏକ ବାତ୍ୟା ‘ମୁରାସୁ’। ଗତ ୬ ଘଣ୍ଟା ମଧ୍ୟରେ ଘଣ୍ଟାପ୍ରତି ୨୭ କିଲୋମିଟର ବେଗରେ ପଶ୍ଚିମ-ଉତ୍ତରପଶ୍ଚିମ ଦିଗରେ ଗତି କରୁଛି । ଏହାର ପ୍ରଭାବରେ ମାଲକାନଗିରିରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି । ଏଣୁ ମାଲକାନଗିରିରେ ଆସନ୍ତା ନଭେମ୍ବର ୪ ତାରିଖ ପର୍ଯ୍ୟନ୍ତ ସମସ୍ତ ସ୍କୁଲ, କଲେଜକୁ ଛୁଟି ଘୋଷଣା କରାଯାଇଛି । ସେହିପରି ନଭେମ୍ବର ୨ ତାରିଖ ଯାଏଁ ଗଞ୍ଜାମରେ ସମସ୍ତ ସ୍କୁଲ ଛୁଟି ରହିବ ।

ବାତ୍ୟା 'ମୁରାସୁ'କୁ ଦୃଷ୍ଟିରେ ରଖି ମାଲକାନଗିରି ଜିଲ୍ଲା ପ୍ରଶାସନ ପକ୍ଷରୁ ଜରୁରୀକାଳୀନ ପ୍ରସ୍ତୁତି କଡ଼ାକଡ଼ି କରାଯାଇଛି। ଜିଲ୍ଲାପାଳ ଓ ଜିଲ୍ଲା ମାଜିଷ୍ଟ୍ରେଟ ପ୍ରଥମେଶ ଅରବିନ୍ଦ ରାଜସିର୍କେଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ସମୀକ୍ଷା ବୈଠକରେ 'ଶୂନ୍ୟ ଜୀବନହାନି' ନୀତିକୁ ଆଧାର କରି ପ୍ରଶାସନିକ ସ୍ତରରେ ବିଭିନ୍ନ ଜରୁରୀ ନିର୍ଦ୍ଦେଶ ଜାରି କରାଯାଇଛି ।

• ନଭେମ୍ବର ୪ ଯାଏଁ ସ୍କୁଲ ବନ୍ଦ

ଆସୁଥିବା ବାତ୍ୟା ମୁରାସୁ ପାଇଁ ନଭେମ୍ବର ୨ ତାରିଖ ପାଇଁ ମାଲକାନଗିରି ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି । ୪୦ରୁ ୫୦ କିଲୋମିଟର ବେଗରେ ପବନ ବହିବା ସହ ଘଣ୍ଟା ପ୍ରତି ୬୦ କିଲୋମିଟର ବେଗରେ ଝଟକା ପବନ ବହିପାରେ । ଏହାସହ ଜିଲ୍ଲାରୁ ପ୍ରବଳରୁ ଅତିପ୍ରବଳ ବିଜୁଳି ଘଡ଼ଘଡ଼ି ବର୍ଷା ହେବାର ସମ୍ଭାବନା ରହିଛି । ଏହାକୁ ଆଖି ଆଗରେ ରଖି ମାଲକାନଗିରିରେ ସମସ୍ତ ସରକାରୀ ଓ ବେସରକାରୀ ସ୍କୁଲ, କଲେଜ, ଅଙ୍ଗନବାଡି କେନ୍ଦ୍ରକୁ ବନ୍ଦ ରଖାଯାଇଛି ।

• ନଭେମ୍ବର ୨ ଯାଏଁ ଗଞ୍ଜାମରେ ସ୍କୁଲ ଛୁଟି

ଧୀରେ ଧୀରେ ସୁଧୁରୁଛି ଗଞ୍ଜାମ ସ୍ଥିତି । ଏବେ ବି ଅନେକ ଅଞ୍ଚଳରେ ବନ୍ୟାପାଣି ଛାଡ଼ିନି । ଫଳରେ ସ୍ଥାନୀୟ ଲୋକେ ସ୍କୁଲ ଘରେ ଆଶ୍ରୟ ନେଇଛନ୍ତି । ଏମିତିକି ଅନେକ ଶିକ୍ଷାନୁଷ୍ଠାନରେ ମଧ୍ୟ ପାଣି ରହିଛି । ଏଥିଲାଗି ନଭେମ୍ବର ଦୁଇ ତାରିଖ ଯାଏଁ ଜିଲ୍ଲାର ସବୁ ସ୍କୁଲକୁ ଛୁଟି ଘୋଷଣା କଲେ ଜିଳ୍ଲାପାଳ । ଆଜି ସନ୍ଧ୍ୟା ସୁଦ୍ଧା ସବୁ ଜାଗାରେ ରେଷ୍ଟ୍ରୋରେସନ କାମ ସରିବାକୁ ଲକ୍ଷ୍ୟ ରଖାଯାଇଛି । ଯୁଦ୍ଧକାଳୀନ ଭିତ୍ତିରେ କରାଯାଉଛି ରାସ୍ତା ମରାମତି । ଏ ନେଇ ପ୍ରେସମିଟରେ ସୂଚନା ଦେଲେ ଜିଲ୍ଲାପାଳ ।

ପଢନ୍ତୁ ଏହି ଖବର: ବଙ୍ଗୋପସାଗରରେ ସୃଷ୍ଟି ହେଲା ବାତ୍ୟା ‘ମୁରାସୁ’, ଜାଣନ୍ତୁ କେଉଁଠି କରିବ ଲ୍ୟାଣ୍ଡଫଲ୍‌

• ପୁଣି ବାତ୍ୟା 'ଦକ୍ଷିଣ'ମୁହାଁ

‘ଅର୍ଣ୍ଣବ’ ପରେ ଆସୁଛି ‘ମୁରାସୁ’ । ଘଣ୍ଟାକୁ ୨୭ କିମି ବେଗରେ ସ୍ଥଳଭାଗ ମୁହାଁ । ଏହା ତାମିଲନାଡୁର ଚେନ୍ନାଇଠାରୁ ପୂର୍ବ-ଦକ୍ଷିଣପୂର୍ବ ଦିଗରେ ପ୍ରାୟ ୪୮୦ କିଲୋମିଟର, ଆନ୍ଧ୍ରପ୍ରଦେଶର ନେଲୋରଠାରୁ ୫୫୦ କିଲୋମିଟର, ମଛଲିପଟନମ୍‌ଠାରୁ ୫୬୦ କିଲୋମିଟର, ଓଙ୍ଗୋଲଠାରୁ ୬୦୦ କିଲୋମିଟର ଏବଂ ବିଶାଖାପାଟଣାଠାରୁ ଦକ୍ଷିଣ-ଦକ୍ଷିଣପୂର୍ବ ଦିଗରେ ପ୍ରାୟ ୬୧୦ କିଲୋମିଟର ଦୂରରେ ରହିଛି । କେନ୍ଦ୍ରୀୟ ଆନ୍ଧ୍ର-ଦକ୍ଷିଣ ଉପକୂଳରେ ଲ୍ୟାଣ୍ଡଫଲ୍ କରିପାରେ । ଗଞ୍ଜାମ ଓ ଗଜପତିକୁ ଅଧିକ ବିପଦ ରହିଛି । ୩ ଓ ୪ ତାରିଖରେ ଦକ୍ଷିଣ ଓଡ଼ିଶାରେ ପ୍ରବଳରୁ ଅତି ପ୍ରବଳ ବର୍ଷା ଆଶଙ୍କା କରାଯାଇଛି । ଏଥିଲାଗି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ୫ ଜିଲ୍ଲାକୁ ଅରେଞ୍ଜ ଓ୍ବାର୍ଣ୍ଣିଂ ଜାରି କରିଛି । ଭୂସ୍ଖଳନ ଓ ଜଳବନ୍ଦୀ ନେଇ ମଧ୍ୟ ଚେତାବନୀ ଦିଆଯାଇଛି । ନଭେମ୍ବର ୨ରୁ ୪ ତାରିଖ ଅଶାନ୍ତ ରହିବ ସମୁଦ୍ର ଅଶାନ୍ତ ।